Мыекъопэ къэралыгъо технологическэ университетым менеджментымкIэ ыкIи шъолъыр экономикэмкIэ кафедрэм идоцентэу, экономикэ шIэныгъэхэмкIэ кандидатэу Зарина Гашевар социальнэ-гуманитарнэ экспедициеу «Дигория» зыфиIорэм хэлэжьагъ, а зыр ары Адыгеим илIыкIоу научнэ-практическэ проектышхом зиIахь хэзылъхьагъэр.

Экспедицием шIэныгъэлэжь ныбжьыкIэ 120-рэ къыугъоигъ — философхэр, политологхэр, экономистхэр, социологхэр, тарихълэжьхэр, юристхэр ыкIи Урысыем щыщ фэшъхьаф лIыкIохэу социальнэ-гуманитарнэ лъэныкъохэм ащылажьэхэрэр. ЗэкIэмкIи проектым хэлэжьэнхэу нэбгырэ 1290-рэ фэягъ. Экспедицием изэхэщакIоу зыкъэзгъэлъэгъуагъэхэр: социальнэ ушэтынхэмкIэ Экспертнэ институтыр ныбжьыкIэ IофхэмкIэ Федеральнэ агентствэр иIэпыIэгъоу ыкIи Президентскэ платформэу «Урысыер — амалыбэхэм яхэгъэгу» зыфиIорэр.

Мэфитф программэм хэтыгъэх экспедицие гъогоу Москва — Углич — Мышкин — Ярославль — Дубна — Москва. Ащ темэ шъхьаIэу иIагъэр Урысыем инеущрэ мафэ зыкIыныгъэ хэлъхьэгъэныр, цIыфыр, обществэр ыкIи къэралыгъор зэрэзэпхыгъэхэр гъэунэфыгъэныр ары.

Хэлажьэхэрэр экспертхэмрэ гъэсакIохэмрэ ягъусэхэу хэгъэгум социальнэ хэхъоныгъэу ышIын ылъэкIыщтхэм ягугъапIэмэ атегущыIагъэх, джащ фэдэу непэрэ общественнэ процессхэм ыкIи къыкъокIырэ къиныгъохэм, практическэ шIыкIэу къафагъотыщтхэм ягугъу ашIыгъ.

Къалэхэу экспедицие гъогур зэуалIэхэрэмэ лекциехэр, панельнэ зэхэгущыIэжьхэр, экспертнэ зэфэхьысыжьхэр ащызэхащэщтыгъэх, ахэмэ джыри культурнэ-просветительскэ программэр гъусэ афашIыжьыщтыгъэ.

«Дигорием» мэхьанэ зиIэ Iахьэу хэтыгъ команднэ проектнэ IофшIэныр. НыбжьыкIэ ушэтакIомэ общественнэ шIуагъэ къэзытыщт гукъэкIхэмкIэ проектхэр зэхагъэуцуагъэх, хэгъэгум хэхъоныгъэхэр егъэшIыгъэнхэм ахэр афытегъэпсыхьагъэх. Экспедицием икIэухым экспертнэ советым ыпашъхьэкIэ къагъэхьазырыгъэ проектхэм лъэтегъэуцохэр афашIыгъэх.

 Сурэтыр экспедициеу «Дигорием» ипресс-къулыкъу къыгъэхьыгъ.