УФ-м и Президент дэжь щыIэ Советэу къэралыгъо демографием ыкIи унэгъо политикэм игъэцэкIэн дэлажьэрэм цIыфхэм ярепродуктивнэ псауныгъэ икъэухъумэн иIофшIэгъу куп зыхэлэжьарэм иапэрэ зэхэсыгъо Москва щыкIуагъ.

Мыекъопэ къэралыгъо технологическэ университетым акушерствэм ыкIи гинекологием икафедрэ ипащэу, медицинэ шIэныгъэхэмкIэ докторэу Виктория Попандопуло ащ хэлэжьагъ.

Зэхэсыгъом иапэрэ едзыгъо IофшIэгъу купым 2028-рэ илъэсым нэс зыдэлэжьэщтхэ лъэныкъо шъхьаIэхэр ыгъэнэфагъэх. Ахэмэ ащыщых пэшIорыгъэшъэу узыр къыхэгъэщыгъэныр, медицинэ IэпыIэгъур ягъэкIыгъэныр, псауныгъэм икъэухъумэнкIэ корпоративнэ программэхэм хэхъоныгъэхэр ягъэшIыгъэнхэр, джащ фэдэу 2026-рэ илъэсым ыкIэ нэс УФ-м и Президент дэжь щыIэ Советым зыщытегущыIэщтхэр. Зэхэсыгъор зэрищагъ IофшIэгъу купым пшъэдэкIыжь зыхьырэ исекретарэу, экспертнэ гупчэу «IофышIэ Урысыер» зыфиIорэм демографическэ политикэмкIэ ыкIи репродуктивнэ псауныгъэмкIэ ипащэу Кирилл Литовченкэм.

IофшIэгъу купым медицинскэ ыкIи научнэ сообществэм, къэралыгъо хабзэм иорганхэм ыкIи профильнэ организациехэу хэгъэгум ишъолъырхэм арытхэм ялIыкIохэр зэрипхыгъэх. Ащ иIофшIэн фытегъэпсыхьагъ зы практическэ шIыкIэ гъэнэфагъэ къыхэхыгъэным, цIыфхэм ярепродуктивнэ псауныгъэ икъэухъумэн, медицинэ IэпыIэгъур зэкIэхэми агъотыным фэIорышIэгъэным, профилактическэ Iофтхьабзэхэр гъэкIэжьыгъэнхэм. МКъТУ-р къэзыгъэлъэгъогъэ Виктория Попандопуло IофшIэгъу купым зэрэхэтым дакIоу, ар Урысые Федерацием псауныгъэр къэухъумэгъэнымкIэ и Министерствэ акушерствэмкIэ ыкIи гинекологиемкIэ штатым хэмыт специалист шъхьаIэу Къыблэ федеральнэ шъолъырым щыI ыкIи Урысые Федерацием псауныгъэр къэухъумэгъэнымкIэ и Министерствэ бзылъфыгъэхэм ярепродуктивнэ псауныгъэ икъэухъумэнкIэ Къыблэ федеральнэ шъолъырым щыфэгъэзэгъэ штатым хэмыт испециалист шъхьаI.

Темэ гупчэу къаIэтыгъэхэм ащыщ медицинэ IэпыIэгъум ипрофилактическэ лъэныкъо хэхъоныгъэхэр егъэшIыгъэнхэр, диспансеризацием имэхьанэ къэIэтыгъэныр. ЦIыфхэм япсауныгъэ уплъэкIугъэным епхыгъэ Iофтхьабзэхэм зягъэушъомбгъугъэным, диагностикэм фэгъэхьыгъэ мобильнэ шапхъэхэр хэгъэхьэгъэнхэр ыкIи сымаджэхэр агъэхъужьыхэфэ нэс алъыплъэгъэным афэгъэхьыгъэ амалэу щыIэхэм ахэплъагъэх.

Анахьэу анаIэ зытырадзагъэр IофшIапIэмэ ащылажьэрэмэ япсауныгъэ пащэхэр зэралъыплъэхэрэр ары. Предприятиехэм ащылажьэхэрэмэ япсауныгъэ IофшIэпIэ чIыпIэм ащауплъэкIунхэр е къапэблэгъэ медицинскэ учреждениехэм а Iофыгъор ащызэшIуахыныр нахь тэрэзэу алъытагъ.

Зэхэсыгъом къыщаIэтыгъэ упчIэмэ ащыщых кIэлэцIыкIухэм, ныбжьыкIэхэм япсауныгъэ икъэухъумэн, кIэлэцIыкIухэмрэ нахьыжъхэмрэ афэсакъыгъэнымкIэ зэпхыныгъэу ыкIи зэкIэлъыкIуакIэу щыIэр, медицинэ гъэсэныгъэм зегъэушъомбгъугъэныр, нэмыкIхэр.

Зэхэсыгъом зэфэхьысыжьэу щашIыгъэм елъытыгъэу IофшIэгъу купым игукъэкIхэмрэ къыхигъэщыгъэ гумэкIыгъохэм ядэгъэзыжьын фэгъэхьыгъэ предложениехэмрэ чъэпыогъум и 26-м нэс программэм ипроект хагъэхъожьынхэу агъахьыщтых. КъаIэкIэхьэрэ предложениехэр лъапсэ афэхъущтых тапэкIэ экспертхэр зыдэлэжьэщтхэ Iофтхьабзэхэм, УФ-м и Президент дэжь щыIэ Советым изэхэсыгъо халъхьащтхэр ахэмэ къахахыщтых.

Мыекъопэ къэралыгъо технологическэ университетым акушерствэм ыкIи гинекологием икафедрэ ипащэу, медицинэ шIэныгъэхэмкIэ докторэу Виктория Попандопуло федеральнэ шапхъэ зиIэ IофшIэгъу купым зэрэхагъэхьагъэм ишIуагъэкIэ университетым илIыкIохэр медицинэ наукэм ыкIи практическэ лъэныкъом ахэлэжьэнхэ алъэкIыщт, яупчIэхэр къащаIэтышъущтых. МКъТУ-м хэхьэрэ Медицинскэ институтымкIэ хэгъэгум испециалист пэрытмэ адэлэжьэнхэ амал зэрагъотыгъэм мэхьанэшхо иI научнэ-гъэсэныгъэ IофшIэнымкIи, неущрэ врачхэм ягъэхьазырынкIи, джащ фэдэу медицинэ сообществэм зэпхыныгъэу дыряIэр гъэпытэгъэнымкIи.