Мыекъопэ къэралыгъо технологическэ университетым Урысые научнэ конференциеу «Урысыем ыкIи пэмычыжьэ къэралыгъохэм къэкIырэмэ алъыплъэрэ сообществэхэу ащыIэхэм япхыгъэ классификациехэм ятеоретическэ упчIэхэр» зыфиIоу дунэе шъуашэ зиIэу щыкIуагъэр непэ зэфашIыжьыгъ.

МэфиплIым къыкIоцI шIэныгъэлэжьхэу Москва, Санкт-Петербург, Уфа, Екатеринбург, Курскэ, Брянскэ, Якутскэ, Новосибирскэ, Къырым, Ростов, Мыекъуапэ ыкIи фэшъхьаф къалэхэм ащыщхэм къэкIырэ сообществэхэр зэхафыгъэх, атегущыIагъэх ыкIи зэфэхьысыжьхэр афашIыгъэх. Ахэмэ системэ зэрахалъхьащтыр, ботаникхэмрэ экологхэмрэ апашъхьэкIэ пшъэрылъэу щытхэм ашъхьэ къарахыгъ.

Пленарнэ зэхэсыгъомэ къадыхэлъытагъэхэу шъофхэм, хъупIэхэм, псы нэпкъхэм къащыкIыхэрэм ыкIи псы сообществэхэм афэгъэхьыгъэ докладхэр къашIыгъэх, джащ фэдэу къатегущыIагъэх антропогеннэ ыкIи синантропнэ къэкIыкIэу Темыр-КъохьэпIэ Кавказым, Къырым, Якутием, Дагъыстан, Сыбыр якъалэхэм ыкIи нэмыкI чIыпIэхэм яIэхэм. Джащ фэдэу Iэнэ хъураехэу къэкIыхэрэм яклассификацие, классификацием иапшъэрэ единицэхэм ямонографическэ шъуашэхэм, информационнэ системэхэм, Урысыемрэ къыголъ къэралыгъохэмрэ къащыкIыхэрэм язэфэмыдэныгъэ афэгъэхьыгъэхэр рагъэкIокIыгъэх.

МКъТУ-м ишIэныгъэлэжьхэм яушэтынхэр къыраIотыкIыгъэх. Ядокладмэ ягупчэу щытыгъэх Адыгеим икъалэхэм ыкIи рекреационнэ чIыпIэу иIэхэм къащыкIыхэрэр. Шъхьафэу къагъэгъунэрэ ыкIи къаухъумэрэ уц лъэпкъхэм атегущыIагъэх.

Ландшафтнэ архитектурэм ыкIи мэз Iофым якафедрэ ипащэу Наталья Трушевэм зэрэхигъэунэфыкIыгъэмкIэ, экскурсиеу Лэгъо-Накъэ щызэхащагъэмкIэ конференциер зэфашIыжьыгъ. Экскурсием ишIуагъэкIэ Темыр-КъохьэпIэ Кавказым къыщыкIыхэу Адыгеим хахьэхэрэм нэIуасэ афэхъугъэх. Лъэсгъогур мэзым ышъхьагъырэ IахьымкIэ аублагъ, субальпийскэ шъолъырымкIэ кIуагъэ. ШIэныгъэлэжьмэ зыфэдэ къэмыхъугъэ тфэй мэзэу грабыр, кавказскэ бзыфыр ыкIи ланчъэр, сэснэир зыхэтхэр, къушъхьэм лъагэу къыщыкIырэ ланчъэу Траутветтерыр, гемиборельнэ сэснэй мэзыр, джащ фэдэу псэи субальпийскэ мэзыр алъэгъугъэх. Кавказскэ биосфернэ заповедникым игъунапкъэ зекIо Iофым кIэух щыфашIыгъ, а чIыпIэм пчэи мэзыр щызэрагъэлъэгъугъ, субальпийскэ хъупIэри янэплъэгъу итыгъ. Шъофым зыдэкIыхэм классификацием, экологием ыкIи географиеу къэкIырэмэ яIэм нэIуасэ фэхъугъэх. Ом изытет уигъэрэзэнэу щымытыгъэми, шIэныгъэлэжь нэбгырэ 16-р ощхым хэтхэу зекIуагъэх, ар конференцием икIэухыгъ.

ШIэныгъэлэжьхэр яеплъыкIэхэмкIэ зыщызэхъожьыгъэхэ площадкэу конференциер хъугъэ, ащ упчIэ шъхьаIэу, гумэкIыгъоу щыIэхэм ащытегущыIагъэх, къэкIыхэрэмэ яклассификацие зэрагъэзэфагъ ыкIи Урысыемрэ ащ къыпэIулъ къэралыгъохэмрэ яшъолъыр зэфэшъхьафхэм профессиональнэ зэдэлэжьэныгъэр щагъэпытагъ.