Мы мафэхэм Мыекъопэ къэралыгъо технологическэ университетым шIэныгъэлэжьхэм ясовет изэхэсыгъо щыкIуагъ, ащ тхьаматагъор щызэрихьагъ ректорэу Къуижъ Саидэ.

Къихьэгъэ илъэсыкIэ еджэгъум рахъухьащтхэр, приемнэ кампанием изэфэхьысыжьхэр, гъэсэныгъэ процессым епхыгъэ Iофыгъохэм язэхэщэн ыкIи студентхэм адэIэпыIэнхэр ары анахьэу зытегущыIагъэхэр.

Повесткэ шъхьаIэм тегущыIэнхэм ыпэкIэ ректорэу Къуижъ Саидэ профессорскэ-кIэлэегъэджэ купым хахьэхэрэмэ ащыщхэм шIэныгъэлэжь цIэ лъапIэхэр къазэрафагъэшъошагъэхэр къэзыушыхьатыжьрэ аттестатхэр аритыжьыгъэх. Лъэныкъоу «Пищевые системы» зыфиIорэмкIэ профессор цIэ лъапIэр Хьаткъо Зурет фагъэшъошагъ. ДоцентыцIэ зиIэ хъугъэхэр: Къохъужъ Римм — научнэ сэнэхьатэу «ЕгъэджэнымкIэ ыкIи гъэсэк1онымкIэ теориер ыкIи методикэр»; Хьаткъо Марят — научнэ сэнэхьатэу «Унэе зоотехниер, Iусыр ятыгъэныр, былымхэм япродукцие игъэхьазырынкIэ технологиехэр»

ШIэныгъэлэжьхэм ясовет иповесткэ иIофыгъо шъхьаIэхэм ащыщыгъ 2026-2027-рэ илъэс еджэгъум телъытэгъэ IофшIэным ипланэу МКъТУ-м ыгъэнэфагъэр. Документмэ университетым илъэсым къыкIоцI зыфэгъэзэгъэщт лъэныкъохэр къагъэнафэх, структурнэ подразделениемэ пшъэрылъхэр афагъэуцух.

Апшъэрэ ыкIи гурыт профессиональнэ гъэсэныгъэм ипрограммэкIэ еджэщтхэр зэраштагъэхэм фэгъэхьыгъэ доклад къышIыгъ приемнэ комиссием пшъэдэкIыжь зыхьырэ исекретарэу Бэрзэдж Розэ. 2026-рэ илъэсым МКъТУ-м гъэсэныгъэ программи 100-м ехъурэмкIэ щаштагъэх — ахэр гурыт профессиональнэ гъэсэныгъэм къыщыублагъэхэу аспирантурэм ыкIи ординатурэм анэсыжьхэу. Анахьэу анаIэ зытырадзагъэр бюджетым чIэхьанхэмкIэ амалэу щыIэхэм зягъэушъомбгъугъэныр ары: мы илъэсым университетым бюджетнэ чIыпIэ 1679-рэ къыратыгъ, ар 253-кIэ гъорекIорэм нахьыб. Ахэмэ ащыщэу 917-р программэхэу бакалавриатым ыкIи специалитетым къыделъытэх, 530-р — гурыт профессиональнэ гъэсэныгъэм, 182-р — магистратурэм. Кадрэхэм ягъэхьазырынкIэ целевой лъэныкъоми хэхъоныгъэхэр ешIых. Медицинэ сэнэхьатхэмкIэ заказчикэу щыIагъэхэр Адыгэ Республикэм, Краснодар краим, Калининградскэ хэкум, Къэрэщэе-Щэрджэс республикэм псауныгъэм икъэухъумэнкIэ Министерствэу яIэхэр ары. Инженернэ, техническэ ыкIи аграрнэ лъэныкъохэмкIэ къыкIэлъэIугъэхэр Адыгэ Республикэр, Краснодар краир ыкIи Удмуртскэ республикэр. Шъхьафэу къыхагъэщыгъ, апшъэрэ еджапIэм къычIэхьагъэмэ азыныкъорэмэ анахьыбэрэр — процент 56,6-рэ — Адыгеим щыщых, ащ къегъэлъагъо шъолъырым пае кадрэхэм ягъэхьазырынкIэ МКъТУ-м мэхьанэшхо зэриIэр.

Зэхэсыгъом иятIонэрэ Iахь гъэсэныгъэ IофшIэным фэгъэхьыгъагъ. Егъэджэн IофшIэнымкIэ проректорэу Людмила Задорожнаям нормативнэ документхэу гурыт профессиональнэ гъэсэныгъэмкIэ къэралыгъо зэфэхьысыжь аттестациер ыкIи гъэсэныгъэ IофшIэныр зэзыгъэзафэхэрэм ашъхьэ къырихыгъ.

Адыгэ Республикэм ыцIэкIэ атыщт стипендиехэр зэратыщт студентхэм ягъэнэфэн хэплъагъэх. 2025-2026-рэ гъэмэфэ зачетнэ-ушэтын сессием къытыгъэ зэфэхьысыжьхэм ялъытыгъэу ахэр къыхахыгъэх. Стипендиер зэратынэу нэбгырэ 13 къагъэлъэгъуагъ: Ангелина Андреевар, Данил Афанасьевыр, Михаил Бат, Алена Бахтинар, Александр Богородскэр, Даур Бэлла, Вадим Егоровыр, Адель Калиевар, Киятэ Дана, Вероника Коробко, Валерия Лебедевар, Илья Петровыр ыкIи Михаил Фирсоыр.

Повесткэм къыдыхэлъытагъэу шIэныгъэлэжьхэм ясовет хэтхэр хэплъагъэх научнэ сэнэхьатэу «КардиологиемкIэ» шIэныгъэлэжьыцIэ къыфагъэшъошэнэу къагъэлъэгъогъэ доцентэу ГутIэ Саидэ иIоф. Ар факультетскэ терапием икафедрэ идоцентэу мэлажьэ, научнэ-кIэлэегъэджэ снэхьатымкIэ илъэсибл стаж иI, научнэ IофшIэгъэ 35-рэ къыIэкIэкIыгъ.

Зэхэсыгъом икIэухым студентмэ атырэ пкIэр къегъэIыхыгъэным фэгъэхьыгъэ Iофым тегущы1агъэх.

Зымакъэ зыфатынэу зэхэсыгъом къыщаIэтыгъэ упчIэмэ зэкIэмэ джэуапэгъу агъотыгъ.