Апэрэ курсым къычIэхьэгъэ нэбгырэ 2000-м ехъумэ ящыIэныгъэкIэ едзыгъуакIэр рагъажьэ. Джыри тыгъуасэ —еджэпIэ одыджынхэр, чIэтIупщыгъор, зэсагъэхэ еджапIэхэр, джы непэ — университет, апэрэ лъэубэкъухэу ежь-ежьырэу адзыхэрэр, илъэс заулэу шIэныгъэхэмкIэ аушъэщтхэр, хъугъэ-шIагъэхэр, зэхэхьэ гъэшIэгъонхэу агу къинэщтхэр!

Непэ ахэр Мыекъопэ къэралыгъо технологическэ университетым истудентэу хъугъэх, университетым иунэгъошхо джы щыщых. Апэрэ курсым къычIэхьагъэмэ апэгъокIыгъэх кIэлэегъаджэхэр, деканхэр ыкIи студент нахьыжъхэр.

ШIуфэс псалъэкIэ къэзэрэугъоигъэмэ закъыфигъэзагъ гъэсэныгъэмрэ шIэныгъэмрэкIэ Адыгэ Республикэм иминистрэ игуадзэу Артем Журавель: «Илъэс 11-рэ шъо еджапIэмэ шъуащеджагъ, тэры шъуезыгъэджагъэр, джы тигуапэу Мыекъопэ къэралыгъо технологическэ университетым ыIэ шъуитэлъхьэ. Мыщ нэбгырэ пэпчъ сэнэхьат къодыеп щигъотыщтыр, проектэу университетым дэдгъэцакIэрэмэ шъуахэлажьэзэ, щыIэныгъэ опыти щызэригъэгъотыщт. Сэ сыгу къыздеIэу сышъуфэлъаIо а илъэсиплI еджэгъур, зэгорэхэмкIэ тфыр, анахь насыпышIо уахътэ шъуфэхъунхэу, дэгъу дэдэу шъуеджэнхэу, шIэныгъэ, опыт ыкIи лъапсэ пытэ щыжъугъотынхэу! Джары шъуинеущрэ мафэ, шъуисэнэхьатыщтыр зэлъытыгъэщтхэр, тапэкIэ хэхъоныгъэу шъушIыщтхэр. ЗэкIэхэми студент статусыкIэ шъуиIэ зэрэхъугъэмкIэ сышъуфэгушIо, шъуигухэлъхэр къыжъудэхъунхэу сышъуфэлъаIо!».

Ащ къыкIэлъыкIоу МКъТУ-м иректорэу Къуижъ Саидэ къэзэрэугъоигъэхэм къадэгущыIэзэ къыхигъэщыгъ: «Тэ, Iэшъхьэтетхэм якомандэ, тфэшIэщтыр зэкIэ тэшIэ шъо апшъэрэ гъэсэныгъэ дэгъу зэжъугъэгъотыным пае. Джы шъо къышъолъытыгъэщтыр макIэп — амалэу щыIэхэр, университетым къышъупигъохыхэрэр къызфэжъугъэфедэнэу зыжъугъасэх. ГукъэкIхэм ашъхьэ къишъухых, IофыгъуакIэмэ, проектыкIэмэ ыкIи студенческэ щыIакIэм къыздихьырэ Iофтхьабзэмэ шъуахэлажьэх! Хэхъоныгъэхэр шъушIынхэ гухэлъ шъуиIэмэ, шъучанынэу шъуфаемэ, университетскэ щыIакIэр шъоркIэ гъэшIэгъоныщт, ар хъугъэ-шIэгъэ гъэшIэгъонхэмкIэ ушъэгъэщт. Джырэблагъэ, Iоныгъом и 17-м, апэрэ курсым къычIэхьагъэмэ я Мафэ зыщыхагъэунэфыкIырэм, шъо нэIуасэ студенческэ объединениемэ ыкIи научнэ лабораториемэ шъуафэхъушъущт, университетым фэгъэхьыгъэ къэбарым нахь шъущыгъозэн шъулъэкIыщт, шъоркIэ нахь гъэшIэгъоныри къыхэшъухышъущт. ШIуагъэ къытэу шъуеджэнхэу, тиуниверситет шIэныгъэ куухэр щызэжъугъэгъотынхэу сышъуфэлъаIо!».

МэфэкIымкIэ анахь мэхьанэ зэратыгъэр апэрэ курсым ихьэгъэ студентхэу балл инхэр зиIэхэм яхэгъэунэфыкIын ары. Мыгъэ ащ фэдэ студентэу нэбгырэ 18 университетым къычIэхьагъ, зэкIэхэри къычIахьэхэ зэхъум ягъэхъагъэхэмкIэ къыхагъэщыгъэх.

Iоныгъом иа 1-рэ мафэр — лIэужхэм язэпхыныгъэ зыщызэхэпшIэрэ уахът. Университетым ипчъэ шъхьаIу зымэ зэпачы къодый, адрэхэм ягъогу щаухы. Шъугу къэдгъэкIыжьын, 2026-рэ илъэсым Мыекъопэ къэралыгъо технологическэ университетым идипломхэр нэбгырэ 635-мэ аратыжьыгъэх, ахэмэ ащыщ 335-р Медицинскэ институтым къычIитIупщыгъэх.

Джащ тетэу МКъТУ-м итарихъ лъэкIуатэ — апэрэ университетскэ мафэм къыщыублагъэу чIэтIупщыгъом нэсэу, апэрэ десэхэм къащыублагъэу профессиональнэ текIоныгъэмэ анэсыжьэу.

Апэрэ курсым чIэхьагъэхэр, непэ шъо шъуитарихъ икъежьапI. Ар гъэшIэгъонэу, хъугъэ-шIагъэхэмкIэ ушъагъэу, насыпыр изэу орэхъу! ШIэныгъэм и МафэкIэ тышъуфэгушIо!