Мыекъопэ къэралыгъо технологическэ университетым инновационнэ гъэсэныгъэ проектэу «Фермерым иеджапIэ. Непэрэ уахътэм диштэрэ технологиехэу организациемэ яIэхэр ыкIи фермерскэ хъызмэтым шIуагъэ къытэу зещэгъэныр» зыфиIорэм ия 13-рэ едзыгъо щырагъэкIокIы. Проектыр зэрящыкIагъэр къаушыхьатыжьыгъах: ыпэкIэ щыIэгъэ егъэджэнхэр дэгъоу хъугъэх ыкIи мэкъумэщышIэмэ зэрашIогъэшIэгъоныр къэнэфагъ.

2026-рэ илъэсым гъэсэныгъэ программэр нэбгырэ 59-мэ лъэныкъуитIумкIэ акIу: «Пхъэшъхьэ-мэткIо продукцием ипроизводствэ» ыкIи «Былымхъуным хэхъоныгъэ егъэшIыгъэныр, гъэщымрэ лымрэ ащ дыхэтхэу» зыфиIохэрэмкIэ. Программэм къыдыхэлъытагъэх теоретическэ ухьазырыныгъэмрэ практическэ десэхэмрэ зэгъусэхэу, ащ ишIуагъэкIэ къэдаIорэмэ уахътэм диштэрэ шIэныгъэхэр зэрагъэгъотых, унэе мэкъу-мэщ хъызмэтыр зэрахьаным фэкъулаехэу мэхъух.

Гъэсэныгъэ программэм ипащэр — мэкъу-мэщ хъызмэт продукцием ипроизводствэ технологиехэм якафедрэ ипащэу, мэкъу-мэщ шIэныгъэхэмкIэ докторэу Мамсыр Нурбый.

Гъэсэныгъэ  процессым мэхьанэ зиIэ Iахьэу хэтыгъ экспертхэр-практикхэр, агробизнесым ыкIи Iоф зышIэрэ предпринимательхэр зэрэхэлэжьагъэхэр. Ахэмэ япрофессиональнэ опыт ишIуагъэкIэ отраслэм иIофшIэн нахь нэIуасэ фэхъунхэ алъэкIы, гъэIорышIэкIо шIыкIэхэр, мэкъу-мэщ хъызмэт зехьаныр зэрагъашIэ.  

Неущрэ фермерхэм япрограммэ елъытыгъэу экскурсие зэхащэгъагъ, Адыгэ Республикэм и Автономнэ учреждениеу «Республиканскэ бизнес-инкубаторыр» зыфиIорэм щыIагъэх. Организацием Iофэу ыгъэцакIэрэм, сатыушIэ гурытым ыкIи цIыкIум IэпыIэгъоу рагъэгъотырэм, апэрэ едзыгъом бизнесым пылъхэр щыпымыужьынхмкIэ шIэгъэн фаехэм хэлажьэхэрэр щагъэгъозагъэх, проектыкIэхэр агъэцэкIэнхэмкIэ ащ мэхьанэшхо зэриIэм щэч хэлъэп.

Бизнес-инкубаторым ипшъэрылъ шъхьаIэр предпринимательскэ чаныгъэм дегъэштэгъэныр, ишIуагъэ рагъэкIыныр ыкIи хъызмэтшIэпIакIэхэр зэхэщэгъэнхэр. ФэгъэкIотэнхэр ахэмэ зэрафашIыхэрэм къыхэкIэу, езыгъэжьэгъэкIэ предпринимательхэм амал агъоты ашIэрэ Iофым яцыхьэ пытэ телъынэу, хэхъоныгъэхэр ашIынхэу.  

Университетым проектэу «Фермерым иеджапIэу» щызэхащэрэр квалифицированнэ специалистхэр агропромышленнэ комплексым фэгъэхьазырыгъэнхэм фэIорышIэ, Адыгэ Республикэм мэкъу-мэщ хъызмэтшIапIэхэм хэхъоныгъэхэр щашIынхэмкIэ ишIуагъэ къегъакIо.