Непэ Мыекъопэ къэралыгъо технологическэ университетым къэралыгъо ыкIи муниципальнэ къулыкъушIэхэм яIэпэIэсэныгъэ хэгъэхъогъэным фэгъэхьыгъэ профессиональнэ программэр къыщызэIуахыгъ, ащ гъэсэныгъэ модуль 12 хэхьэ. Программэр курсэу «Лъэпкъ зыкIыныгъэр: къэралыгъо политикэм ылъапсэхэр ыкIи урысые зэфэдэныгъэм игъэпытэнкIэ практикэр» зыфиIорэмкIэ рагъэжьагъ.

ШIуфэс псалъэкIэ Iофтхьабзэм хэлажьэрэмэ закъыфагъэзагъ Адыгэ Республикэм лъэпкъ IофхэмкIэ, общественностым зэпхыныгъэу дыряIэмкIэ ыкIи къэбар жъугъэм иамалхэмкIэ и Комитет иIофышIэу Нэхэе Саидэ ыкIи МКъТУ-м къэралыгъо ыкIи муниципальнэ къулыкъушIэхэм яIэпэIэсэныгъэ зыщыхагъэхъорэ Гупчэу иIэм ипащэу Пафэ Фатимэ.

Курсым къыдыхэлъытагъэу хэлажьэрэмэ къэралыгъо лъэпкъ политикэм, гражданскэ зэфэдэныгъэм ыкIи обществэр зыкIыныгъэм фэщэгъэным афэгъэхьыгъэ упчIэхэм ахэплъагъэх ыкIи зэхафыгъэх.

Докладэу «Сила в единстве: консолидация общества в периоды исторических вызовов как основа российской государственности» зыфиIорэр тарихъ шIэныгъэхэмкIэ докторэу, профессорэу, дзэ тарихъым игумэкIыгъохэм афэгъэхьыгъэ Научнэ советэу РАН-м иIэм хэтэу Елена Малышевам къышIыгъ. Хабзэм цыхьэ фэшIыгъэным, шъолъырхэмрэ муниципалитетхэмрэ зэрэзэдэлэжьнхэу щытым, джащ фэдэу урысые зэфэдэныгъэр гъэпытэгъэнымкIэ къэралыгъо къулыкъушIэхэм мэхьанэу яIэм къатегущыIагъ  социологие шIэныгъэхэмкIэ докторэу, Урысые Федерацием и Президент дэжь щыIэ РАНХиГС-м икъутамэу щыт Къыблэ-Урысые институтым социологиемкIэ икафедрэ ипрофессорэу  Александр Нечушкиныр. Философием, социологием ыкIи педагогикэм якафедрэ идоцентэу, социологие шIэныгъэхэмкIэ кандидатэу Цэй Заирэ докладэу къышIыгъэр политическэ, гражданскэ ыкIи лъэпкъ зэфэдэныгъэу урысые обществэм иIэм, къиныгъохэм къэралыгъор зыщахэтырэ лъэхъаным къэралыгъо къулыкъушIэхэм ямэхьанэ зыкъызэриIэтырэм, обществэр зыкIыныгъэм фэщэгъэнымкIэ пшъэрылъхэр яIэхэу зэрэхъурэм афэгъэхьыгъагъ.  

Мыщ фэдэ гъэсэныгъэ Iофтхьабзэхэу зэхащэрэмэ яшIуагъэкIэ къэралыгъо ыкIи муниципальнэ къулыкъушIэхэм япрофессиональнэ компетенцехэм ахэхъо, къэралыгъо лъэпкъ политикэм екIолIакIэу фыряIэм идэгъугъэ зыкъеIэты.