Сыдэущтэу къэпшIэщт зы гъомлапхъэр адрэм зэрэтекIырэр? Ащ иIэшIугъэ, мэу пихырэр, итекстурэ сыдэущтэу къипIотыкIыщтых? Шапхъэмэ атефэмэ таущтэу бгъэунэфыщт? Мэфитфым къыкIоцI а упчIэмэ яджэуапхэм щалъыхъугъэх яIэпэIэсэныгъэ зыщыхагъэхъорэ программэу «Органолептический (сенсорный) анализ в контроле качества продовольственного сырья и пищевых продуктов» зыфиIорэм хэлажьэхэрэр.

Егъэджэнхэр Мыекъопэ къэралыгъо технологическэ университетым щыкIуагъэх, Iофтхьабзэр Адыгэ Республикэм и Министрэхэм я Кабинетрэ Республикэу Беларусь и Правительствэрэ сатыу-экономическэ, научнэ-техническэ ыкIи социальнэ-культурнэ зэзэгъыныгъэу 2024-2026-рэ илъэсхэм ателъытагъэу зэдашIыгъэм елъытыгъэу зэхащагъ. Экспертэу ащ хэлэжьагъэх ыкIи къыщыгущыIагъэх научнэ IофшIэнымкIэ ыкIи стандартизациемкIэ РУП «НПЦ НАН Беларуси по продовольствию» зыфиIорэм игенеральнэ пащэ игуадзэу, техническэ шIэныгъэхэмкIэ кандидатэу Наталья Комаровар ыкIи гъомлапхъэмэ ядэгъугъэкIэ ыкIи ящынэгъончъагъэкIэ Республиканскэ лъыплъэкIо-ушэтэкIо комплексым ипащэу Кристина Рябовар.

Егъэджэнхэм ахэлажьэрэмэ шIуфэс къарихыгъ научнэ IофшIэнымкIэ инновационнэ хэхъоныгъэмкIэ МКъТУ-м ипроректорэу Татьяна Овсянниковам. Джащ фэдэу Iофтхьабзэм хэлэжьагъэх Урысыем и МИД и ЛIыкIоу Краснодар щыIэм АдыгеимкIэ иупчIэжьэгъоу Игорь Терзиян, IэкIыб зэпхыныгъэхэм ыкIи инвестициехэмкIэ республикэм и ЛIышъхьэ иIэпыIэгъоу Хьакъунэ Бэллэ.

Программэм къыдыхэлъытагъэу егъэджэным хэлажьэхэрэмэ Iоф адашIагъ шоколадыр, какаор, шъон зэфэшъхьафхэр, къуаехэр, нэкулъхэр, творогыр ыкIи печеньер зыхэлъхэм. Ахэр зэрагъэпшагъэх, яIэшIугъэ зынэсырэр, мэу къапихырэр, ятекстурэ зыфэдэхэр аушэтыгъэх, зэфэмыдэныгъэу ахэлъхэр къыхагъэщыгъэх. Практикэм методэу «А-р — А-рэп» ыкIи «треугольникыр» щызэрагъэшIагъэх, шъонхэр къызэрашIэщт тестхэр акIугъэх, ароматизатормэ адэлэжьагъэх, «Санэм ыпэ» зэхафыгъ. Сенсорнэ зэхашIэм шъхьафэу анаIэ тырадзагъ.

Программэр экскурсиеу ПивэшI заводэу «Майкопскэм» щакIугъэмкIэ аухыгъ. Зэфэхьысыжьэу фэхъугъэм елъытыгъэу яIэпэIэсэныгъэ зэрэхагъэхъуагъэр къэзыушыхьатыжьырэ дипломхэмрэ сертификатхэмрэ аратыжьыгъэх.

Мэфитф практикэм къыгъэлъэгъуагъ: сенсорнэ анализыр — ар занкIэ IофшIэн шъыпкъ, ащ «сыгу рехьы — рихьырэп» зыфэпIощтыр продуктым профессиональнэ уасэу фашIырэмкIэ щызэблахъужьы.