МКъТУ-м и «Точка кипение» Студенческэ научнэ обществэу «Синергия идей: студенты для студентов» зыфиIорэм зэIукIэ щыкIуагъ. Ащ хэлэжьагъэх апэрэ курсхэм ащеджэрэ студентхэр. Ахэмэ научнэ IофшIэным апэрэ лъэубэкъухэр щадзынхэ фае.

Опытэу аIэкIэлъхэм къатегущыIагъэх Ангелина Меркуловар, Анастасия Нетребинар, Арина Астаховар ыкIи Вячеслав Карпенко. Ахэмэ зэкIэмэ хахыгъэ гъогу шъхьафхэр яIэх, ау зэзыпхыхэрэр зы: научнэ IофшIэныр ахэмкIэ егъэджэным щыщ Iахьэу хъугъэ къодыеп, ар хэхъоныгъэ ашIынымкIэ, гъэсэныгъэ ыкIи профессиональнэ амалыкIэхэр агъотынхэмкIэ IофыгъошIу афэхъугъ.

Ангелина Меркуловар фармацевтическэ факультетым истудентк ыкIи УФ-м и президентскэ стипендие къехьы. Опытым игугъу къышIызэ, Ангелинэ къыхигъэщыгъ, дэгъоу уеджэн закъор икъурэп, мэхьанэшхо яI къыхэуутырэмэ, ушэтэкIо IофшIэнэу бгъэцакIэрэмэ. Ащ фэдэ опытыр студентхэмкIэ лъэгъохэщэу хъун ылъэкIыщт ыкIи ежьхэм яунэе научнэ портфолио аугъоишъущт.

СНО-м ежь игъогу щызыкIугъэхэм ащыщ Анастасия Нетребинар, технологическэ факультетым къычIитIупщыгъэм. АщкIэ научнэ обществэр площадкэу IэпэIэсэныгъэр зыщыпсыхьагъэу хъугъэ, ар ушэтэкIо IофшIэнмэ къакIэлъэкIо. Старостэм икIи, еджэхэрэмэ я Зэхэт совет итхьаматэ IэнатIэм ар нэсыгъ, социальнэ Iофтхьабзи 100-м ехъумэ ахэлэжьагъ, джащ фэдэу ыгъэпсыгъэх «Зыхэбгъэхъоным иеджапIэ» ыкIи аукционэу «ГукIэгъум иэстафетэ». Мыхэм апылъызэ, ежь, Анастасие игущыIэхэмкIэ, цIыфхэм ягукIаехэр зэхишIэхэу ыкIи зэхихыхэу ригъэжьагъ, пшъэрылъхэм язэшIохыни ыуж ихьагъ.

Лъэныкъоу «ЧIыгу гъэпсыныр ыкIи кадастрэр» зыфиIорэм феджэрэ студенткэу Арина Астаховам инаучнэ IофшIагъэ унэе   портфолио иным щыщ Iахьэу хъугъэ. Конференциехэм зэрахэлажьэрэмрэ статьяхэр къызэрэхиутыхэрэмрэ яшIуагъэкIэ ар форумэу «Урысыем ущыпсэущт ыкIи щыбгъэпсыщт» зыфиIоу Урысые студенческэ проектэу «О уикIогъу» зыцIэм къыдыхэлъытагъэм кIон ылъэкIыгъ. Апэрэ курсым щеджэрэ студентхэмкIэ ар щысэтехыпIэ хъугъэ, научнэ IофшIагъэу апашъхьэ къырилъхьагъэр лъэубэкъухэр университетым шъхьадэкIыхэу бдзынхэ зэрэплъэкIыщтым щигъэгъозагъэх.

Ащ фэдэ траекториемкIэ джыри зы щысэ — Вячеслав Карпенкэр, лъэныкъоу «Агрономием» истудент. Программэу «УМНИК» зыфиIоу инновациехэм IэпыIэгъу къязытырэ Фондым зэрэхэлэжьагъэм, джащ фэдэу Урысые зэнэкъокъубэмэ зэращынэкъокъуагъэм къахэкIэу опыт дэгъу зэригъэуIугъ, УФ-м и Президент истипендие 2026-рэ илъэсым къыдихын ылъэкIыгъ.

ЗещакIомэ ятарихъ къыгъэлъэгъуагъ: студенческэ наукэр пшIогъэшIэгъонымкIэ къежьэ, ащ удэлэжьэн гухэлъ уиIэн фае. Джащыгъум, IофшIэным уегугъымэ, стипендиехэри къыдэпхыщтых, зэнэкъокъуми уащытекIощт, пэрыт шъыпкъи ухъушъущт.

Студенческэ научнэ обществэр — ар шъолъырэу игъо къэсыфэ зыщямыжэхэу, ежь-ежьырэу гъэпсыным зыщыхэлажьэхэрэр ары: темэр къэбгъотыныр, IэпыIэгъу къыпфэхъунхэр, гупшысэгъухэм нэIуасэ уафэхъуныр ыкIи наукэм о уигъогу къыщыхэбгъэщыныр.

МКъТУ-м и СНО шъукъыхахьэх!