Дунэе научнэ-практическэ конференцием изэфэхьысыжьхэр Волгоград щашIыгъэх, ар инновационнэ мэкъумэщ-гъомлэпхъэ технологиехэм афэгъэхьыгъагъ. Мыекъопэ къэралыгъо технологическэ университетым ипроект анахь дэгъоу ежь икатегорие къыщыхагъэщыгъ — студентэу Мыгу Батырбый къыугупшысыгъэр (ТОП-11) къуаеу «Адыгейскэр» сублимированнэ гъомлэпхъэ кIышъо зиIэр», ащ Урысые къэгъэлъэгъон-зэнэкъокъум дышъэ медальрэ а I-рэ шъуашэ зиIэ дипломымрэ къыфагъэшъошагъэх.

Научнэ пащэр — техническэ шIэныгъэхэмкIэ докторэу, профессорэу Хъоткъо Зурет ары. Ащ проектыр дагъэцэкIагъ научнэ IофышIэу Кудайнет Саидэрэ  магистрантэу Елизавета Кобченкамрэ.

Пленарнэ зэхэсыгъом хэлэжьэгъэ РАН-м иакадемикэу Иван Горловым къыкIигъэтхъыгъ шъолъыр гъомлапхъэр гъогогъу пчъагъэрэ къызэрэдагъэкIыжьырэм гъомлэпхъэ щынэгъончъэныр къызэригъэпсырэр. Пленарнэ зэхэсыгъом МКъТУ-м ыцIэкIэ доклад Мыгу Батырбый къыщишIыгъ, къыугупшысыгъэ IэшIагъэр Урысыем, Иран, Беларусым, Казахстан, Узбекистан ыкIи Китай яшIэныгъэлэжь пэрытхэм аригъэлъэгъугъ. Гъомлапхъэу апашъхьэ рилъхьагъэр лъэшэу ашIогъэшIэгъоныгъ, Адыгэ Республикэм итуристическэ кластерымкIэ ащ мэхьанэшхо иIэу зэрэщытыр хэушъхьафыкIыгъэу къыхагъэщыгъ, шъолъыр брендым ыусэ къэIэтыгъэным зэрэфэIорышIэщтыр къаIуагъ. ЛIыкIо купым хэтэу форумым иIофшIэн хэлэжьагъ гъомлапхъэхэм ыкIи шхыныгъохэм ягъэхьазырын якафедрэ икIэлэегъаджэу, техническэ шIэныгъэхэмкIэ кандидатэу  Екатерина Колодинар.

Гъомлэпхъэ кIышъо зиIэ сублимированнэ къуаеу «Адыгейскэр» джащ фэдэу  Волгоград, Астрахань, Саратов, Ростов-на-Дону, Башкирием ыкIи Къалмыкъым яапшъэрэ еджапIэмэ яинновационнэ продукциехэр къызщагъэлъэгъогъэ къэгъэлъэгъоным хагъэлэжьагъ, гъомлэпхъэ предприятиемэ ялIыкIомэ ыкIи яIофшIэгъумэ ащ ынаIэ къыщытырадзагъ.

Батырбый тыфэгушIо мэхьанэшхо зиIэ научнэ форумым текIоныгъэ къызэрэщыдихыгъэм пае, МКъТУ-м непэрэ уахътэм диштэрэ гъомлэпхъэ биотехнологиехэмкIэ  технологическэ пэрытныгъэр зэриIыгъыр джыри зэ къыушыхьатыжьыгъ, тапэкIи гъэхъагъэхэр ышIынхэу тыфэлъаIо!