Врач хъущтым дэгъоу алгоритмэхэр ышIэнхэ ыкIи ахэр практикэм щигъэфедэшъунхэ фае. Анахьэу щыIэныгъэр такъикъкIэ къызщалъытэрэм нэсыгъэхэ зыхъурэм.

Урысые Федерацием наукэмрэ апшъэрэ гъэсэныгъэмрэкIэ и Министерствэ яIэпыIэгъоу университетым технологие ин зиIэ Iэмэ-псымэхэр МКъТУ-м и Медицинскэ институт иаккредитационнэ гупчэ пае зэригъэгъотыгъэх. Практическэ ухьазырыныгъэм иедзыгъо пчъагъэхэр ащ зэлъеубытых — сымаджэм ащ лъыпытэу IэпыIэгъу зыщыфэхъухэрэм къыщыублагъэу реанимацием ишIынрэ клиническэ уплъэкIунхэм анэсыжьэу.

КIэу къащагъэхэм ащыщ — интубацием пае шъхьэм ифантом. Ащ жьы къэщэныр зэрыкIохэрэм афегъэджэнхэм, пчыир интубацие шIыгъэным тхьабылхэм искусственнэу жьыр ягъэкIугъэныр къыделъытэх. Жьым икъэщэн зэрэщыгъэпсыгъэр шъыпкъэм пэблагъ, тхьабылхэр ыкIи нэгъур джащ фэдэх, IофшIэныр ащылъыбгъэкIотэнэу гъэпсыгъэх, къакIэлъэкIо эндотрахеальнэ трубкэр, маскэр, дзыоу Амбу ыкIи аппаратэу ИВЛ-р. Я 5-6-рэ курсхэм ащеджэрэ студентхэр ары а Iофыгъохэр зыIэ къизыгъахьэхэрэр, джащ фэдэу ординаторхэм, врачэу IофшIэныр езыгъэжьэгъакIэхэм, анестезиологхэм-реаниматологхэм.

Сымаджэ хьылъэм зэрэлъыплъэхэрэ шIыкIэр зэрагъэшIэным пае манекеныр агъэфедэ: къупшъэ зэрытыпIэхэмкIэ ар зэпырагъэзэн алъэкIы, агъэтIысышъу. Хъулъфыгъэмэ е бзылъфыгъэмэ джащ фэдэу зэхэпшIыкIынэу щыт. Ащ фэдэ тренажерымкIэ студентмэ практическэ десэхэр къашIых, зэкIэлъыкIуакIэ Iофхэр зэрагъашIэх, дэгъу дэдэу агъэцакIэфэ нэс дэлажьэх. Манекеныр медицинскэ колледжым икIэлэеджакIохэм ыкIи апэрэ курсхэм ащеджэрэ студентхэм афытегъэпсыхьагъ.

Нахь клиническэ Iофыгъо хьылъэхэр моделировать зышIырэр медицинскэ гъэсэныгъэ робот-симуляторэу псынкIэ IэпыIэгъум пае агъэфедэрэ «Арес» зыцIэр ары. Ащ тренажерым иамалхэмрэ псынкIэ IэпыIэгъоу сымэджэ хьылъэм ищыкIагъэмрэ зэрепхых. АщкIэ зэкIэлъыкIокIэ шIыкIэу гу-тхьабыл реанимацие шIыгъэным епхыгъэ Iофтхьабзэр пчъагъэрэ агъэцэкIэн алъэкIы. Тхылъеджэ клиническэ сценариер боу зэрэщыIэм къыхэкIэу зэфэшъхьаф хъугъэ-шIагъэхэр зэхафынхэр ыкIи зэрагъэзэфэнхэр къадэхъу, медицинскэ специалистым ишIыкIэхэр практикэ шъыпкъэм пэблэгъэ дэдэхэу ашIых.

Лъэныкъо шъхьафыр — егъэджэн системэу К+ гумрэ тхьабылымрэ аускультацие шIыгъэнхэм фытегъэпсыхьагъ. Аускультацием сымэджэ хьылъэр клиническэу уплъэкIугъэнымкIэ чIыпIэшхо еубыты. Гу тео макъэмрэ жьы мэкъэ лыехэмрэ къэпшIэнхэм зафэбгъэсэным пае ренэу а Iофым удэлэжьэнэу щыт. Симулятор К+ зыфиIорэм гумрэ тхьабылымрэ макъэу къатыхэрэр зэхыуегъашIэх, еджэхэрэмэ гъогогъу пчъагъэрэ тренировкэхэр ащкIэ ашIынхэ алъэкIы.

СимуляторыкIэхэм яшIуагъэкIэ врач хъунэу зызыгъэхьазырхэрэм дэгъу дэдэу загъэсэшъущт. Хэукъоныгъэр зэхафыжьызэ зыдэлэжьэжьыщтых, сымаджэ шъыпкъэм IокIэхэфэ нэс шIэныгъэ икъу зэрагъэгъотыщт.