Компаниеу «Диасофтымрэ» Мыекъопэ къэралыгъо технологическэ университетымрэ зэрэзэдэлэжьэщтхэ зэзэгъыныгъэм зэдыкIэтхагъэх.

Фэдэ зэгъусэныгъэр зыфэгъэхьыгъэр ыкIи зыфытегъэпсыхьагъэр академическэ гъэсэныгъэмрэ индустриемрэ зэдагъэлэжьэнхэр, студентхэм яшIэныгъэм ыкIи яамалхэм ахагъэхъоныр, IэпэIэсэныгъэшхо зыхэлъ ИТ-специалистхэр гъэхьазырыгъэнхэр ары .

«ДиасофтымкIэ» ар занкIэу студентмэ япрофессиональнэ хэхъоныгъэ яIахь халъхьанымкIэ, сэнаущыгъэ зыхэлъ кадрэ купыр гъэхьазырыгъэнымкIэ, ахэр неущрэ проектхэу шъолъырым и HR-бренд компанием щагъэлъэлъэшынымкIэ амалышIу. УниверситетымкIэ — гъэсэныгъэ программэм икупкIэ къэубытыгъэнымкIэ, непэрэ уахътэм диштэрэ технологиехэр къыдэлъытэгъэнхэмкIэ зыфэдэ къэмыхъугъэ Iоф дэгъу.

Зэзэгъыныгъэм къыдыхэлъытагъэу бгъухэр лъэныкъо шъхьаIэхэм къащыуцущтых. «Диасофтым» иэкспертмэ профильнэ десэхэр студентмэ арагъахьынхэу егъэджэн программэм къыхагъэлэжьэщтых, джащ фэдэу практикэр ыкIи факультативнэ курсхэр арагъахьыщтых. Компаниер джащ фэдэу гъэсэныгъэ программэхэм язэхэгъэуцон ыкIи методическэ экспертизэм япхыгъэ IофшIэнхэм ахэлэжьэщт. Анахь мэхьанэ зиIэ Iофыгъоу мыщ хэтыщтыр стажировкэу студентмэ афызэхащэщтыр ары, еджакIо пэпчъ гъэсакIоу компанием иIофышIэ епхыгъэщт.

Зэдэлэжьэныгъэм ИТ-лъэныкъуабэ МКъТУ-м щызэлъиубытыщт: бакалавриатым ыкIи специалитетым лъэныкъоу «Информационнэ щынэгъончъагъэр» ыкIи «Щынэгъончъэным иинформационнэ-аналитическэ системэхэр» зыфиIорэм къащегъэжьагъэу магистерскэ программэу «Прикладной информатикэм» нэсыжьэу, ащ лъэныкъоу «Машинное обучение и технологии обработки больших данных» зыфиIорэр дыхэтэу.

— Информационнэ технологиехэр псынкIэу зэрэлъыкIуатэхэрэм къыхэкIэу кадрэхэм шIэныгъакIэхэр ядгъэгъотын фаеу мэхъу. Отраслыр IэпэIэсэныгъэшхо зыхэлъ специалистмэ ащымыкIэным фэшI, бизнесыр нахь чанэу гъэсэныгъэ процессым къыхэлэжьэнэу щыт. МКъТУ-м дэтшIыгъэ зэзэгъыныгъэм ишIуагъэкIэ экспертизэмкIэ тадэгощэн тэлъэкIы, IT-лъэныкъом щылэжьэщт ныбжьыкIэхэу сэнаущыгъэ зыхэлъхэр къыхэтэгъэщых, ащ фэдэ купхэр зэхэтэщэх. Технологическэ суверенитетыр къэзыгъэпсыщт инвестициехэу мы зэзэгъэныгъэр тэ тэлъытэ, тицыхьэ университетым телъэу тапэкIэ тылъэкIуатэ, — къыкIигъэтхъыгъ гъусэгъумэ адэлэжьэгъэнымкIэ пащэу, «Диасофтым» иправление хэтэу Александр Сахаровым.

Компаниеу «Диасофтымрэ» Мыекъопэ къэралыгъо технологическэ университетымрэ язэдэлэжьэныгъэ къэралыгъом истратегическэ пшъэрылъэу ИТ-бизнесымрэ апшъэрэ еджапIэхэмрэ зэпхыгъэнхэм афэгъэхьыгъэр егъэцакIэ. зэхэт IофшIэнэу кадрэхэм ягъэхьазырынкIэ зэшIуахырэм ишIуагъэкIэ Урысыем итехнологическэ суверенитет зыгъэпсырэмэ ащыщ мэхъух ыкIи хэгъэгум ицифрэ отраслэ хэхъоныгъэхэр рагъэшIых.