Казань дэт Технопаркым иплощадкэ технологие инхэм ясферэ хахьэрэ «ИТ-паркым» информационнэ-аналитическэ сессиер щэкIо, ар инженернэ гъэсэныгъэр шъолъыр университетхэм нахьыбэ ащышIыгъэнхэм афэгъэхьыгъ.

Сессием хэгъэгум ишъолъыр университетхэм ащылажьэхэрэ ректорхэмрэ проректорхэмрэ зэрипхыгъэх. Мыекъопэ къэралыгъо технологическэ университетыр Iофтхьабзэм къыщызгъэлъагъорэр, ректорэу, экономикэ шIэныгъэхэмкIэ докторэу Къуижъ Саид ары.   

IофшIэным итемэ гупчэу хъугъэр гъэсэныгъэ моделым итрансформациерэ непэрэ уахътэм диштэрэ инженернэ кадрэмэ ягъэхьазырынрэ, ащ  технологическэ пшъэрылъхэу урысые экономикэм ыкIи промышленностым апашъхьэкIэ щытхэр къыщыдэлъытагъэхэу зэрагъэзэфэнхэр ары.  

Пленарнэ Iахьэу «Инженернэ гъэсэныгъэр непэ: пшъэрылъхэр ыкIи амалхэр» зыфиIорэр зэрищагъ наукэмрэ апшъэрэ гъэсэныгъэмрэкIэ Урысые Федерацием и Министрэу Валерий Фальковым. Министрэм къыхигъэщыгъ, апшъэрэ инженернэ гъэсэныгъэм лъапсэ зиIэ Iофыгъоу иIэр  технологическэ зэкIэлъыкIуакIэр арэу зэрэщытыр, ащ джащ фэдэу хахьэ искусственнэ интеллектым итехнологиехэм зягъэушъомбгъугъэныр, ахэмэ, зы лъэныкъомкIэ IофшIэным ибэдзэр зэрахъокIы, адрэ лъэныкъомкIэ — университетыр сыд фэдэрэ Iофмэ афэмыгъэзагъэми.

— «Технологическэ повесткэм Iоф дэпшIэныр ыкIи ащ къытырэ шIуагъэр  лъапсэ афэхъунэу щытыр апшъэрэ инженернэ гъэсэныгъэм хэхъоныгъэ егъэшIыгъэным пае», — къыкIигъэтхъыгъ министрэм.

Кейс-сессиеу «Опыт региональных университетов по трансформации образовательной модели инженерного образования» зыфиIорэм къыдыхэлъытагъэу яунэе практикэхэр къэзгъэлъэгъуагъэхэр Казанскэ лъэпкъ ушэтэкIо технологическэ университетым иректорэу Юрий Казаковыр, Альметьевскэ къэралыгъо технологическэ университетэу «ЧIыдагъэм иапшъэрэ еджапIэ» зыфиIорэм иректорэу Александр Дьяконовыр, Заполярнэ къэралыгъо университетэу Н.М. Федоровскэм ыцIэ зыхьырэм иректорэу Евгений Голубевыр, Лъэпкъ ушэтэкIо Томскэ политехническэ университетым иректор ипшъэрылъхэр зыгъэцэкIэрэ Леонид Сухихыр.

Программэм шъхьафэу хэтыгъ экспертнэ-лъэтегъэуцо сессиеу «Пилотные университеты как сетевой ресурс инженерного образования в регионах» зыфиIорэр. Московскэ къэралыгъо техническэ университетэу Н.Э. Бауманым ыцIэ зыхьырэм иректорэу Михаил Гординым шъолъыр университетхэмрэ IофшIэпIэ чIыпIэ къэзытыхэрэмрэ ягъэсэныгъэ программэ екIолIакIэу яIэхэр къыгъэлъэгъуагъэх.

Санкт-Петербургскэ къэралыгъо хы техническэ университетым иректорэу Глеб Туричиным шъолъыр апшъэрэ еджапIэмэ практикоцентричнэ моделэу яIэхэм хэхъоныгъэхэр ягъэшIыгъэнхэмкIэ университетым амалэу иIэхэр къыIотагъэх. Анахьэу ынаIэ зытыридзагъэр непэрэ уахътэм диштэрэ технологическэ Iэмэ-псымэхэр ары, ахэмэ ащыщых цифрэ тIуазэхэр ыкIи  3D-моделированиехэр, джащ фэдэу сетевой гъэсэныгъэ программэхэм ягъэцэкIэн.  

Практическэ Iахьэу сессием хэтыр зэхэт IофшIэнэу шапхъэу   «ГъэIорышIэкIо мастерскоимкIэ» лъагъэкIотагъ, ар зэрищагъ  Максим Семибратскэм. Университетмэ япащэхэм лъэныкъуплIыкIэ Iоф ашIагъ: инженернэ гъэсэныгъэр трансформацие шIыгъэнымкIэ пшъэрылъхэр агъэнэфагъэх, амалэу щыIэхэр зэфахьысыжьыгъэх, щыкIагъэхэр, джащ фэдэу гъэIорышIэн пшъэрылъхэр ыпэ рагъэшъыгъэх.

Информационнэ-аналитическэ сессием шъолъыр университетмэ япащэхэу хэлэжьагъэмэ амал агъотыгъ  практикэхэмкIэ яхъожьынхэу, инженернэ кадрэхэм ягъэхьазырынкIэ щыIэ модельхэм ахэплъэжьыгъэх ыкIи гъэсэныгъэ программэу непэрэ уахътэм диштэрэ технологическэ процессхэм хэхъоныгъэхэр ягъэшIыгъэнхэмкIэ гупшысэу щыIэхэр къыраIотыкIыгъэх.

МКъТУ-кIэ инженернэ гъэсэныгъэр гъэкIэжьыгъэным мэхьанэ иI. Сессием практикэу ыкIи  предложениеу къыщахьыгъэхэр зэфахьысыжьынхэшъ, тапэкIэ Мыекъопэ къэралыгъо технологическэ университетым иинженернэ лъэныкъохэм ащигъэфедэщтых.