Мыекъопэ къэралыгъо технологическэ университетым инаучнэ-кIэлэегъэджэ IофышIэхэр рагъэблэгъагъэх ООО «МПК Пивоваренный завод Майкопский» зыфиIорэм иэкспертнэ совет хагъэхьанхэу.

Ащ фэдэ зэгъусэныгъэм амал къеты зыми емыпхыгъэ уасэ фэшIыгъэнымкIэ, научнэ екIолIакIэ къыфэгъотыгъэнымкIэ ыкIи зыфэдэ къэмыхъугъэ рецептурэхэр зэхэгъэуцогъэнхэмкIэ.

Клубым хэхьагъэх: стандартизацием, метрологием ыкIи товарнэ экспертизэм икафедрэ идоцентэу, мэкъу-мэщ шIэныгъэхэмкIэ кандидатэу Сихъу Нафсэт; гъомлэпхъэ технологиехэм ыкIи шхыныгъохэм ягъэхьазырынкIэ кафедрэм идоцентэу, техническэ шIэныгъэхэмкIэ кандидатэу Татьяна Колотий; гъомлэпхъэ производствэм итехнологиехэм, машинэхэм ыкIи Iэмэ-псымэхэм якафедрэ идоцентэу, техническэ шIэныгъэхэмкIэ кандидатэу Блэгъожъ Аслъан; экологием ыкIи тыкъэзыуцухьэрэ дунаим якафедрэ идоцентэу, биологие шIэныгъэхэмкIэ кандидатэу Любовь Вавиловар; чIыгу гъэпсыным икафедрэ идоцентэу, экономикэ шIэныгъэхэмкIэ кандидатэу, студенческэ научнэ обществэм ипащэу Ирина Селивановар; доцентэу, шIэныгъэлэжь IофышIэ шъхьаIэу, техническэ шIэныгъэхэмкIэ кандидатэу Iэшъынэ Анжелика ыкIи гъомлэпхъэ производствэм итехнологиехэм, машинэхэм ыкIи Iэмэ-псымэхэм якафедрэ икIэлэегъаджэу, аспирантэу Нарэк Навасардян.

Научнэ екIолIакIэу къырагъэблэгъэгъэ экспертмэ ыкIи шIэныгъэлэжьмэ упчIабэ къызэлъаубыты: продукциер зыхашIыкIырэ къэкIыхэрэм къащегъэжьагъэу гъомлэпхъэ промышленностым нэсыжьэу, ахэмэ ябиохимическэ зытет зэгъэшIэгъэныр, биологическэ шIуагъэу ахэлъхэр къахэхыгъэнхэр, къызэрагъэкIыхэрэм ятехнологиехэр, къызэрэдагъэкIыжьхэрэр, Iэлэу къэкIыхэрэри зэрахэтхэу, джащ фэдэу шъонхэм ярецептурэхэр зэхэгъэуцогъэнхэр.

Джащ фэдэ спектрэ ушъомбгъугъэр ары компанием ипащэмэ анаIэ къазкIытырадзагъэр. ТапэкIэ МКъТУ-м иэкспертхэр зыми емыпхыгъэхэ экспертхэу дегустациехэм ахэлэжьэщтых, органолептическэ шапхъэхэр зыфэдэхэр агъэунэфыщтых, рецептурэр нахьышIу зэрашIыщтымкIэ шIэныгъэ предложениехэр къафахьыщтых, экологичнэ технологиехэр производствэм зэрэхагъэхьащтхэм ыуж итыщтых.

Iофтхьабзэм иегъэжьапIэ клубым хэтхэм апае экскурсие заводым ицеххэу агъэкIэжьыгъэхэм ащырагъэкIугъ. Джащ фэдэу ахэр пивэшI заводым ипащэу Пэнэшъу Мурат ыкIи Iоф щызышIэхэрэмэ заIуагъэкIагъ. ЗэIукIэгъухэм клубым ипшъэрылъхэр къыщаIэтыгъэх, тапэкIэ зэрэзэдэлэжьэщтхэм атегущыIагъэх.

ЗэIухыгъэ дегустациекIэ Iофтхьабзэр аухыгъ. Экспертмэ шъонэу къыдагъэкIыхэрэмэ уасэ афашIыгъ, япрофессиональнэ шIошIхэр къыраIотыкIыгъэх.

Тэ тиуниверситеткIэ ащ къегъэлъагъо МКъТУ-м ишIэныгъэлэжьхэр зэралъытэхэрэр, экспертизэр апшъэрэ лъэгапIэхэм зэрэщынагъэсыгъэр. ООО «МПК-м» зэрэдэлажьэхэрэр ащкIэ щысэ шIагъу, апшъэрэ еджапIэм инаукэ экономикэм хэщагъэ зэрэхъурэм ишыхьат.

Экспертнэ клубым къыдыхэлъытэгъэ зэдэлэжьэныгъэр зэзэгъыныгъэу МКъТУ-рэ Мыекъопэ пивэшI заводымрэ зэдашIыгъагъэм къыкIэлъыкIуагъ. ПшъэрылъыкIэхэр — зэхэт ушэтынхэр регъэкIокIыгъэнхэр, алкоголь зыхэмылъ шъон хэушъхьафыкIыгъэмэ апае линейкэр гъэпсыгъэныр, джащ фэдэу студентмэ сэнэхьат къыхэхыным фэгъэхьыгъэ IофшIэныр адылъыгъэкIотэгъэныр, научнэ ыкIи технологическэ гъэхъагъэхэр шIыгъэнхэр.