Научнэ конференцииплI, къэлищ ыкIи ежь ыушэтыгъэхэмкIэ лъэтегъэуцуитIу — джащ фэдэу Iоныгъо мазэм иятIонэрэ кIэлъэныкъо МКъТУ-м хэхьэрэ Медицинскэ институтым ипащэу, медицинэ шIэныгъэхэмкIэ кандидатэу Хъурэе Аслъанэ иIофшIэгъу уахътэ ушъэгъагъэ .

ЗэкIэмкIи тхьэмэфитIум къыкIоцI, Iоныгъом и 19-м къыщыублагъэу чъэпыогъум и 2-м нэс Аслъанэ Рамазанэ ыкъор профессиональнэ Iофтхьабзэ инхэу Махачкала, Москва ыкIи Ростов-на-Дону ащыкIуагъэхэм ахэлэжьагъ. Урысыем испециалист пэрытхэм ягъусэу нэмэ ягъэхъужьынкIэ непэрэ уахътэм диштэрэ шIыкIэу щыIэхэр, медицинэ технологиехэу хэхъоныгъэ зышIыхэрэр ыкIи лабораторнэ диагностикэм иамалхэм атегущыIагъэх.

Апэрэ Iофтхьабзэу хъугъэр научнэ-практическэ конференциеу кIэлэцIыкIу офтальмологхэм афэгъэхьыгъэу «XXI Исмаиловские чтения» зыфиIорэр ары, къалэу Махачкала щыкIуагъ. Аслъанэ Рамазанэ ыкъор президиумым икуп хэхьагъ ыкIи докладэу «Отдаленные результаты клинического применения сегментов из ногтевой пластины» зыфиIорэр къышIыгъ. Ушэтынхэр ыгъэхьазырыгъэх апшъэрэ квалификационнэ категорие зиIэ врач-офтальмологэу, медицинэ шIэныгъэхэмкIэ докторэу, профессорэу Юрий Шустеровыр ыкIи урысые офтальмологэу, РАН-м ичлен-корреспондентэу, УФ-м изаслуженнэ врачэу, шIэныгъэхэмкIэ УФ-м изаслуженнэ IофышIэу, медицинэ шIэныгъэхэмкIэ докторэу, профессорэу Евгений Сидоренкэр игъусэхэу.

Урысыем ишъолъыр зэфэшъхьафыбэхэм ащыщ специалистхэр конференцием зэрипхыгъэх, сабый офтальмологием къыхэкIырэ гумэкIыгъохэм ядэгъэзыжьын ары анахьэу зытегущыIагъэхэр. АнаIэ зэкIэхэми зытырадзагъэр непэрэ уахътэм диштэрэ диагностикэмрэ сабыйхэм анэхэу узхэрэр хирургическэу зэрагъэхъужьхэрэмрэ, джащ фэдэу сетчаткэм ипатологие, нэм инерв, нэм иорганхэу узхэрэм зэряIазэхэрэр, фэшъхьафхэр.

Хъурэе Аслъанэ инаучнэ IофшIэн икъыкIэлъыкIорэ едзыгъоу хъугъэ я XIX-рэ Урысые лъэпкъ офтальмологическэ форумэу Москва щыкIуагъэм зэрэхэлэжьагъэр. Мыщи профессиональнэ зэхэгущыIэжьыным игупчэу хъугъэх непэрэ уахътэм диштэрэ методхэу нэхэм ягъэхъужьынкIэ агъэфедэхэрэр, офтальмохирургием иамалыкIэхэр, джащ технологиехэу медицинэ IэпыIэгъур ягъэкIыгъэнымкIэ шапхъэу агъэуцугъахэхэр зэблэзыхъухэрэр. Анахьэу форумым хэлажьэрэмэ анаIэ зытырадзагъэр сетчаткэм ыкIи зрительнэ нервым, глаукомэм ягъэхъужьын ыкIи ушэтынэу ашIыгъэхэр клиническэ практикэм нахь шIэхэу зэрэхагъэхьащт шIыкIэхэр ары.

Научнэ программэр щылъигъэкIотагъ я VII-рэ Лъэпкъ конгрессым зэрэхэлэжьагъэмкIэ, ащ дунэе мэхьанэ иIагъ, ыцIагъэр: «Лабораторные технологии в репродуктивной медицине и неонатологии: от науки к практике» (ЛАБРиН'2026), я XXVII-рэ Урысые научнэ-гъэсэныгъэ форумэу «Ныр ыкIи сабыир» зыфиIорэм къыдыхэлъытагъэу зэхащагъ. Мызыгъэгум, профессиональнэ повесткэр офтальмологием игъунапкъэхэм ашъхьэдэкIыгъ ыкIи непэрэ медицинэм фэгъэхьыгъэ упчIабэ къыIэтыгъ: репродуктивнэ псауныгъэм ыкIи лабораторнэ диагностикэм къащыублагъэу искусственнэ интеллектым, цифрэ технологиехэм ягъэфедэн ушэтынхэм яметодыкIэхэм анэсыжьэу. Конгрессыр амалышIу хъугъэ медицинэ лъэныкъомкIэ специалистхэм гъэхъагъэу ашIыгъэхэм нэIуасэ афэхъунхэмкIэ ыкIи ахэм ягъэцэкIэнкIэ унашъохэр ашIынхэм къыфэкIонхэмкIэ.

Научнэ Iофтхьабзэмэ язэкIэлъыкIуакIэ Ростов-на-Дону щыкIогъэ IофтхьабзэмкIэ аухыгъ, ащ я II-рэ шъолъыр научнэ-практическэ Дон офтальмологическэ конференцие (ДОК-2) щыкIуагъ. Аслъан Рамазанэ ыкъом докладэу «Отдаленные результаты клинического применения сегментов из ногтевой пластины» зыфиIорэр ащ къыщишIыгъ. Ушэтынэу апашъхьэ рилъхьагъэр зытегущыIэхэрэм япрофессиональнэ Iахьэу непэрэ уахътэм диштэрэ хирургическэ методхэм афэгъэхьыгъэу ыкIи офтальмологическэ практикэм щыгъэфедэгъэнымкIэ амалэу хъугъэ.

Научнэ конференцииплIмэ зэрахэлэжьагъэм ишIуагъэкIэ ежь ушэтынэу ышIыгъэхэр къыгъэлъэгъон ылъэкIыгъэх ыкIи урысые специалистмэ зэхагъэуцуагъэмэ нэIуасэ афэхъугъ, клиническэ опытэу аIэкIэлъхэмкIэ зэхъожьыгъэх, профессиональнэ зэпхыныгъэхэм зырагъэушъомбгъугъ. Медицинскэ институтымкIэ ащ фэдэ зэдэлэжьэныгъэу научнэ ыкIи врачебнэ сообществэм зэдыряIэм ушэтын IофшIэным хэхъоныгъэхэр егъэшIыгъэнхэмкIэ, гъэсэныгъэ программэхэр гъэкIэжьыгъэнхэмкIэ ыкIи неущрэ специалистхэр гъэхьазырыгъэнхэмкIэ уахътэм диштэрэ медицинэ шIэныгъэхэр гъэфедэгъэнхэмкIэ амалыкIэхэр къетых.