Мыекъопэ къэралыгъо технологическэ университетым я III-рэ Адыгэ республикэ онкологическэ форумэу «Непэрэ уахътэм диштэрэ онкологиер ыкIи гематологиер. Шъолъырым игъэхъагъэхэр ыкIи игумэкIыгъохэр» зыфиIорэр щыкIуагъ. Iофтхьабзэм Адыгеим, Москва, Санкт-Петербург ыкIи Краснодар ащыщ врачхэмрэ научнэ специалистхэмрэ зэрипхыгъэх. МКъТУ-м хэхьэрэ Медицинскэ институтым икIэлэегъаджэхэмрэ истудентхэмрэ джащ фэдэу форумым хэлэжьагъэх.

Форумым ипрограммэ къыщыхагъэщыгъэх непэрэ уахътэм диштэрэ екIолIакIэхэу уз Iаеу къыхагъэщырэм рахьылIэхэрэр, пэшIорыгъэшъэу ар къыхэгъэщыгъэным пае ашIэрэр, инновационнэ препаратхэу рахьылIэхэрэр ыкIи сымаджэмэ ящыIэкIэ-псэукIэ изыкъегъэIэтыжьын зэрэдэлажьэхэрэр. Экспертхэр ахэплъагъэх адэбзым итерапиекIэ стратегиеу щыIэм, ар къызщыхагъэщыгъэ чIыпIэм елъытыгъэу, анахь хьылъэм къыщыублагъэу анахь псынкIэм нэсыжьэу, ар ящынэгъончъагъэ къыдыхэлъытагъэу зэрагъэхъужьыщт шIыкIэу къыхахыхэрэм.

АнаIэ зытырадзагъэхэм ащыщ клиническэ хьылъэу къахэкIыгъэхэр ары, ахэмэ ащыщых бэрэ амыгъэунэфырэ адэбз узым еIазэхэ зыхъурэм. Диагностикэм епхыгъэ хэушъхьафыкIыгъэ лъэныкъохэм специалистхэр атегущыIагъэх, ушэтынхэм къагъэлъэгъуагъэхэм, узым игъэхъужьын шапхъэу къыхахыхэрэм, практическэ лъэныкъогъазэу программэм къыдыхэлъытэгъэ Iахьымэ язэхэфын къакIэлъыкIуагъ мафэ къэс врачхэр зэуалIэхэрэ Iофхэр.

Форумыр зезыщагъэхэм ащыщыгъэр — Адыгэ республикэ клиническэ онкологическэ диспансерэу М.Х. Ашъхьэмафэм ыцIэ зыхьырэм иврач шъхьаIэу, медицинэ шIэныгъэхэмкIэ кандидатэу, МКъТУ-м хэхьэрэ Медицинскэ институтым госпитальнэ хирургиемкIэ ыкIи дипломнэ ужым игъэсэныгъэкIэ икафедрэ идоцентэу АкIэгъу Заур. Ащ докладэу къышIыгъэм къыщыриIотыкIыгъ сымаджэхэм ятерапие щынэгъончъэнымрэ шIуагъэ къытэу зэряIазэхэмрэ зэтебгъэфэным ямэхьанэ.

Гематологием епхыгъэ упчIэхэм язэхэфын хэлэжьагъ Адыгэ Республикэм псауныгъэр къэухъумэгъэнымкIэ и Министерствэ штатым хэмыт испециалист шъхьаIэу, медицинэ гематологием и гупчэ ипащэу Лягъуф Заринэ. Ащ идоклад непэрэ уахътэм терапие екIолIакIэу миеломэ пчъагъэхэм къафагъотырэр ары.

Форумым къыхэлэжьагъэх джащ фэдэу онкологием и Лъэпкъ медицинэ ушэтэкIо гупчэу Н.Н. Петровым ыцIэ зыхьырэм, московскэ ыкIи краснодарскэ медицинскэ учреждениехэм яспециалистхэр. Ахэмэ псалъэу къашIыгъэхэм зэфэшъхьаф медицинэ гупчэхэм яопыт къащыраIотыкIыгъ, джащ фэдэу онкологием ылъэныкъокIэ IэпыIэгъоу щыIэхэм ахагъэплъагъэх.

Форумыр IэпэIэсэныгъэ зиIэхэм язэдэгущыIэгъу площадкэу хъугъэ, ащ клиническэ опытымкIэ щызэхъожьыгъэх, узыр зэрагъэхъужьыщт шIыкIэ-амалыкIэхэр къыхахыгъэх. Научнэ екIолIакIэхэр къыхагъэщынхэмкIэ, практическэхэмрэ научнэ ушэтынхэмрэ зэгъусэнхэмкIэ, онкологическэ ыкIи гематологическэ узхэр къызэузыгъэхэм нахьышIоу IэпыIэгъоу арагъэкIынымкIэ ащ фэдэ зэхахьэмэ яшIуагъэ къэкIощт.