Апэрэ Московскэ къэралыгъо медицинскэ университетэу И. М. Сеченовым ыцIэ зыхьырэм, ижъырэ медицинскэ апшъэрэ еджапIэу Урысыем итым, медицинэ гъэсэныгъэмкIэ хэгъэгум игупчэ пэрытмэ ащыщым, IэкIыб студент-медикхэр зыхэлэжьэгъэхэ Урысые форумэу «MEDUNITY RUSSIA» зыфиIорэр щыкIуагъ.

Мыекъопэ къэралыгъо технологическэ университетыр форумым къыщызгъэлъэгъуагъэ студентхэр: Али Зеаитер ыкIи Абдалгхани Альсайед, джащ фэдэу хьисапым, физикэм ыкIи системнэ анализым якафедрэ идоцентэу, лечебнэ факультетым деканым егъэджэн IофшIэнымкIэ игуадзэу Нэгъой Дженьетэ.

Медицинскэ апшъэрэ еджапIэмэ ащеджэрэ студентхэу Индием, Ирак, Иран, Мысыр, Марокко, Тунис, Узбекистан, Казахстан, Китай, Ливан, Анголэ ыкIи нэмыкI хэгъэгухэм ащыщхэр фрумым хэлэжьагъэх. Форумым хэлэжьагъэхэр атегущыIагъэх профессиональнэ хэхъоныгъэхэм, научнэ интеграцием ыкIи рагъаджэхэрэр дунэе гъэсэныгъэ Iофыгъохэм зэрэхэщэгъэщтхэм. Программэм къыдыхэлъытагъэу форумым шIэныгъэлэжь ныбжьыкIэхэр щызэнэкъокъугъэх, панельнэ зэхэгущыIэжьхэр, Iэнэ хъураехэр, творческэ зэхахьэхэр, гъэсэныгъэ ыкIи спортивнэ мастер-классхэр ашIыгъэх.

Зэнэкъокъу программэм зэфэхьысыжьэу фашIыгъэхэмкIэ шIэныгъэлэжь ныбжьыкIэхэм язэнэкъокъум МКъТУ-м икомандэ я 3-рэ чIыпIэр къыщыдихыгъ, ащ тетэу тиуниверситет ухьазырыныгъэ ин зэриIэр, зэхэтхэу Iоф зэрашIэшъурэр, ушэтынхэм яцыхьэ телъэу зэрагъэцакIэхэрэр къыгъэлъэгъуагъ.

Гъэхъагъэу ашIыгъэм пае тистудентмэ тафэгушIо, тапэкIэ джыри научнэ ыкIи профессиональнэ Iофтхьабзэхэм чанэу ахэлэжьэнэу, текIоныгъэхэр къащыдахынхэу тафэлъаIо!