Мыекъопэ къэралыгъо технологическэ университетым методическэ семинарэу щыкIуагъэр проектнэ IофшIэныр 2026-2027-рэ еджэгъу илъэсым зэрэщызэхэщэгъэщтым фэгъэхьыгъагъ. ЗэIукIэгъум нэбгыри 100 хэлэжьагъ — социальнэ проектхэм афэгъэзэгъэ кIэлэегъэджэ-гъэсакIохэр, МКъТУ-м иструктурнэ подразделениехэм япащэхэр. IофшIэным пэIудзыгъэ шIыкIэр дыхэтэу къыхэлэжьагъ МКъТУ-м икъутамэу поселкэу Яблоновскэм щыIэр.

Семинарыр егъэджэн IофшIэнымкIэ проректорэу Людмила Задорожнаям къызэIуихыгъ. Ащ анахь Iофыгъо шъхьаIэхэу социальнэ проектированием иIэхэм ыкIи университетыр социальнэ заказчикэу зэрэщытым къыхэкIэу зэрыт чIыпIэр къыхигъэщыгъэх. Ащ фэдэ екIолIакIэм ишIуагъэкIэ студентмэ ягукъэкIхэмкIэ гъэнэфэгъэ пшъэрылъхэр зэшIуахынхэ алъэкIы, университетым изытет нахьышIу ашIы.

Семинарым хэлэжьагъэмэ социальнэ проектэу ящыкIэгъэщтхэр къаугупшысыгъэх ыкIи зэхагъэуцуагъэх. Информационнэ щынэгъончъэнымкIэ ыкIи прикладной информатикэмкIэ кафедрэм икIэлэегъаджэу Валерий Немыкиным амалэу платформэу DataLib иIэхэр къыгъэлъэгъуагъэх ыкIи ащ Iоф зэрэдэпшIэщт алгоритмэри къытыгъ. Проектнэ офисэу «Къулыкъу ахьызэ егъэджэгъэнхэр» зыфиIорэм иIофышIэхэу КIыржьын Светланэрэ Надежда Продиблохрэ программэм къытегущыIагъэх, ащ ишапхъэхэм ыкIи шIыкIэ-амалэу IэкIэлъхэм ягугъу къашIыгъ, джащ фэдэу къагъэлъэгъуагъ платформэу «Добро.рф» узэрэдэлэжьэщтыр, гъусэгъумэ алъыхъугъэх, гуфакIохэр къыращэлIагъэх.

Практическэ Iахьыр студенческэ гукъэкIхэмкIэ лъагъэкIотагъ. Лусинэ Аветисян ыкIи Мата Назирова, Иныхъу Изабэлла ыкIи Къушъхьэ Динарэ МКъТУ-м гъэхъагъэхэр щызышIыгъэхэ проектхэу «Къулыкъу ахьызэ егъэджэгъэнхэр» зыфиIорэм къыдыхэлъытагъэхэу агъэхьазырыгъэхэм къатегущыIагъэх. Щысэхэр къахьыхэзэ семинарым щызэIукIагъэхэр зэфэхьысыжьхэмкIэ зэдэгощагъэх.

Проектнэ офисэу «Къулыкъу ахьызэ егъэджэгъэнхэр» зыфиIорэм ипащэу Болэкъо Мариэттэ зэнэкъокъумэ ахагъэлэжьэрэ социальнэ проектхэм нэIуасэ афишIыгъэх, заявкэхэр къызэрэхахырэ шIыкIэм, ахэр зэрагъэхьазырхэрэм щигъэгъозагъэх ыкIи хэукъоныгъэу хашIыхьэхэрэмэ анаIэ тыраригъэдзагъ.

Семинарыр практическэ хъугъэ-шIагъэхэм ящысэхэмкIэ зэфашIыжьыгъ, опытхэмкIэ зэхъожьыгъэх. Студенческэ проектмэ къахэкIырэ гумэкIыгъохэм ядэгъэзыжьыни Iоф дашIагъ, методическэ материалхэу тапэкIэ зыдэлэжьэщтхэр агъотыгъэх.

МКъТУ-м ипроектнэ культурэ хэхъоныгъэхэр егъэшIыгъэнхэм семинарыр фытегъэпсыхьагъ, джащ фэдэу кIэлэегъэджэ-гъэсакIомэ яIофшIэн нахьышIу шIыгъэным. ШIэныгъэу семинарым щызэрагъэгъотыгъэмэ яшIуагъэкIэ студенческэ гукъэкIхэр щыIэныгъэм щыпхыращыщтых, университетымрэ обществэмрэ ящыкIэгъэ лъэныкъохэр къыдалъытэщтых.