МКъТУ-м илечебнэ факультет истудентхэу Виктория Чернобай ык1и Роман Гореловыр Петербургскэ дунэе экономическэ форумэу 2026-м хэлэжьагъэх, анахь хъугъэ-шIэгъэ инэу ыкIи нахь мэхьанэшхо зиIэу дунаим щалъытэрэм.

ПМЭФ-р гъэ къэс, 1997-рэ илъэсым къыщыублагъэу, рагъэкIокIы, ау 2006-м къыщегъэжьагъэу ащ иIофшIэн хэлажьэ Урысые Федерацием и Президент.  ПМЭФ — ар зэдэгущыIэгъухэмкIэ ыкIи IофшIэгъу зэпхыныгъэхэр гъэпсыгъэнхэмкIэ зыфэдэ къэмыхъугъэ шъолъыр ин, Урысыем ыкIи IэкIыб хэгъэгухэм бизнесым ащыхагъэхъоным пае ащ амал щагъоты гъусэгъухэр щашIынхэу, заказчикхэм ыкIи товарыр къэзыщэрэмэ япчъагъэ нахьыбэ хъуным дэлдажьэх, унашъо зышIырэмэ ыкIи пащэмэ занкIэу адэгущыIэнхэ алъэкIы, инвесторхэр яшъолъырхэм аращэлIэшъух, къэбар жъугъэм иамалхэм анаIэ къащытырадзэным фэIорышIэх.  

Тиуниверситет илIыкIохэр НыбжьыкIэ дунэе экономическэ форумым хэлэжьагъэх, ащ студент чанхэр, специалист ныбжьыкIэхэр, экспертхэр ыкIи отраслэ зэфэшъхьафхэм япэрытхэр зэрипхыгъэх, ягукъэкIхэмкIэ ащ щызэхъожьыгъэх, уахътэм къыздихьыгъэ упчIэхэм щатегущыIагъэх. Форумыр макIофэ Викториерэ  Романрэ зэхэсыгъо заулэмэ ачIэсыгъэх, панельнэ зэхэгущыIэжьхэу ыкIи конференциехэу экономикэм хэхъоныгъэ егъэшIыгъэным, инновациехэр хэгъэхьэгъэнхэм, кадрэхэм ягъэхьазырын,  бизнес-процессхэм ятрансформацие технологическэ зэхъокIыныгъэхэм ялъэхъан зэрэхъухэрэм афэгъэхьыгъэхэм ахэлэжьагъэх.

— ЗэкIэмэ анахьэу сыгу къинэжьыгъэр зэхэсыгъоу «МедиакIэхэр, рекламэр ыкIи коммуникациехэр: технологиякIэхэм бизнесыр зэрэзэрахъокIырэр» зыфиIорэр ары. Тхылъ тедзэпIэ инхэм ыкIи  медиакомпаниехэм ялIыкIохэр изещэкIуагъэх. ЦIыфмэ адэлэжьэгъэнымкIэ екIолIакIэхэр зэрэзэхъокIыхэрэр сшIэнэу сыфэягъ, Iэмэ-псымэу агъэфедэхэрэр, технологиехэм яшIуагъэу ащ пае къакIохэрэр, — къыддэгощагъ игупшысэхэмкIэ  Виктория Чернобай.

Студентхэр ПМЭФ-м зэрэхэлэжьагъэхэм ишIуагъэ къякIыгъ, профессиональнэ еплъыкIэу яIэр нахьышIум ылъэныкъокIэ зэблэхъугъэ хъугъэ, сферэ зэфэшъхьафмэ ащылажьэрэмэ нэIуасэ уафэхъунхэр, экспертнэ сообществэм илIыкIомэ зэдэгущыIэгъоу адашIыгъэхэмкIэ зыфэдэ къэмыхъугъэ опыт шIагъо агъотыгъ. Мыщ фэдэ Iофтхьабзэмэ джыри нахь гъэхъагъэхэм уафащэ, уахътэм къыздихьырэ Iофыгъохэу неущрэ специалистхэм Iоф зыдашIэщтхэр къыбгурагъаIо.