Москва И.М. Сеченовым ыцIэ зыхьырэ Апэрэ Московскэ къэралыгъо медицинскэ университетэу дэтым ибазэ Ассоциациеу «Медицинскэ ыкIи фармацевтическэ апшъэрэ еджапIэхэм яректорхэм я Совет» зыфиIорэм изэхэсыгъо щыкIуагъ. Ащ хэлэжьагъэх Мыекъопэ къэралыгъо технологическэ университетым иректорэу Къуижъ Саидэрэ МКъТУ-м хэхьэрэ Медицинскэ институтым ипащэу Хъурэе Аслъанрэ.

Iофтхьабзэм зэрипхыгъэх медицинскэ ыкIи фармацевтическэ гъэсэныгъэ организациехэу хэгъэгум итхэм япащэхэр, ахэр атегущыIагъэх специалистхэм ягъэхьазырынкIэ къэуцурэ Iофыгъохэм, медицинэ гъэсэныгъэм хэхъоныгъэ егъэшIыгъэным ыкIи псауныгъэм икъэухъумэн. ШIуфэс псалъэ къэзэрэугъоигъэхэм къафашIыгъ псауныгъэм иухъумэнкIэ УФ-м и Министрэу Михаил Мурашкэрэ апшъэрэ гъэсэныгъэмрэ наукэмрэкIэ УФ-м и Министрэу Валерий Фальковымрэ.

Темэ гупчэу зытегущыIагъэхэм ащыщыгъ Урысыем псауныгъэр къэухъумэгъэнымкIэ и Министерствэ епхыгъэ гъэсэныгъэ организациехэм 2026-рэ илъэсым яприемнэ кампание зэфэхьысыжьэу фэхъугъэр. Анахьэу анаIэ зытырадзагъэр приемым иконтрольнэ цифрэхэр ипхъухьанхэр ыкIи целевой егъэджэным хэхъоныгъэхэр егъэшIыгъэнхэр ары. УпчIэм зытегущыIэхэм ыуж унашъо ашIыгъ гъэсэныгъэ организациехэмрэ медицинскэ ыкIи фармацевтическэ гъэсэныгъэ учреждениехэмрэ япрограммэхэр зэтегъэфэгъэнхэр, Урысые Федерацием исубъектхэм ягъэцэкIэкIо хабзэ иорганхэр а Iофтхьабзэм къыхэгъэлэжьэгъэнхэр.

Повесткэм джащ фэдэу хагъэхьагъ медицинскэ кадрэхэу рамыгъэкъухэрэм япхыгъэ упчIэхэр, а гумэкIыгъор зэрэдагъэзыжьыщт шIыкIэр, специалистхэм ягъэхьазырынкIэ системэу щыIэр гъэкIэжьыгъэныр, нэужым IофшIапIэ ягъэгъотыгъэныр. Ащ фэдэ пшъэрылъхэр щагъэцакIэх Мыекъопэ къэралыгъо технологическэ университетым. ГущыIэм пае, университетыр дэлажьэ псауныгъэр къэухъумэгъэнымкIэ Адыгэ Республикэм и Министерствэ. Анахьэу анаIэ зытырадзэрэмэ ащыщ практикэ-ориентированнэ гъэсэныгъэр: Медицинскэ институтым истудентмэ стажировкэхэр ащакIух гражданскэ авиацием иклиническэ сымэджэщ Гупчэ (ЦКБ ГА), НИИ неотложнэ кIэлэцIыкIу хирургием ыкIи травматологием (докторэу Л.М. Рошалым и Клиникэ), НИИ IэпыIэгъу псынкIэу Н.В. Склифосовскэм ыцIэ зыхьырэм ыкIи НМИЦ нейрохирургиеу академикэу Н.Н. Бурденкэм ыцIэ зыхьырэм, Медицинскэ гупчэу Григор Лусаворич ыцIэ зыхьырэр (къ. Ереван). МКъТУ-м и Политехническэ колледж хэтэу Iоф ешIэ медицинскэ кластерэу «ПрофиМедым», ар гурыт звеном щылэжьэщт специалистхэм ягъэхьазырын дэлажьэ. Ащ дакIоу университетым материальнэ-техническэ базэу иIэр щагъэкIэжьы, непэрэ уахътэм диштэрэ егъэджэн Iэмэ-псымэхэр къащэфых. Ащ фэдэ IофшIэным ылъапсэр — зэпымыурэ системэу медицинскэ кадрэмэ адэлажьэрэр зэтегъэпсыхьэгъэныр ары, тапэкIэ Iоф зыдашIэщтхэу IофшIэпIэ чIыпIэ къязытыщтхэр къыхягъэхыгъэнхэр, сэнэхьатым яцыхьэ телъэу хэхьанхэмкIэ специалист ныбжьыкIэхэм адэIэпыIэх, псауныгъэм икъэухъумэн фэгъэзэгъэ учреждениехэм ящыкIэгъэ Iазэхэр арагъэгъотых.

Шъхьафэу зытегущыIагъэхэм ащыщ упчIэу студентхэм япсауныгъэ лъыплъэгъэным фэгъэхьыгъэр, физическэ культурэмрэ спортымрэ хэхъоныгъэ ягъэшIыгъэныр, джащ фэдэу творческэ ыкIи профессиональнэ мероприятиехэр зэхэщэгъэнхэр, ахэмэ медицинскэ апшъэрэ еджапIэмэ ащеджэхэрэр ахэгъэлэжьэгъэнхэр.

Зэхэсыгъом къыдыхэлъытагъэу Ассоциацием Iофэу ышIагъэм 2025-2026-рэ еджэгъу илъэсым зэфэхьысыжьхэр фашIыгъэх ыкIи 2026-2027–рэ еджэгъу илъэсым Iоф зэрашIэщт планым хэплъагъэх.

Ректорхэм я Совет МКъТУ-м иIэшъхьэтетхэр зэрэхэлэжьагъэхэм амал къеты медицинэ гъэсэныгъэм ылъэныкъокIэ къэуцурэ пшъэрылъхэр федеральнэ лъэгапIэм нэсэу зэшIуахышъуныр, урысые повесткэм елъытыгъэу университетым хэхъоныгъэ егъэшIыгъэныр. Гъэсэныгъэ программэхэр тапэкIэ нахь гъэкIэжьыгъэнхэмкIэ упчIэу зыхэплъагъэхэм яшIуагъэ къэкIощт, студентхэм япрактическэ ухьазырыныгъэу агъэцакIэрэ Iофым нахь зырагъэушъомбгъун алъэкIыщт, Адыгэ Республикэм псауныгъэм икъэухъумэн ылъэныкъокIэ кадрэу зэригъэгъотыхэрэм къахэхъощт.