ГъэпцIэгъэ схемэр таущтэу къэпшIэщта, сыдэущтэу щынэгъончъэу непэрэ уахътэм къыдэкIогъэ банковскэ сервисхэр къызфэбгъэфедэщтха, экономическэ Iофыгъохэр зэхэпфыщтха? А упчIэхэм ыкIи нэмыкIыбэхэм ащытегущыIагъэх пенсионнэ ныбжь зиIэхэр финансхэм афэгъэсэгъэнхэмкIэ Урысые чемпионатым ия V-рэ шъолъыр едзыгъом.

Iофтхьэбзэ инэу нэжъ-Iужъхэм я Мафэ ехъулIэу зэхащагъэм а зы уахътэм хэгъэгум площадкэ 70-м ехъу зэрипхыгъ, зэхэщакIоу ащ фэхъугъэр — Г. В. Плехановым ыцIэ зыхьырэ РЭУ-р ары.

Хабзэ зэрэхъугъэу, Адыгэ Республикэм площадкэ шъхьаIэу Мыекъопэ къэралыгъо технологическэ университетыр ащкIэ фэхъугъ. 2023-рэ илъэсым къыщыублагъэу финансовэ гъэсэныгъэмкIэ АР-м и Шъолъыр гупчэ доцентэу Татьяна Паладовар япащэу ыкIи гупчэм иIофышIэу Мамыекъо Людмилэ яIэпыIэгъоу гъэ къэс мы мэхьанэшхо зиIэ социальнэ-просветительскэ проектыр МКъТУ-м ибазэ щызэхащэ.

Финансовэ гъэсэныгъэм иIахьышхо зэрэхилъхьагъэм, Iофтхьабзэм изэхэщэнкIэ IэпыIэгъу зэрафэхъугъэм афэшI Г. В. Плехановым ыцIэ зыхьырэ РЭУ-м финансовэ гъэсэныгъэмкIэ и Федеральнэ методическэ гупчэ ипащэ МКъТУ-м иректорэу Къуижъ Саидэ рэзэныгъэ тхылъ къыфигъахьыгъ.

МКъТУ-м и «Точка кипение» анахь дэгъур къыхэхыгъэнымкIэ Мыекъуапэ, Джаджэ ыкIи Мыекъопэ районхэр щызэнэкъокъугъэх.

Ащ хэлажьэрэмэ шIэныгъэу яIэхэр къагъэлъэгъон фэягъэ тестовэ ыкIи творческэ десэхэр, кейсхэр къашIыхэзэ, джащ фэдэу унэгъо бюджетыр зэрагъэIорышIэщтыр, финансхэм япланирование, банковскэ продукхэм ыкIи непэрэ уахътэм къыдэкIогъэ цифрэ сервисхэр зэхафынхэу щытыгъ. ЩыIэныгъэм щыхъурэ-щышIэхэрэр щысэу къахьыхэзэ десэхэр зэхагъэуцуагъэх, хэлажьэрэмэ теориер аушэтыкIэ икъущтыгъэп, практикэм къыщагъэшъыпкъэжьыщтыгъэ.

Iофтхьабзэм изэхэщэнкIэ ыкIи техническэу зэтегъэпсыхьэгъэнымкIэ IэпыIэгъу къафэхъугъэх финансовэ гъэсэныгъэм игуфакIохэр — экономикэм ыкIи гъэIорышIэным истудентхэу Къэрдэнэ Дана, Кушъхьэ Динара, Иныхъу Изабелла, Марина Хажи ыкIи Алина Борзуновар.

Мы чемпионатыр адрэхэм къахэзгъэщыгъэр Г. В. Плехановым ыцIэ зыхьырэ РЭУ-м и Краснодарскэ къутамэ зэрэхэлэжьагъэр ары. Шъолъыр едзыгъом иэкспертнэ куп хэхьагъэх наукэм ыкIи сэнэхьатым хэхъоныгъэ егъэшIыгъэнымкIэ отделым ипащэу Елена Багдасарян, финансхэм якафедрэ ипащэу ыкIи бизнес-аналитикэу Ирина Кузнецовар, финансхэм якафедрэ идоцентэу ыкIи и бизнес-аналитикэу Светлана Касьяновар, наукэм ыкIи сэнэхьатым хэхъоныгъэ егъэшIыгъэнымкIэ отделым испециалистэу Валерия Глазуновар.

Зэнэкъокъу IофшIэнхэм осэшIмэ уасэ къафашIыфэ нэс, Iофтхьабзэм хэлажьэрэмэ апае интерактивнэ мастер-классхэр финансовэ щынэгъончъэнымкIэ зэхащагъэх. Аудиторием ыпашъхьэкIэ къэгущыIагъ Адыгэ Республикэм и Лъэпкъ Банк иэкономическэ отдел испециалист шъхьаIэу Елена Аспидовар, темэу иIагъэр: «Финансовэ бэдзэрхэм ащыхъурэ гъэпцIагъэхэр». Практическэ аспектхэу киберщынагъохэм апэуцужьыгъэнымкIэ щыIэхэм ыкIи гъэпцIэкIо схемэхэм къатегущыIагъэх ПАО Сбербанкым и Адыгэ къутамэу № 8620-м испециалистхэр: лэжьэпкIэ проектхэм ящэнкIэ менеджерэу Ламжьые Долэт ыкIи дэкIыгъо сервисымкIэ менеджерэу Елизавета Скотниковар.

Зэнэкъокъу инэу рекIокIыгъэм ыуж зэфэхьысыжьэу ашIыгъэхэм къагъэлъэгъуагъэр:

а I-рэ чIыпIэр — Тхьагъэпсэу Фатим (ст. Джаджэ);

я 2-рэ чIыпIэр — Дэгъэмыкъо Валентина (къ. Мыекъуапэ);

я 3-рэ чIыпIэр — Галина Егорова (къ. Мыекъуапэ).

ТекIоныгъэ къыдэзыхыгъэхэмрэ апэрэ чIыпIищым хэфагъэхэмрэ дипломхэмрэ шIухьафтынхэмрэ аратыгъэх.

ТекIуагъэхэр ары джы Адыгэ Республикэр федеральнэ едзыгъом къыщызгъэлъэгъощтхэр. Урысые чемпионатым ифинал чъэпыогъум и 22-м 2026-рэ илъэсым онлайн-шапхъэу Г. В. Плехановым ыцIэ зыхьырэ РЭУ-м иплатформэ агъэфедэзэ Москва щызэхащэщт. Ащ тифиналистхэр финансовэ культурэм ылъэныкъокIэ анахь дэгъуцIэм щылъыбэнэщтых.

ТекIоныгъэ къыдэзыхыгъэмэ тафэгушIо ыкIи финалым щытекIонхэу тафэлъаIо!