Къалэу Нижний Новгород я VI-рэ форумэу «ГукъэкI лъэшхэр лъэхъаныкIэм пае» зыфиIорэр щыкIуагъ, крауд-платформэм гукъэкI мин 48-рэ къатыгъ — Урысыем ишъолъыр 89-мэ ыкIи IэкIыб хэгъэгу 30-мэ яавторхэр ары зигукъэкIыгъэхэр.

Мыекъопэ къэралыгъо технологическэ университетыр форумым къыщызгъэлъэгъуагъэр мэкъу-мэщ продукцием икъыдэгъэкIыжьын технологиехэм якафедрэ икIэлэегъаджэу ыкIи иаспирантэу Андрей Собкаловыр ары. Научнэ пащэр — мэкъу-мэщ шIэныгъэхэмкIэ докторэу Мамсыр Нурбый. Сессиеу «Технологии управления природой и ее экосистемными функциями» зезыщэгъэ Андрей Владимир ыкъом лъэтегъэуцо фишIыгъ зэхэгъэуцуагъэу «Автономнэ псэупIэхэу кластернэ хэхъоныгъэ зышIырэ симбиотическэ биоэкономикэр ыкIи чIыопсым фэдэ (регенеративнэ) мэкъу-мэщыр» зыфиIорэм. Зэхэгъэуцуагъэм ылъапсэр — автономнэ псэупIэхэр гъэпсыгъэнхэр, биоэкономикэр, промышленнэ симбиозыр ыкIи чIыопсым фэдэ мэкъу-мэщыр зэзыпхыхэрэр. ЗэрэенэгуехэрэмкIэ, производственнэ процессхэр зэпхыгъэщтых: ресурсхэр ыкIи фэшъхьаф продуктхэу зы лъэныкъом фэгъэзагъэхэр нэмыкIымкIэ агъэфедэшъущтых, мэкъу-мэщым хахъохэр ышIыщтых экосистемэр къыдилъытэзэ, ресурсхэр сакъыхэзэ агъэфедэхэзэ.

Къыхахыгъэмэ зэфэхьысыжьхэр зыфашIыхэм, гукъэкI мин 48-м щыщэу МКъТУ-р топ-300-м хэхьагъ. Ащ игъэцэкIэн пае IэпыIэгъум федеральнэ ыкIи шъолъыр хабзэхэм ащыкIэлъэIугъэх. Урысые Федерацием и Правительствэ — экспериментальнэ правовой режимэу автономнэ псэупIэхэм ягъэпсынкIэ зэхагъэуцуагъэм дэIэпыIэныр. Адыгэ Республикэм и Правительствэ — автономнэ псэупIэхэу пчэгум къихьэрэмэ япилотнэ агробиоэкономическэ кластерыр гъэцэкIэгъэнымкIэ чIыгу Iахьым зегъэушъомбгъугъэным пае IэпыIэгъу къафэхъуныр.

Ахэмэ афэшъхьафэу, Андрей Собкаловыр пленарнэ зэхэсыгъоу Урысые Федерацием и Президентэу Владимир Путиныр зыхэлэжьагъэм чIэсыгъ.

МКъТУ-м иIофшIэн форумым экспертнэ лъэныкъомкIэ щылъагъэкIотагъ. Маркетингым, сервисым ыкIи туризмэм якафедрэ идоцентэу, МКъТУ-м и «Точка кипение» ипрограммнэ пащэу, «Профессионал ныбжьыкIэхэр» зыфиIорэ IофшIэнымкIэ АСИ-м иобщественнэ лIыкIоу АР-м щыIэ Светлана Новиковар проектнэ ыкIи шъолъыр экспертхэм ясессие хэлэжьагъ. Сессием гукъэкIхэр акъылыгъэ ахэлъэу зэрэлъагъэкIотэщтхэм атегущыIагъэх — автормэ ыкIи экспертнэ уасэ зышIыщтмэ уалъыхъуным къащыублагъэу ягъэцэкIэн нэсыжьэу. Шъхьафэу анаIэ тырадзагъ гукъэкIхэм яэкспертизэ искусственнэ интеллектыр зэрэхэлажьэрэм.

МКъТУ-р форумым яхэнэрэ илъэс хъугъэу хэлажьэ. Адыгэ Республикэм университетыр «Точка кипением» къыщегъэлъагъо: командэм стратегическэ сессиехэр гукъэкIмэ яавтормэ ыкIи хэбзэ органмэ ялIыкIомэ адырегъэкIокIы, ахэмэ ягъэцэкIэнкIэ амалхэр къегъоты.