Лъэпкъ шъуашэм лъэпкъ тарихъыр къыIотэн ылъэкIыщта? Непэрэ уахътэм диштэрэ дизайнерым гукъыдэчъ ригъэшIыщта ыкIи я XXI-рэ лIэшIэгъум имодэ щыщ Iахьэу хъушъущта? А упчIэхэр къыщаIэтыгъэх Мыекъопэ къэралыгъо технологическэ университетым щыкIогъэ Iэнэ хъураеу «Лъэпкъ шъуашэм ихудожественнэ шъуашэхэр: непэрэ уахътэм культурэм чIыпIэу щиубытрэр» зыфиIорэм.

ЗэIукIэгъур адыгэ шъуашэм и Мафэ ыкIи зэлъашIэрэ сурэтышIэ-модельерэу СтIашъу Юрэ ыныбжь илъэс 95-рэ зэрэхъурэм афэгъэхьыгъагъ. МКъТУ-м зэрипхыгъэх тарихълэжьхэр, этнографхэр, искусствоведхэр, дизайнерхэр ыкIи Адыгеим, Санкт-Петербург, Москва, Краснодар, Минскэ ялIыкIохэу культурэм иучреждениехэм ащылажьэхэрэр.

МКъТУ-м искусствоведениемкIэ икандидатэу, доцентэу КIэдэкIое Нафсэт къыкIигъэтхъыгъ: «Лъэпкъ шъуашэр — ар музейнэ экспонатэп, ар тикультурэ щыщ Iахь. Ар зэдгъашIэзэ тарихъыр къэтэухъумэ, непэрэ искусствэм ыкIи дизайным иамалхэр къызэIутэхыхы, уасэу иIэр къыткIэхъухьэрэ лIэужмэ ятэгъашIэ».

А гукъэкIыр ары темэ шъхьаIэу Iэнэ хъураем иIагъэр. Хэлэжьагъэмэ къагъэлъэгъуагъ хабзэм шъошэ зэфэшъхьафхэр иIэхэу щыIэн зэрилъэкIыщтыр: научнэ реконструкциеу тарихъ щыгъыным фашIырэм къыщыублагъэу непэрэ коллекциехэм ыкIи сценическэ образхэм анэсыжьхэу.

КультурологиемкIэ докторэу Наталья Калашниковам Урысые этнографическэ музеим чIэлъхэу зыфэдэ къэмыхъугъэ материалхэр къыгъэлъэгъуагъэх, ахэр гъучI ыкIи апч декорхэу Евразием илъэпкъхэм щыгъынымкIэ щагъэфедэщтыгъэх.

Искусствоведэу Христина Высоцкаям къыIотагъ белорусскэ лъэпкъ шэкIыр уахътьэм диштэрэ щыгъыным зэрэфэлажьэрэр.

Адыгэ лъэпкъ шъуашэм фэгъэхьыгъэ докладхэр анахьэу хэлажьэрэмэ ашIогъэшIэгъоныгъэх. ЕмыкI Нурджан хьазырмэ апылъ тарихъыр къыIотагъ, ахэр хъулъфыгъэмэ зыщалъэрэ цыем хэдагъэх. КIэдэкIое Нафсэт Мыекъопэ ыкIи Шытхьалэ Iуашъхьэмэ къачIахыгъэ бзылъфыгъэ шъуашэхэр зэрэзэтырагъэуцожьыгъэхэр, археологиер, методыкIэхэр ащ пае зэрагъэфедагъэхэр къыIотагъэх.

Iэнэ хъураер зэдэгущыIэжь шIагъоу щытыгъ, культурнэ кIэным мэкъэмакIэхэр фэхъугъэх. Шэн-хабзэхэр искусствэмкIи, гъэсэныгъэмкIи, креативнэ индустриемкIи амалышIоу зэрэщытхэр, джыри пыдз зэрэмыхъугъэхэр мыщ джыри зэ къыщынэфагъ.