Мыекъопэ къэралыгъо технологическэ университетым сэнаущыгъэ зыхэлъ ныбжьыкIэмэ апае урысые зэнэкъокъухэр зэхэзыщэрэ статусыр джыри зэ къыгъэшъыпкъэжьыгъ. МКъТУ-м зэхищэрэ зэнэкъокъуищыр гъэсэныгъэмкIэ УФ-м и Министерствэ иунашъокIэ  2026-2027-рэ илъэс еджэгъум иIофтхьабзэхэм ахагъэхьагъэх.

Федеральнэ Iофтхьабзэмэ ахэр зэрэхагъэхьагъэхэм яшIуагъэкIэ, сэнаущыгъэ зыхэлъ кIэлэеджакIохэр ыкIи ныбжьыкIэхэр къыхэгъэщыгъэнхэмкIэ, ушэтыныкIэхэр шIыгъэнхэмкIэ, творческэ ыкIи профессиональнэ шIоигъоныгъэхэр гъэцэкIэгъэнхэмкIэ амалыкIэхэр щыIэхэ хъугъэ. Университетым изэнэкъокъухэм лъэныкъуабэхэр зэлъаубытых — цифрэ технологиехэм ыкIи медиахэм къащыублагъэу мэкъу-мэщым, инженерием ыкIи медицинэм анэсыжьыхэу.

Урысыем и Минпросвещение иперечень МКъТУ-м изэнэкъокъуищэу хэхьагъэхэр лъэныкъоу «Наукэр ыкIи гъэсэныгъэр» зыфиIорэмрэ я IV-рэ шапхъэмрэ адештэх.

НыбжьыкIэ проектхэм я Урысые зэнэкъокъоу «Уигухэлъ факIу!»

Зэнэкъокъум зэрепхых гукъэкIышхохэр зиIэ ныбжьыкIэхэу проектыкIэхэр къэзгъэлъэгъонхэ зылъэкIыщтхэр, зиунэе гукъэкIхэр практикэмкIэ зыушэтышъухэрэр. Хэлажьэхэрэмэ ИТ ыкIи цифрэ технологиехэмкIэ, медиа, гуфакIо, предпринимательствэм ыкIи зэтегъэпсыхьэгъэным алъэныкъокIэ проектхэр къатынхэ фае. Iофтхьабзэр фытегъэпсыхьагъ команднэ IофшIэным хэхъоныгъэ егъэшIыгъэным, творческэ амалхэм зягъэушъомбгъугъэным, пэрытныгъэм фэгъэсэгъэнхэм. Зэнэкъокъум ипащэр — Светлана Новиковар ары.

Студенческэ гукъэкIхэу ыкIи проектхэу АПК «Аграрий» зыфиIорэм фэгъэхьыгъэу зэхащэрэ Урысые зэнэкъокъур

Зэнэкъокъум хэлажьэх ушэтынхэр зышIыхэрэ ныбжьыкIэхэу агропромышленнэ комплексым хэхъоныгъэхэр егъэшIыгъэнхэм ыуж итхэр. А лъэныкъом хэхьэх агрономиер ыкIи агроинженериер, зоотехниер ыкIи ветеринариер, инновационнэ технологиехэу АПК-м къыхиубытэхэрэр, джащ фэдэу мэкъу-мэщ продукцием иухъумэнрэ икъыдэгъэкIыжьынрэ. Зэнэкъокъум хэлажьэрэмэ яунаеу зэхагъэуцуагъэхэр къагъэлъагъох, мэкъу-мэщ отраслым къышъхьэпэнэу щыт шIыкIэхэр къатых. Зэнэкъокъум ипащэр — Мамсыр Нурбый.

КIэлэеджэкIо проектхэм я Урысые зэнэкъокъу

Iофтхьабзэм кIэлэеджакIохэм амал къареты ушэтын IофхэмкIэ ыкIи проектнэ IофшIэнымкIэ яшIэныгъэхэр ауплъэкIунхэу, наукэм ыкIи сэнэхьатэу къыхахыгъэм алъэныкъокIэ апэрэ лъэубэкъухэр адзынхэу. Зэнэкъокъум профильнэ лъэныкъуитф зэлъеубыты: инженернэр, информационнэ-техническэр, медикэ-фармацевтическэр, социальнэ-экономическэр ыкIи химикэ-биологическэр. Зэнэкъокъум ипащэр — Татьяна Дёмина.

Гъэ къэс зэнэкъокъухэм яIофтхьабзэхэр гъэсэныгъэмкIэ Урысыем и Министерствэ егъэнафэх, ащ къыхэлажьэх Лъэпкъ координационнэ советым иэкспертнэ купэу Урысыем иныбжьыкIэхэу сэнаущыгъэ зыхэлъхэм адэIэпыIэрэр. Ащ фэдэ зэнэкъокъухэм текIоныгъэ къащызыхьыхэрэр къэралыгъо информационнэ ресурсэу гъэхъагъэ зышIыгъэ сабыхэм афэгъэхьыгъэм дагъахьэх.

КIэлэеджакIохэмрэ студентхэмрэ мыщ фэдэ зэнэкъокъухэм захэлажьэхэрэ нэужым яшIэныгъэхэр зыфэдэхэр къагурэIо, ушэтэкIо IофымкIэ ыкIи проектнэ IофшIэнхэмкIэ опыт дэгъухэр къаIэкIахьэх. КIэлэегъаджэхэм, гъэсакIохэм ыкIи ны-тыхэм федеральнэ шапхъэр яIэубытыпIэу еджэгъу илъэсыкIэр зыфэдэщтыр агъэнафэ.

Зэнэкъокъуищыри Урысыем и Минпросвещение иперечень зэрэхагъэхьагъэхэм къегъэлъагъо Мыекъопэ къэралыгъо технологическэ университетым ныбжьыкIэхэм янаучнэ ыкIи ятворческэ потенциал зегъэушъомбгъугъэнымкIэ площадкэ шIагъоу зэрэщытыр. Университетыр адэлажьэ гурыт еджапIэхэм, гурыт профессиональнэ гъэсэныгъэм иучреждениехэм, ушэтынхэм, инновациехэм ыкIи неущрэ сэнэхьатхэм апылъ ныбжьыкIэхэм адэIэпыIэ.