Адыгэ Республикэм хэушъхьафыкIыгъэ операцием хэлэжьагъэмэ япрофессиональнэ ухьазырыныгъэ фэгъэхьыгъэ программэу «Къэралыгъо ыкIи муниципальнэ гъэIорышIэныр. Адыгеим и ЛIыхъужъхэр» зыфиIорэр щызэфашIыжьыгъ.

Программэр Мыекъопэ къэралыгъо технологическэ университетым ибазэ щагъэцэкIагъ, ащ хэлэжьагъэх Урысые Федерацием и Президент дэжь щыIэ къэралыгъо къулыкъум ыкIи народнэ хъызмэтым я Урысые академие, гъэIорышIэнымкIэ Къыблэ-Урысые институтыр — къутамэу РАНХиГС ыкIи Адыгэ Республикэм и Правительствэ. Зэхэщэн Iофхэм ауж итыгъэр къэралыгъо ыкIи муниципальнэ къулыкъушIэмэ яIэпэIэсэныгъэ зыщыхагъахъорэ Гупчэр ары.

Илъэсым къыкIоцI нэбгырэ 18-мэ егъэджэнхэр акIугъэх, академическэ сыхьат 502-рэ ар зэрэхъугъэр. Ащ очнэ модули 4 хэтыгъ, зэкIэмкIи мэфэ 11 икIахьыгъагъ, модульхэм азыфагукIэ стажировкэу рагъэкIокIыгъэхэм пэщэныгъэ ащызэрахьагъ гъэсакIохэмэ, ахэр ары ушэтынхэр, зэфэхьысыжь тестированиер ыкIи чIэтIупщыгъо квалификационнэ IофшIэнхэр языгъэк1угъэхэр. Егъэджэным лекционнэ ыкIи практическэ десэхэр къыдилъытэщтыгъэх, джащ фэдэу тренингхэр ыкIи командэхэр зыщызэхащэхэрэ практикэхэр, культурнэ, спортивнэ ыкIи дэкIыгъо Iофтхьабзэхэр.

Программэм хэлажьэхэрэр къэралыгъо ыкIи муниципальнэ къулыкъушIэмэ нэIуасэ афэхъугъэх, муниципальнэ псэупIэу Адыгеим итхэр къакIуахьыгъэх, организацие зэфэшъхьафмэ ялIыкIомэ зэIукIэгъухэр адыряIагъэх. Еджэным къыдыхэлъытагъэу Теуцожь ыкIи Мыекъопэ районхэм ащыIагъэх, спортивнэ, культурнэ Iофтхьабзэмэ ахэлэжьагъэх, шъолъырым итарихъ чIыпIэ шIагъохэр зэрагъэлъэгъугъэх, ЛIыхъужмэ я Аллее агъэтIысхьагъ.

ЕгъэджэнымкIэ мэхьанэшхо зэратырэ Iахьэу хэтыгъэр модульхэм азыфагукIэ рагъэкIокIыгъэ стажировкэхэр ары, министерствэхэмрэ ведомствэхэмрэ, Адыгэ Республикэм имуниципальнэ псэупIэхэмрэ организациешхохэмрэ ашъхьащытхэу ахэр зэхащэгъагъэх.

Егъэджэнхэм къызэрагъэлъэгъуагъэмкIэ, гурыт зэфэхьысыжь тестированиеу ВШГУ РАНХиГС иплатформэ щашIыгъэм процент 84-рэ къытыгъ. Кадровэ программэмкIэ опытэу Адыгэ Республикэм иIэр адрэ шъолъырхэми аштэу аублагъ: федеральнэ программэу «Время героев» зыфиIорэм иэкспертнэ совет уасэу къышIыгъэмкIэ, гъэсэныгъэ программэр анахь дэгъоу зыщакIугъэ шъолъырхэм республикэр ахалъытагъ. ГущыIэм пае, 2026-рэ илъэсым ижъоныгъокIэ мазэм Адыгэ Республикэм и Правительствэ, къэралыгъо ыкIи муниципальнэ къулыкъушIэмэ яIэпэIэсэныгъэ зыщыхагъахъорэ Гупчэу МКъТУ-м хэтыр зэгъусэхэу программэу «Герои Херсонщины» зыфиIорэм иящэнэрэ очнэ модулыр рагъэкIокIыгъ.

Джыри мэхьанэшхо зэратырэ зы Iофтхьабзэу хъугъэ командэу «Адыгеим и ЛIыхъужъхэр» апэрэ шъолъыр спортивнэ зэнэкъокъухэу «Кубок героев» зыцIэм зэрэщытекIуагъэр, ар Республикэу Къырым 2026-рэ илъэсым иIоныгъо мазэ щызэхащэгъагъ. Адыгеим икомандэ общекоманднэ зачетым щытекIуагъ.

ЗэфашIыжьыгъэ модулыр зэфэхьысыжь аттестацием изыфэгъэхьазырын ыкIи непэрэ технологиехэм ягъэIорышIэн афэгъэхьыгъагъ. Нэбгырэ 18-у хэлэжьагъэмэ зэкIэмэ ар дэгъоу акIун алъэкIыгъ. Нэбгырэ 11-мэ дэгъу дэдэкIэ ар къаухыгъ, нэбгыриблымэ «дэгъурэ» «дэгъу дэдэрэкIэ» ушэтынхэр атыгъэх.

Адыгэ Республикэм и ЛIышъхьэу КъумпIыл Муратэ къызэрэхигъэщыгъэу: «ЧIатIупщыгъэмэ гъогушхо къакIугъ — Хэгъэгум къулыкъу фахьыгъ, хэушъхьафыкIыгъэ дзэ операцием хэлэжьагъэх. Iашэр аIыгъэу Урысыем ишIоигъоныгъэхэр ахэмэ къаухъумагъэх. Опытышхоу аIэкIэлъыр мамырныгъэ уахътэми агъэфедэшъущт. Непэ тэ тиреспубликэ ыкIи зэрэхэгъэгоу ащ фэдэ цIыфхэр ящыкIагъэх — Iофым пылъ цIыфхэр. Ахэмэ гущыIэм уасэу иIэр ашIэ, унашъом ыкIи цIыфыпсэм. Командэм хэтэу Iоф зышIэшъурэр, сыд фэдэрэ къиныгъоми атекIошъущт. Сэ сицыхьэ телъ, гъэсэныгъэ программэм ишIуагъэкIэ шIэныгъэу агъотыгъэхэр къазэрэшъхьэпэщтхэм, сыд фэдэрэ пшъэрылъ афамыгъэуцугъэми, щытхъу пылъэу зэрагъэцэкIэщтым, республикэм къулыкъу фахьызэ яIоф шIагъо зэрэлъагъэкIотэщтым. Iофэу агъэцэкIэщтым уасэ шъхьаIэ къыфэзышIыщтыр Адыгэ Республикэм щыпсэурэ цIыфмэ ялъытэныгъэу къалэжьыщтыр ары».

УзэкIэплъэжьмэ — зы илъэс еджэгъу, практическэ IофшIэнхэр, стажировкэхэр, зэIукIэгъухэр, ушэтынхэр. ТапэкIэ — едзыгъуакI ыкIи шIэныгъэу агъотыгъэхэмкIэ хэгъэгум шIуагъэ къыфэхьыгъэныр.

ЗэкIэ къычIатIупщыгъэмэ егъэджэнхэр зэраухыгъэхэмкIэ тафэгушIо! ТапэкIэ пшъэрылъыкIэхэр ыкIи гъэхъагъэхэр щарагъотых!