Мыекъопэ къэралыгъо технологическэ университетым егъэджэныкIэхэр профессиональнэ ухьазырыныгъэ программэу «Фермерым иеджапIэ. Фермерскэ хъызмэтыр зещэгъэным пае агъэфедэрэ технологиякIэхэр» зыфиIорэр щырагъэжьагъ.

ЕдзыгъуакIэу рагъажьэрэм иторжественнэ зэхахьэ еблэгъагъэх университетым, мэкъу-мэщымкIэ Адыгэ Республикэм и Министерствэ, Россельхозбанкым, предпринимательствэм IэпыIэгъу фэхъугъэным и Гупчэ ыкIи шъолъыр фондэу «Хэгъэгум иухъумакIохэр» зыфиIорэм ялIыкIохэр. ЗэIукIэм хэлэжьагъэхэр мэкъу-мэщ отраслым щылэжьэщт специалистхэм ягъэхьазырын, езыгъэжьэгъэкIэ фермермэ фэгъэкIотэныгъэу агъотыщтхэм атегущыIагъэх.

ШIуфэс псалъэкIэ къэзэрэугъоигъэхэм закъыфагъэзагъ АО «Россельхозбанкым» и Краснодарскэ къутамэ ипащэ игуадзэу Мария Боровскаяр, мэкъу-мэщымкIэ Адыгэ Республикэм и Министерствэ экономическэ анализымкIэ ыкIи къэралыгъо программэхэм ягъэцэкIэнкIэ иотдел ипащэу Ирина Метовар, предпринимательствэм IэпыIэгъу фэхъугъэным и Гупчэ ипащэу Дзэхъохъу Адамэ, шъолъыр фондэу «Хэгъэгум иухъумакIохэр» зыфиIорэм ипащэ игуадзэу НэмытIэкъо Юныс ыкIи МКъТУ-м аграрнэ технологиехэм яфакультет идеканэу Шъхьапэцэ Аслъан.

Къырагъэблэгъэгъэ хьакIэхэм ащыщых — АО «Россельхозбанкым» и Краснодарскэ къутамэ микробизнесымкIэ клиентхэм адэлэжьэрэ отделым ипащэу Елена Шумиловар ыкIи кредитнэ аналитик шъхьаIэу Нина Болдаревар.

Мэкъу-мэщ продукцием икъыдэгъэкIыжьын технологиехэм якафедрэ ипащэу, мэкъу-мэщ шIэныгъэхэмкIэ докторэу, гъэсэныгъэ программэу «Фермерым иеджапIэ» ипащэу Мамсыр Нурбый зещакIоу Iофтхьабзэм иIагъ.

Шъолъырым иэкономикэ чIыпIэшхо щызыубытырэ мэкъу-мэщыр АдыгеимкIэ мэхьанэшхо зиIэ отраслэу щыт. Фермерскэ хъызмэтхэр чIыгулэжьыным, чъыгхатэхэм якъэгъэкIын, хэтэрыкIмэ, былымхэм яIыгъын апылъых. СыдигъокIи республикэм имэкъу-мэщ продукцие яIахьышхо хэлъ.

«Фермерым иеджапIэ» МКъТУ-м 2021-рэ илъэсым къыщыублагъэу щагъэцакIэ, ар лъэныкъуищ зэзэгъыныгъэу мэкъу-мэщымкIэ Адыгэ Республикэм и Министерствэ, АО «Россельхозбанкым», университетым зэдашIыгъэм елъытыгъ. А уахътэм къыкIоцI егъэджэнхэр езыгъэжьэгъэкIэ ыкIи бэшIагъэу лажьэрэ фермеришъэ пчъагъэмэ акIугъ.

Егъэджэнхэр сыхьат 250-рэ мэхъух ыкIи экономикэ-фитыныгъэ ухьазырыныгъэм диштэу гъэпсыгъэх. Ащ хэлажьэрэмэ хъызмэт цIыкIум изехьан, къэралыгъо IэпыIэгъур, бизнес-планированиер, маркетингыр, логистикэр ыкIи мэкъу-мэщ кооперациер зэрагъашIэ, джащ фэдэу непэрэ уахътэм диштэрэ чъыгхатэмэ ыкIи былымымэ уазэрэдэлэжьэщт шIыкIэр акIу.

Программэм иIахь шъхьаIэр — практическэ ухьазырыныгъэр ары. Десэхэр МКъТУ-м ибазэ ыкIи Адыгеим иагропромышленнэ комплекс хэхьэрэ предприятиехэм ащырагъэкIокIых. Ащ къыхэкIэу производственнэ процессхэр зыфэдэхэр еджакIомэ нахь куоу зэрагъэшIэшъух, технологиякIэхэм ащэгъуазэх, кIэлэегъаджэхэм ыкIи специалистхэм практическэ шIэныгъэхэр къаратын алъэкIы.

АО «Россельхозбанкым» и Краснодарскэ къутамэ ипащэ игуадзэу Мария Боровскаям къызэрэхигъэщыгъэу, программэр шъолъырым зэрищыкIэгъэ шъыпкъэр къэзыушыхьатырэр Адыгеим «Фермерхэм яеджапIэ» зы илъэсым къыкIоцI тIогъогогъо зэрэщызэхащагъэр ары.

Проектым къыдыхэлъытагъэу анаIэ атырагъэты хэушъхьафыкIыгъэ дзэ операцием хэлэжьагъэмэ ыкIи ахэмэ яунагъохэм. Зэзэгъыныгъэм елъытыгъэу а категорием хиубытэрэмэ процент 25-м нахь мымакIэу чIыпIэ еджапIэм щагъоты.

Еджэныр зыкIухэрэмэ ежь-ежьырэу нэужым мэкъу-мэщ хъызмэтшIапIэхэр зэхащэнхэ алъэкIыщт, джащ фэдэу къэралыгъо IэпыIэгъоу щыIэхэр къызфагъэфедэшъущтых.

«Фермерым иеджапIэ» иедзыгъуакIэ еджэнхэр ыублагъэх — ащ хэлажьэрэмэ теориемкIэ, практикэмкIэ ыкIи яунэе проектмэ адэлэжьэнхэмкIэ мэзэ заулэ апэ илъ.