Мыекъопэ къэралыгъо технологическэ университетым щыкIогъэ зэхэсыгъор научнэ сэнэхьатэу 3.4.2 «Фармацевтическэ химиер, фармакогнозиер» зыфиIорэм феджэгъэ аспирантмэ яапэрэ чIэтIупщыгъо изэфэхьысыжь аттестацие фэгъэхьыгъагъ.

Зэхэсыгъом иIофшIэн хэлэжьагъэх МКъТУ-м научнэ IофшIэнымкIэ ыкIи инновационнэ хэхъоныгъэмкIэ ипроректорэу Татьяна Овсянниковар, фармацевтическэ факультетым идеканэу Артур Арутюновыр, факультетмэ ялIыкIохэр, кафедрэмэ япащэхэр, кIэлэегъаджэхэр, научнэ IофышIэхэр, научнэ ыкIи производственнэ организациемэ къарыкIыгъэхэ экспертхэр.  

Iофтхьабзэм къыдыхэлъытагъэу научнэ-квалификационнэ IофшIэнымкIэ отчет къышIыгъ аспирантэу Гады Дандаш,   темэу хихыгъэр: «Современные подходы к стандартизации лекарственного растительного сырья и фитопрепаратов из растений Daucus L. и Angelica L. (Apiaceae)» зыфиIорэр ары. Доклад къэзышIыгъэм ушэтынхэм къагъэлъэгъогъэ лъэныкъуакIэхэр къыхигъэщыгъэх, IофшIагъэм инаучнэ екIолIакIэр къыгъэлъэгъуагъ, теоретическэ ыкIи практическэ мэхьанэу яIэр къыриIотыкIыгъ. Зэхэсыгъом хэлажьэрэмэ ыкIи комиссием хэтмэ яупчIэмэ джэуап игъэкIотыгъэхэр аспирантым къаритыжьыгъэх.

Зыхэплъагъэхэ IофшIагъэм зэфэхьысыжьэу фэхъугъэмкIэ диссертационнэ IофшIэныр шапхъэу ыкIи хэбзэгъэуцугъэхэу Урысые Федерацием наукэм ыкIи къэралыгъо научнэ-техническэ политикэм алъэныкъокIэ агъэнэфагъэхэм адиштэу алъытагъ. 

Аспирантымрэ университетым иIофышIэхэмрэ научнэ кадрэхэм ягъэхьазырынкIэ зичэзыу едзыгъор дэгъоу зэракIугъэм пае тафэгушIо!