Мыекъопэ къэралыгъо технологическэ университетым мэхьанэ зиIэ  хъугъэ-шIагъэ щыкIуагъ — зыкIыныгъэ Iофыгъохэм я Урысые мафэ, ащ программэу «Къулыкъу ахьызэ егъэджэгъэнхэм» ияплIэнэрэ едзыгъо къыщызэIуахыгъ. Iофтхьабзэм девизэу «ШIушIагъэр щыIэныгъэм иIахь» зыцIэр иIагъ, урысые гукъэкI инэу ныбжьыкIэхэр гуфэкIо ыкIи общественнэ Iофхэм ахэщэгъэнхэм и зы Iахьэу хъугъэ.

Егъэджэн IофшIэнымкIэ проректорэу ыкIи программэу «Къулыкъу ахьызэ егъэджэгъэнхэр» зыфиIорэм изещакIоу Людмила Задорожнаям ишIуфэс гущыIэкIэ Iофтхьабзэр къызэIуахыгъ. Ащ къекIолIагъэхэр IофшIэным фытыригъэпсыхьагъэх, шIуагъэ къэзытырэ егъэджээнхэр зэракIущтхэмкIэ гугъапIэхэр зэрэщыIэхэр къыгъэнэфагъэх.

Джащ фэдэу, къэзэрэугъоигъэмэ хьэкIэ лъапIэхэр къадэгущыIагъэх: муниципальнэ гъэпсыкIэ зиIэ «Къалэу Мыекъуапэ» инароднэ депутатхэм я Совет итхьаматэу Джармэкъо Азмэт; кIэлэцIыкIухэм ыкIи ныбжьыкIэхэм я Урысые общественнэ-къэралыгъо движениеу «Апэрэхэм я Движение» ишъолъыр къутамэ итхьаматэу Ованес Шекерьянц; автономнэ мыкоммерческэ организациеу «Мастерская ЛОВЗ» зыфиIорэм ипащэу Ирина Волинар.

ХьакIэмэ псалъэу къашIыгъэхэр студентхэмкIэ гукъыдэчъ шъыпкъэ хъугъэх: социальнэ чаныгъэ Iофыгъо зэфэшъхьафхэмкIэ къахэфэным, нэбгырэ пэпчъ обществэм хэхъоныгъэ егъэшIыгъэным иIахь хилъхьан зэрилъэкIыщтым тырагъэгушIухьагъэх.

Программэм ипрактическэ Iахь едзыгъуитIоу гощыгъагъэх. Апэрэр зэдэгущыIэгъоу угу къэзыгъэблырэм фэгъэхьыгъагъ. Ащ хэлэжьагъэхэ мыкоммерческэ организациехэм ащыщхэр, хабзэ лIыкIохэр ящыIэныгъэ щыщ щысэхэмкIэ къадэгощагъэх, обществэм къулыкъу фахьыным къыфэзыгъэущыгъэхэр къыраIотыкIыгъэх, яIофшIэнкIэ анахьэу уасэ зыфашIыхэрэр, шъолъырым ыкIи хэгъэгум хэхъоныгъэхэр егъэшIыгъэнхэмкIэ нахь мэхьанэ зиIэ Iахьэу ащ пае халъхьэрэр къыхагъэщыгъ. КъэгущыIагъэхэр зэкIэ ныбжьыкIэмэ къяджагъэх социальнэ Iофыгъохэм нахь чанэу ахэлэжьэнхэу. А гущыIэхэр студентмэ агухэм анэсыгъэх.

КъэгущыIагъэмэ ащыщыгъэх: къалэу Мыекъуапэ иадминистрацие ныбжьыкIэ политикэмкIэ иотдел ипащэу Егор Сергеевыр; Адыгэ Республикэм ибзылъфыгъэхэм я Союз хэтэу, предпринимательхэм я Клуб хэтэу, сервисым ыкIи уахътэм диштэрэ лъэпкъ еджапIэу «Тамэ» зыцIэм ипащэу Къохъужъ Саидэ, ВГТРК-м икъутамэу ГТРК «Адыгея» зыфиIорэм иинформационнэ программэхэм я Къулыкъу программэхэм ягъэхьазырынкIэ щыIэ купым изещакIоу Ахэджэго Рузаннэ; Мыекъопэ медицинскэ колледжым икIэлэегъаджэу, хэушъхьафыкIыгъэ дзэ операцием иветеранэу Сергей Скрыльникыр.

Студентмэ адашIыгъэ зэдэгущыIэгъур гъэшIэгъоныгъэ: ныбжьыкIэмэ упчIэхэр атыщтыгъэ, зещакIомэ джэуапхэр къатыжьыщтыгъэ ыкIи джэнджэшхэр къафашIыщтыгъэ. Ащ фэдэ зэдэгущыIэгъум опыт зэхъожьыныр къакIэлъыкIуагъ, обществэмкIэ шIуагъэ къэзытыщт системнэ IофшIэным хэщагъэхэ хъунымкIэ лъэубэкъухэр зэрадзын алъэкIыщтхэр къагурыIуагъ. Студентыбэмэ хагъэунэфыкIыгъ, зэдэгущыIэгъум ыуж яшъыпкъэу гукъэкIыкIэхэр яIэхэ зэрэхъугъэр, яунэе социальнэ гукъэкIхэм ахэр зэрахагъэхъощтхэр.

Социальнэ гукъэкIхэм яфестиваль къыдыхэлъытагъэу студентмэ япроектыкIэхэм лъэтегъэуцо кIэкIхэр афашIыгъэх. Программэу «Къулыкъу ахьызэ егъэджэгъэнхэм» нахьышIоу халъэгъуагъэхэр къыраIотыкIыхэзэ къыхагъэщыгъ профессиональнэ компетенциехэм хэхъоныгъэхэр зэрарагъэшIышъугъэхэр, джащ фэдэу пшъэдэкIыжьыр, команднэ IофшIэныр зыфэдэхэр агъэпытагъэх.

Iофтхьабзэм изэфэхьысыжьхэм къагъэлъэгъуагъ: программэу «Къулыкъу ахьызэ егъэджэгъэнхэм» хэлажьэхэрэр зэрипхыгъэх социальнэ пшъэрылъхэр агъэцэкIэнхэм фэшI, джащ фэдэу университетым иIофыгъуищмэ ащыщыр зэшIуахынэу. МКъТУ-м истудентхэу программэр зышIогъэшIэгъонхэм япчъагъи хэхъо: ыпэрэ илъэсым егъэпшагъэмэ, гъорекIорэ илъэс еджэгъум проектмэ ахэщагъэхэм япчъагъэ процент 25-кIэ нахьыбэ хъугъэ. Ащ къегъэлъагъо фэдэ шапхъэр апшъэрэ еджапIэм щыбгъэфедэныр зэрэтэрэзыр, социальнэ Iофыгъохэм зэрахэлажьэрэр нахьыбэ зэрэхъурэр.

Iофтхьабзэм хэлэжьагъэмэ проектым осэшхо къыфашIыгъ, социальнэ практикэмрэ профессиональнэ хэхъоныгъэмрэ зэрэзэпхыгъэхэр къыхагъэщыгъ. ТапэкIи социальнэ проектхэр агъэцэкIэнхэм зэрэфэхьазырхэр къыраIотыкIыгъэх. Ащ джыри зэ къеушыхьаты, МКъТУ-м гъэсэныгъэ шъолъырым зырегъэушъомбгъу, ащ социальнэ пшъэдэкIыжьыр щыщ шъыпкъэу, студент пэпчъ игъогогъоу мэхъу.