МКъТУ-м икъутамэу поселкэу Яблоновскэм дэт Политехническэ колледжым истуденткэу Алиса Коноваловар ныбжьыкIэхэм азыфагукIэ дронхэм язэпэгъэчъэнымкIэ Урысые зэнэкъокъум щытекIуагъ.

Дронхэм язэпэгъэчъэнымкIэ Урысые зэнэкъокъур ныбжьыкIэхэмкIэ апэрэу хэгъэгум икъэлэ шъхьаIэ щызэхащэ. Шъолъырыбэхэм ащыщ анахь лъэшхэу FPV-дронхэм япилотхэр ыугъоигъэх.

Лъэпкъ зэнэкъокъухэм якIурэ гъогур финальнэхэм анахьыжьыIоу щыIэ хъугъагъэ. Илъэсым къыкIоцI зэнэкъокъухэм ахэлэжьэнхэмкIэ фитыныгъэ къыдахыным спортсмен 600-м ехъу фэбэнагъэх, ахэр хэгъэгум ишъолъыр 32-мэ ащыщыгъэх, апэрэ едзыгъомэ апхырыкIыгъэхэр ахэмэ ащытекIуагъэхэр ары.

ТекIоныгъэ къыдэзыхыгъэмэ ахэфагъ МКъТУ-м икъутамэ колледжым истуденткэу Алиса Коноваловар. Краснодар краим икомандэ хэтэу ыкIи Кристина Коваль игъусэу ащ апэрэ чIыпIэр къыщыдихыгъ дисциплинэу «200 класс — команднэ зачёт» зыфиIорэм, ащ тетэу IэпэIэсэныгъэшхо пилот зэрымыс аппаратхэм ягъэIорышIэнкIэ зэрэхэлъыр къыгъэлъэгъуагъ.

Дронмэ язэпэчъэн — хэхъоныгъэ зышIырэ технологическэ лъэныкъу, ащ спортивнэ IэпэIэсэныгъэмрэ инженернэ шIэныгъэхэмрэ щызэголъых. Джащ фэдэу пилот зэрымыс аппаратхэм ягъэIорышIэнкIэ практическэ амалэу аIэкIэлъхэм якъэгъэлъэгъонрэ къыделъытэх. Мыщ зэфэхьысыжьэу фэхъугъэхэр яIэубытыпIэу Урысыем илъэпкъ сборнэу 2027-рэ илъэсым изэнэкъокъухэм ахэлэжьэщтыр зэхащэщт.

Алиса Коноваловам итекIоныгъэ — МКъТУ-м иколледжкIэ гъэхъэгъэ инэу щыт, университетскэ сообществэр зэрыгушхорэ Iофыгъу. Ащ гъэхъагъэу ышIыгъэм къегъэлъагъо непэрэ технологиехэм ишъыпкъэу зэрапылъыр, ыгу зэретыгъэр, мафэ къэс практикэм зызэрэщиушэтырэр. ТыфэгушIо Алисэ дышъэ медалыр Урысыем и Первенствэ къызэрэщыдихыгъэм фэшI ыкIи тапэкIэ джыри текIоныгъабэхэр къыдэхъунхэу тыфэлъаIо!