Фэшъхьаф хэгъэгу ущеджэным практическэ Iофыгъуабэ къыпэкIы: фитыныгъэ статусыр зэрэбгъэнэфэщтыр, IофшIэпIэ чIыпIэ улъэхъумэ, узэкIолIэщтыр, къэралыгъо программэхэу узхэлэжьэн плъэкIыщтхэр, нэмыкIхэр. Лъэпкъ IофхэмкIэ Адыгэ Республикэм и Комитет илIыкIохэм адашIыгъэ зэдэгущыIэгъур мы темэхэм афэгъэхьыгъагъ.

ЗэIукIэм хэлэжьагъэх: лъэпкъ IофхэмкIэ, тихэгъогогъухэм адытиIэ зэпхыныгъэхэмкIэ ыкIи къэбар жъугъэм иамалхэмкIэ Адыгэ Республикэм и Комитет итхьаматэу Долэ Долэт; миграцие IофхэмкIэ МВД-м и ГъэIорышIапIэу АР-м щыIэм ипащэ игуадзэу, Урысые Федерацием игражданхэм адэлэжьэгъэнымкIэ отделым ипащэу ХьацIэцIэ Рустам; РВП ыкIи ВНЖ IофхэмкIэ отделым ипащэу Ирина Ананьевар; гражданствэ IофхэмкIэ отделым ипащэ игуадзэу Аурелия Глушковар; цIыфхэм IофшIэн ягъэгъотыгъэнымкIэ Адыгэ республикэ гупчэм ипащэу Вэрэкъо Адам.

КъэгущыIагъэмэ къыхагъэщыгъ, гъэсэныгъэ зэрагъотыщтыр яушъхьагъоу пIэлъэ гъэнэфагъэкIэ хэгъэгум ущыпсэуным пае фитыныгъэ къызэратырэм пылъ Iофхэр, Адыгэ Республикэм икъэралыгъо программэ узэрэхагъэуцорэ шIыкIэр, ащ пае ищыкIэгъэ документхэр къыраIотыкIыгъэх. Шъхьафэу IэкIыб гражданхэм IофшIэн ягъэгъотыгъэным фэгъэхьыгъэ Iофым тегущыIагъэх.

Терроризмэмрэ экстремизмэмрэ япрофилактикэ мэхьанэ зиIэ темэу зэхэсыгъом щытегущыIагъэх. Экстремизмэм пэшIуекIогъэнымкIэ Гупчэм иоперуполномоченнэ шъхьаIэу, полицием икапитанэу Хъут Эдуард профилактическэ IофшIэным шIогъэшхо къызэритырэр, ащ мэхьэнэ ин зэриIэр къыIотагъ.

Студентмэ упчIабэ зытегущыIэхэрэ IофыгъохэмкIэ атыгъэх ыкIи джэуапэгъу къафэхъугъэх, специалистмэ нахь шIыкIэ тэрэзхэр къаIотагъэх. Зэхэсыгъом ыпкъ къикIэу, ащ хэлэжьэгъэ студентмэ къэралыгъо IэпыIэгъоу щыIэхэм ащыгъозагъэх, общественнэ щынэгъончъэнымкIэ къэбархэри къаIэкIэхьагъэх.