Мэфиблырэ шэтэрмэ ачIэсыгъэх, къушъхьэм дэкIоягъэх, чэщ кIасэм нэс зэдэгущыIэгъухэр, нэIосакIэхэр ашIыгъэх, гукъэкIыкIэхэр къадэхъугъэх, ахэмэ ащыщыбэхэр щыIэныгъэм джыри щыпхыращынхэу апэ илъых. Джащ фэдагъ гъэсэныгъэ программэу «Урысыем ущыпсэуныр ыкIи щыбгъэпсыныр» зыфиIорэм иятIонэрэ модуль, ар Урысые ныбжьыкIэ форумэу «Машук» зыфиIорэм иятIонэрэ сменэ къыдыхэлъытагъэу зэхащэгъагъ.

Пятигорскэ щыIэ Комсомольскэ гъэхъунэм форумым хэлажьэхэрэр упчIэмэ джэуапхэр къащыратыжьыгъэх: тихэгъэгу инеущрэ мафэ зыфэдэщтыр ыкIи ащ нэбгырэ пэпчъ непэ фишIэн ылъэкIыщтыр. Мыекъопэ къэралыгъо технологическэ университетыр программэм къыщызгъэлъэгъуагъэхэр: студенткэу Арина Астаховар ыкIи проектэу «О уикIогъум» имодераторэу, студенткэу НапцIэкъо Рузан.

Тхьэмафэм къыкIоцI хэлажьэхэрэр лекциемэ ядэIугъэх, экспертмэ аIукIагъэх, гукъэкIмэ атегущыIагъэх, зэхэгущыIэжьыгъэх, форсайт-сессиехэм Iоф ащашIагъ, непэрэ хъурэ-шIэхэрэр зэфахьысыжьыгъэх, обществэм зэхъокIыныгъэхэр фэзышIышъущтхэм зэдяусагъэх. Ащ дакIоу шэтэрмэ ачIэсыгъэх, Машукрэ Бештаурэ адэкIоягъэх, пчыхьэрэ зэIукIэхэр яIагъэх, охътэ кIэкIым къыкIоцI хэлажьэхэрэр зэпэблагъэ хъущтыгъэх.

Аринэ изэхашIэ къызэкIор ары модулым имэхьанэ къызгурыIуагъэр: «Бгъэпсыным» къикIырэп зы гъэшIэгъонышхо горэ, шIыкIэ цIыкIухэмкIэ ебгъажьэми хъущт, уищыIэныгъэ зэрэплъэгъурэм елъытыгъэу ар ошIы. Сэ бгъэпсыным мэхьанэу къикIырэр къызгурыIуагъ, ар о уинеущрэ мафэ зэрэплъэгъурэм елъытыгъэу лъэубэкъукIэхэр фэудзынхэр ары».

НапцIэкъо Рузанэ джащ фэдэу иеплъыкIэхэмкIэ къыддэгощагъ: «ГъэшIэгъон горэм ущыщыныр тхъагъо ыкIи ащ осэшхо иIэу щыт. Зыфэдэ къэмыхъугъэ проектым тыхэлажьэзэ тэ пшъэрылъыкIэхэр дгъэуцугъэх, упчIабэмэ талъыIэсыгъ, татегущыIагъ. Ау анахь шъхьаIэр тапэкIэ щыI — ар щыIэныгъэу мафэ къэс тызыхэтыгъэм тызыхэхьажьырэм дгъэфедэщт, джащыгъум Iофхэм ауж тихьащтых. Сицыхьэ телъ, ныбжьыкIэмэ ащ пае амалышIухэр яIэх. Мы опытым щыщ тызэрэхъугъэмкIэ зэхэщакIохэм тафэраз, тхьаегъэпсэух, неущрэм непэ тенэсын тлъэкIыгъэ».

Форумыр зэфашIыжьыгъ, шэтэрхэр аугъоижьыгъэх, къушъхьэ лъэгапIэхэр аштагъэх, хэлэжьагъэхэр зэбгырыкIыжьыгъэх. Ау, анахь Iофыгъо шъхьаIэр джы рагъажьэ къодый. ТапэкIэ — еджэныр, IофшIэныр, унэе проектхэр, мэфиблым къыкIоцI къаугупшысыгъэ гукъэкIхэр щыIэныгъэм щыпхырыщыгъэнхэр, джахэр щыIэх. Неущрэр ежь-ежьырэу къэхъурэп. Ар агъэпсы, непэ езгъажьэхэрэр ары ащ лъыIэсхэрэр.

Сурэтхэр проектэу «О уикIогъум» ипресс-къулыкъу иех.