МКъТУ-м икъутамэу поселкэу Яблоновскэм щыIэм истудентмэ япроект урысые энергетическэ тхьэмафэр — 2026-у Москва щыкIуагъэм къыщагъэлъэгъуагъ. Командэр Дунэе инженернэ чемпионатэу CASE-IN зыфиIорэм хэлэжьагъ, ащ проектэу «Энергоэффективная очистка нефтепродуктов озоном» зыфиIорэм ышъхьэ къыщырихыгъ.

IофшIэныр лъэныкъоу «Энергиер ухъумэгъэныр ыкIи энергетикэм шIуагъэу къытырэм производствэм иедзыгъо пэпчъ  зыкъыщегъэIэтыгъэныр» зыфиIорэмкIэ къагъэлъэгъуагъэ хъугъэ. Командэр зыгъэхьазырыгъэр чIыдэгъэ IофымкIэ ыкIи чIыгу гъэпсынымкIэ кафедрэм идоцентэу Дмитрий Бебко. Командэм хэхьагъэх: Кирилл Цветной, Валерия Лебедева, Абраам Чтчян и Николетта Мандрила.

Проектым иухъумэн зэкIэмкIи такъикъих фатIупщыщтыгъэр: такъикъищыр лъэтегъэуцом пае, джыри такъикъищ экспертнэ комиссием хэтмэ яупчIэмэ джэуап къаратыжьынэу. Студентмэ япшъэрылъхэр дэгъоу зэшIуахыгъэх ыкIи экспертмэ яосэшIухэр къалэжьыгъэх. Зэфэхьысыжьэу фэхъугъэм елъытыгъэу командэм хэтмэ сертификатхэр къаратыгъэх ыкIи  топливнэ-энергетическэ комплексым пае агъэхьазырыщт проектхэмкIэ ашIэн фаехэр къафаIотагъэх. КIэлакIэмэ джащ фэдэу  технологическэ оборудованиехэу чIыдагъэ промышленносым фытегъэпсыхьагъэмэ якъэгъэлъэгъон зыщагъэгъозагъ. Предприятиемэ ялIыкIомэ нэIуасэ афэхъугъэх, зэдэгущыIэгъухэр адашIыгъэх.

Урысые энергетическэ тхьэмафэр ябгъонэрэу рагъэкIокIыгъ, ащ девизэу иIагъэр: «энергоресурсмэ къащыублагъэу неущрэ мафэм итехнологиехэм анэсыжьэу». Форумым хэгъэгу 85-мэ ащыщ нэбгырэ  6 600-рэ зэрипхыгъ,  СМИ-м иIофышIэхэри ахэмэ ахэтыгъэх. IофшIэгъу программэм хэтыгъэх Iофтхьабзэ 40-м ехъоу лъэныкъуиблымэ ателъытагъэхэр: чIыдагъэмрэ газымрэ ябэдзэр хэхъоныгъэхэр егъэшIыгъэнхэм къащыублагъэу энергетикакIэм, экологием анэсыжьэу, джащ фэдэу энергетикэу шIуагъэ къэзытыщтымрэ кадрэмэ ягъэхьазырынрэ къыдалъытагъэх.  

Шъхьафэу ныбжьыкIэ программэм анаIэ тырадзагъ: ащ къыдыхэлъытагъэу кIэлэеджэкIо 2 000, студентхэр ыкIи Урысыем, СНГ-м ыкIи БРИКС-м яхэгъэгухэм яныбжьыкIэ экспертхэр форумым хэлэжьагъэх. Хъугъэ-шIагъэмэ ащыщыгъ Урысые энергетическэ тхьэмафэм и Кубок ыкIи Дунэе инженернэ чемпионатэу CASE-IN  зыфиIорэр. Ахэмэ компание ыкIи организацие 36-мэ къагъэлъэгъогъэ командэ 31-рэ щызэнэкъокъугъэх.  

Тистудентхэм дэгъоу форумым зэрэхэлэжьагъэхэмкIэ тафэгушIо! ТапэкIэ джыри профессиональнэ гъэхъагъэхэр ашIынхэу тафэлъаIо!