КIэлэеджакIом аттестатыр къызыратыжьырэм ыуж, сыд фэдэ гъогуа къыкIущтыр? Сыд фэдэ сэнэхьатхэр ара непэ ящыкIагъэхэр? Сыд фэдэ амала тиуниверситет къытырэр а сэнэхьатхэм афегъэджэгъэнхэм пае?

Мы упчIэмэ яджэуапхэм щалъыгъугъэх республиканскэ шышъхьэIу кIэлэегъэджэ зэхэсыгъоу гъэсэныгъэм иIофышIэмэ апае зэхащэгъагъэм. Зэхэсыгъом иIофшIэн хэлэжьагъ Адыгэ Республикэм и ЛIышъхьэу КъумпIыл Муратэ.

Мыекъопэ къэралыгъо технологическэ университетым къыгъэлъэгъуагъ непэрэ гъэсэныгъэр зэфэшъхьафыбэу щытын зэрилъэкIыщтыр — агротехнологиехэм ыкIи научнэ ушэтынхэм къащыублагъэу медицинэмрэ офтальмологиемрэ анэсыжьэу.

Аграрнэ технологиехэм яфакультет гъэсэныгъэ программэу къыгъэлъэгъуагъэмэ агропромышленнэ комплексым пае специалистхэр зэрагъэхьазырыхэрэ шIыкIэр къащеты. Хэлажьэрэмэ къафаIотагъ федеральнэ проектэу «Кадры в АПК» зыфиIорэм фэгъэхьыгъэу, ащ джыри еджэпIэ уахътэм къыщыублагъэу неущрэ специалистхэм ягъэхьазырын зыщыкIорэм анэсыжьэу зэлъеубытых. Интерактивнэ зонэм амал къаритыгъ непэрэ уахътэм диштэрэ технологиехэм ыкIи оборудованиехэм нэIуасэ афэхъунхэу, джырэкIэ мэкъу-мэщ отраслэм щагъэфедэхэрэм. Шъхьафэу МКъТУ-м иIэшIагъэхэм анаIэ тырадзагъ — сымаджэ хъугъэхэр зэрагъэхъужьхэрэ уц Iэзэгъумэ ачIыпIэкIэ агъэфедэшъущтхэм, ахэр Адыгеим къыщыкIыхэрэмэ ахашIыкIых. Джыри зы экспозицие МКъТУ-м хэхьэрэ Медицинскэ институтым лъэныкъоу офтальмологием къыгъэлъэгъуагъ. Мыщ Iофтхьабзэм хэлажьэрэмэ апашъхьэ къащыралъхьагъ материалхэу ортокератологиер зыхашIыкIыхэрэр — непэрэ уахътэм диштэрэ методэу миопиер коррекцие зэрашIырэр, ащ пае хэушъхьафыкIыгъэ чэщ линзэхэр къызфагъэфедэхэзэ.

Неущрэм исэнэхьатхэм якъыхэхын непэрэ зэхашIэм къыщежьэ, ар плъэгъуныр ыкIи уекIуныр оры зэлъытыгъэр.