Обществэу «ШIэныгъэм» игъэсэныгъэ лекциехэр шъолъыр форумэу «Урысыем илъэпкъ щынэгъончъагъэ непэрэ уахътэм гъэпсыгъэныр» зыфиIорэм ипрограммэ хэхьагъэх, ар МКъТУ-м ибазэ щыкIуагъ. ЗэIукIэгъухэу ШIэныгъэр.Къэралыгъом зэфищагъэх хабзэм, научнэ сообществэм, Адыгеим иныбжьыкIэхэм, джащ фэдэу общественнэ ыкIи дин организациехэм ялIыкIохэр.

Къэзэрэугъоигъэхэм апашъхьэкIэ къэгущыIагъ къалэу Элиста иадминистрацие и Iэшъхьэтетэу, Урысые дзэ-тарихъ обществэм икъалмыкъ отделение итхьаматэу, тарихъ шIэныгъэхэмкIэ кандидатэу Дмитрий Довгополовыр. ЛекциитIоу къызэджагъэр непэрэ уахътэм гумэкIыгъо шъхьаIэхэу геополитическэ ыкIи цивилизационнэ зэхъокIыныгъэхэм ялъытыгъэу къэуцухэрэм афэгъэхьыгъагъэх.

Апэрэ зэIукIэгъум Обществэу «ШIэныгъэм» илектор Урысыем изыкIыныгъэ IэкIоцI ыкIи IэкIыб щынагъоу къеолIэнхэ ылъэкIыщтхэм къатегущыIагъ, урысые пэшIуекIо пропагандэри зэрахэтэу, тихэгъэгу щыпсэурэмэ ялъэпкъ нэшанэмэ адимыштэрэ шапхъэхэм, нэпIц къэбархэр зэрагъэIухэрэм, ахэмэ лъэпкъ ыкIи дин зэпэуцужьынхэр къахэкIынхэм фащэнхэр зэряпшъэрылъым ягугъу къышIыгъ. Шъхьафэу технологие хэушъхьафыкIыгъэмэ къащыуцугъ: фейккIэ алъытэрэ къэбархэр, тарихъ шIэжьыр агъэфедэзэ зэрэпсэухэрэр, телъхьэ нэпцIхэр къызэраугупшысыхэрэр, ахэр социальнэ хъытыухэм ыкIи мессенджерхэм зэращыпхыращыхэрэм.

— Тыкъэзыуцухьэрэ щыIэкIэ-псэукIэр, щынэгъончъагъэр къыздикIын ылъэкIыщтыр зэхатшIэхэу, лъэпкъ зэутэкIыныгъэр къытхэзылъхьэхэрэри къыдгурыIохэу зыхъурэм, тэ сыд фэдэрэ пэрыохъуи зэпытчын, сыд фэдэрэ мыхъун Iофи тапэуцужьын тлъэкIыщт, лъэпкъ зыкIыныгъэмрэ зэфыщытыныгъэмрэ къэтыухъумэшъущтых. Ар къэмыуцурэ, зэпымыорэ процессэу щыт, къэралыгъом иинститутхэр зэкIэ къыхэлэжьэнхэ фае, ау ыпэ рапшIэу ар зэлъытыгъэр тэры — нэбгырэ пэпчъ. Тэ тиугпшысэ, тиIэпэIэсэныгъэ ыкIи гулъытэныгъэ ялъытыгъ Iофыр зэшIохыгъэ хъущтмэ, — закъыфигъэзагъ зэIукIэм хэлажьэрэмэ Обществэу «ШIэныгъэм» илекторэу Дмитрий Довгополовым. 

Ащ джащ фэдэу къедэIурэмэ апашъхьэ практическэ алгоритмэхэр къырилъхьагъэх, щынагъор къызпыкIырэ хъугъэ-шIагъэр е контентыр къыхэгъэщыгъэ хъумэ, зэпэуцужьыныр гъунэм нэмысызэ пэшIорыгъэшъэу къагъэуцун алъэкIыщт, джащ фэдэу анаIэ тырырагъэдзэшъущт.

Лъэпкъ щынэгъончъэным ыкIи цIыфэу хэгъэгум щыпсэурэмэ яшIоигъоныгъэхэр къэухъумэгъэнхэм афытегъэпсыхьэгъэ темэр къыкIэлъыкIорэ лекциеу дунаир шъолъырыбэу зэхэт чIыналъэу гъэнэфэгъэным ыкIи а процессым Урысыем чIыпIэу щиубытырэм фэгъэхьыгъагъ. СССР-р зызэхэзыжьым ыуж дунэе зэхэтыкIэм зызэрэзэблихъугъэр, ащ зэкIэлъыкIуакIэу иIагъэр лекторым къыIотагъ, США-м иполитикэ гегемонием къыздихьырэ тхьамыкIагъохэм ягугъу къышIыгъ. Ащ къызэриIуагъэмкIэ, Урысыем, Китаим ыкIи КъокIыпIэ Благъэм ихэгъэгухэм мэхьанэу яIэм мафэ къэс хэхъо. 1990-рэ илъэсхэм тихэгъэгу къычIинэгъэгъэ къэралыгъошхо позициехэм къарегъэгъэзэжьы.

Дунаир шъолъырыбэу зэхэт чIыналъэу зэрэщытым къытегущыIэзэ, лекторым Урысыем и Президентэу Владимир Путиным игущыIэхэр щысэу къыхьыгъэх: «Дунэе зэхэтыкIым лъапсэ иIэщт амакъэхэр зэфэмыдэхэу, ау зэкIэ орэдхэр зэхэтхэу къызэдаIохэ хъумэ. ШъушIэнэу шъуфаемэ, тэ тызфакIорэ дунаир полицентрическэу зэрэщытым фэдэу, полифоническэуи щыт, ащ макъэу хэтхэр зэкIэ щызэхэтэхых ыкIи щызэхэтхынхэ фай. Ау изакъоу, нэмыкIмэ адыримыгъаштэу орэд къэзыIо зышIоигъом, фай-фэмыеми дунаим ипартитуракIэ зыригъэсэнэу хъущт», — къыщиIогъагъ Владимир Путиным Дунэе зэхэгущыIэжь клубэу «Валдай» зыцIэм изэхэсыгъо.

Дунэе гъэпсыкIэм и зы Iахьэу къыхагъэщыгъэх щынэгъончъэным уфэкIоныр, зэфэдэныгъэр, обществэм хэтмэ зэкIэмэ шъхьэкIэфэныгъэ зэфашIыжьыныр, лъэпкъ пэпчъ хэхъоныгъэхэр егъэшIыгъэнхэр, фэшъхьаф къэралыгъомэ яIэкIоцI Iофхэм ахэмыгущыIэнхэр.

Обществэу «ШIэныгъэм» игъэсэныгъэ лекциехэу лъэпкъ щынэгъончъэным ыкIи зыкIыныгъэм афэгъэхьыгъэхэр джащ фэдэу «Хэгъэгум иухъумакIохэм» я Фонд икъутамэрэ хьыкум приставхэм я Федеральнэ къулыкъу и ГъэIорышIапIэу Адыгэ Республикэм щыIэмрэ яIофышIэхэм апае къатыгъэх.