Непэ Мыекъопэ къэралыгъо технологическэ университетым хэхьэрэ Дзэ егъэджэн гупчэм ипчэгу курсантхэр сатырэу къиуцуагъэх. Апэрэ курсым щеджэрэ нэбгырэ 50-кIэ ар мэфэ хэгъэунэфыкIыгъагъ — Хэгъэгум къулыкъу фэпхьыным, дзэ сэнэхьатхэм якIурэ апэрэ лъэубэкъу.

Мы илъэсым курсант 20-м ехъу апэрэу запасым щыIэ офицерым ипрограммэкIэ еджэнхэу аублэ. Апэрэ курсыр дзэ ухьазырыныгъэм фэгъэхьыгъ, ащ ыуж дзэ-техническэ ухьазырыныгъэр къызфагъэфедэзэ къыхахыгъэ сэнэхьатым фагъасэх. Егъэджэнхэр закIухэрэ ужым, курсантмэ дзэ званиеу запасым щыIэ лейтенантыр къафагъэшъошэщт. Адрэ курсантхэу апэрэ курсым чIэсхэр запасым щыIэхэ солдат ыкIи сержантхэм япрограммэкIэ еджэщтых. Дзэ-учетнэ сэнэхьатхэм ахалъытэх оператор шъхьаIэхэу, механик шъхьаIэхэу пилот зэрымыс быбырэ пкъыгъохэр зыгъэIорышIэхэрэм афеджэхэрэм.

Непэрэ мафэм МКъТУ-м хэхьэрэ Дзэ егъэджэн гупчэм курсанти 190-рэ щеджэ. Дзэ ухьазырыныгъэм зыфэзыкъудыйрэмэ япчъагъэ гъэ къэс хахъо: мыгъэ запасым щыIэ офицерым ипрограммэкIэ егъэджэгъэнхэмкIэ зэнэкъокъоу зэхащагъэм къыгъэлъэгъуагъ зы чIыпIэм нэбгыритIу зэрэфэягъэр, адрэ сэнэхьатхэм — зырэ ныкъорэ. Ау цифрэмэ пчъагъэр ары къаIуатэрэр, курсантмэ ясатыр пэпчъ ежьхэм къыхахырэр ары къакIэлъыкIорэр. НыбжьыкIэхэу зистуденческэ илъэсхэр дзэ ухьазырыныгъэм, Хэгъэгум къулыкъу фахьыным, зыфагъэсэным зистуденческэ уахътэ тезыгъэкIуадэхэрэмэ шъхьэкIэфэныгъэр къалэжьы.

ПшъэдэкIыжьым, хабзэм уатетыным, дзэ ухьазырыныгъэм ягугъу къашIыгъ хьэкIэ лъапIэхэу торжественнэ Iофтхьабзэм хэлэжьагъэхэмэ, ахэмэ ащыщыгъ Адыгэ Республикэм иветеранхэм я Совет итхьаматэу Къуаджэ Аслъан, ащ курсантхэм ягъэхъагъэхэр къыхигъэщыгъэх ыкIи дзэ технологиехэм псынкIэу аужырэ уахътэм зэрахэхъуагъэр къыриIотыкIыгъ.

Пилот зэрымыс авиациер ары непэ чIыпIэшхо дзэ ухьазырыныгъэм щызыубытырэр, анахь лъэныкъо шъхьаIэу фэхъурэр.

Урысыем и ЛIыхъужъэу, АР-м и Къэралыгъо Совет-Хасэм итхьаматэ игуадзэу Цэй Эдуард къыкIигъэтхъыгъ: погонхэр — ыпэ рапшIэу пшъэдэкIыжьых. Джащ пае курсантмэ яеджэни язекIокIэ-шIыкIи пстэуми апшъэкIэ щыIэнхэ фае.

— Шъоры — тинеущыр, шъоры — Урысыем инеущхэр, — къыхигъэщыгъ Эдуард Кущыку ыкъом, курсантмэ хэхъоныгъэхэр еджэнымкIи гъэсэнымкIи ашIынхэу афэлъэIуагъ.

АР-м гъэсэныгъэмрэ шIэныгъэмрэкIэ иминистрэ игуадзэу Артем Журавель къыхигъэщыгъ Дзэ егъэджэн гупчэм шIуагъэу къытыхэрэр: курсантмэ гражданскэ гъэсэныгъэри зэрагъэгъоты, дзэ ухьазырыныгъэри агъоты, сэнэхьатэу къыхахыщтымкIэ нахь амалыбэ аIэкIэлъэу мэхъу.

— ЗэкIэхэми Хэгъэгум къулыкъу фахьышъурэп, — къыкIигъэтхъыгъ Артем Алексей ыкъом, курсантмэ гъогоу хахыгъэм гъэсэныгъэ дэгъу щагъотынэу къафэлъэIуагъ.

Торжественнэ зэхахьэм хьэкIэ гъэшIуагъэу иIагъ плIэгъогогъоу ЛIыхъужъыгъэм иорденмэ якавалерэу, федеральнэ программэу «ЛIыхъужъмэ яуахътэ» хэлэжьагъэу Сергей Ковалевыр.

Непэрэ торжественнэ сатырыр — ар къежьапIэ къодый. Курсантмэ апэ илъых илъэс еджэгъур, тренировкэхэр, сатыр, машIо ыкIи дзэ-техническэ ухьазырыныгъэм зыфагъэсэныр, ушэтынхэр атынхэр. Ахэмэ зэкIэмэ шэн пытэрэ лIыгъэрэ ящыкIагъ.

ИлъэсыкIэ еджэгъур курсантмэ гъогу шIагъо афэрэхъу, кIуачIэрэ акъылырэ агъотызэ ащ рэрэкIох!