Мыекъопэ къэралыгъо технологическэ университетым рабочэ зэIукIэгъу щыдыряIагъ медицинэ шIэныгъэхэмкIэ докторэу, Урысые ушэтэкIо медицинскэ университетэу Н.И. Пироговым ыцIэ зыхьырэм кIэлэцIыкIу хирургиемкIэ икафедрэ ипрофессорэу, кIэлэцIыкIу къэлэ клиническэ сымэджэщэу Н.Ф. Филатовым ыцIэ зыхьырэм врачэу щылажьэрэ Цундэкъо Мадинэ.

Темэ шъхьаIэу зэдэгущыIэгъум иIагъэр кIэлэцIыкIу хирургием икафедрэ МКъТУ-м хэхьэрэ Медицинскэ институтым ипедиатричесэ факультет къыщызэIухыгъэныр ары, джащ фэдэу гъэсэныгъэ ыкIи научнэ-практическэ зэдэлэжьэныгъэм хэхъоныгъэхэр егъэшIыгъэнхэр, специалист пэрытхэр а Iофым къещэлIэгъэнхэр.

ЗэхэгущыIэжьыгъэхэмэ анахьэу анаIэ зытырадзагъэр гъэсэныгъэ процессым изэхэщэн, неущырэ врачхэм ягъэхьазырын пылъ методикэм игъэкIэжьын, практическэ опытэу агъотырэм изегъэушъомбгъун. ГущыIэм пае, студентмэ стажировкэхэр профильнэ медицинэ организациехэм ащягъэкIугъэнхэм ахэплъагъэх. Ащ фэдэхэр игъорыгъоу университетым регъэкIокIых, джыри тапэкIэ зэхищэнхэ пшъэрылъ зыфегъэуцужьы.

Къырагъэблэгъэгъэ экспертэу Мадина Арсен ыпхъум илъэсыбэ опытэу иIэр клиническэ, научнэ ыкIи кIэлэегъэджэ IофшIэнхэм япхыгъэу щыт. Ар апшъэрэ квалификационнэ категорие зиIэ врач, кIэлэцIыкIу хирургхэм я Урысые ассоциацие хэт, илъэс 30-м ехъурэ лажьэрэ специалист.

Мадина Арсен ыпхъум научнэ IофшIэнышхо егъэцакIэ. Ар авторэу ыкIи адитхыгъэу научнэ IофшIэгъи 100-м ехъу къыхиутыгъэх, Лъэпкъ пэщэныгъэу «Детская хирургия», атласхэу «Гнойно-воспалительные заболевания мягких тканей и костей у детей» ыкIи «Хирургия живота и промежности в клинических примерах» зыфиIохэрэр, джащ фэдэу методическэ пособиехэу студентмэ ыкIи ординатормэ афэгъэхьыгъэхэр.

КIэлэцIыкIу хирургием икафедрэ МКъТУ-м хэхьэрэ Медицинскэ институтым ипедиатричесэ факультет къыщызэIухыгъэныр зы лъэубэкъу шIагъоу Адыгэ Республикэм имедицинэ гъэсэныгъэмкIэ хъущт. Анахьэу мэхьанэ зиIэр кадрэхэмкIэ псауныгъэм икъэухъумэн системэ зэрэзэтырагъэпсыхьащтыр ары. КIэлэцIыкIу хирургиемкIэ ыкIи фэшъхьаф медицинэ лъэныкъохэмкIэ кадрэхэр зэрагъэхьазырыщтхэм яшIуагъэкIэ, Адыгэ Республикэм имедицинэ учреждениехэр специалистхэмкIэ гъэпытэгъэщтых. Пэрытныгъэ зиIэ медицинскэ университетхэу ыкIи клиникэхэу хэгъэгум итхэм зэдэлэжьэныгъэу адытиIэм ишIуагъэкIэ профессиональнэ хэхъоныгъэу тшIырэм амалыкIэхэр къытфызэIуихыщтых, стажировкэхэр студентмэ ахьышъущтых, медицинэ наукэм иаужырэ гъэхъагъэхэм нэIуасэ афэхъушъущтых.