Мэкъу-мэщымкIэ научнэ-ушэтэкIо институтэу Мыекъопэ къэралыгъо технологическэ университетым хахьэрэм имашинотракторнэ парк непэрэ уахътэм диштэрэ зичэзыу мэкъу-мэщ техникакIэкIэ агъэбаигъ. Институтым инаучнэ-производственнэ базэ иамалыкIэхэм МКъТУ-м иректорэу Къуижъ Саидэ нэIуасэ зафишIыгъ.

Институтым иматериальнэ-техническэ инфраструктурэ гъэкIэжьыгъэныр анахь Iофыгъо шъхьаIэу научнэ ушэтынхэр шIыгъэнхэмкIэ щыт, мэкъу-мэщ технологие пэрытхэр зэрэзэрагъэгъотыхэрэр ыкIи IэпэIэсэныгъэшхо зыхэлъ кадрэхэр агропромышленнэ комплексым зэрэфагъэхьазырхэрэр апшъэ щыIэхэм ащыщ. ТехникакIэу къафэкIуагъэр системнэ IофшIэнэу мэкъу-мэщымкIэ научнэ-ушэтэкIо институтым инаучнэ-гъэсэныгъэ ылъэныкъокIэ ышIэрэм лъыпыдзагъэу хъугъэ.

Наукэмрэ апшъэрэ гъэсэныгъэмрэкIэ Урысые Федерацием и Министерствэ ифедеральнэ субсидие ишIуагъэкIэ институтым Петербургскэ тракторнэ заводым къыдигъэкIырэ тракторэу «Кировец» К-525-р зэрагъэгъотыгъ, джащ фэдэу хэушъхьафыкIыгъэ мэкъу-мэщ Iашэхэм якомплекс, ахэмэ непэрэ уахътэм диштэрэ мэкъу-мэщ технологиехэм яоперациехэр къагъэпсы. Ахэмэ ащыщых — борон-мульчировщикэу PULSAR БМ-6, полунавеснэ пхъэIашэу JUPITER (5+I), универсальнэ культиваторэу КПД-8 «Витязь», коц лъэпкъхэр езыутырэ сеялкэу ООО «Техника Сервис Агро» зыфиIорэм къышIырэр. Ащ фэшъхьафэу, мэкъу-мэщ паркым коцыр зэрэIуахыжьырэ комбайнэу GSI2 Deluxe зыцIэр иIэ хъугъэ, ар «Брянсксельмашым» къыдегъэкIы.

Къуижъ Саидэ Казбек ыпхъум къыкIигъэтхъыгъ, университетым инаучнэ инфраструктурэ хэгъэхъогъэныр ыкIи ушэтэкIо подразделениехэм уахътэм диштэрэ техникэр аIэкIэгъэхьэгъэныр стратегическэ мэхьанэ зиIэ пшъэрылъхэу непэ щытых. Ахэмэ научнэ IофшIэным идэгъугъэ къаIэты, кIэлэеджакIохэр практикэ-ориентированнэ ухьазырыныгъэ арагъэгъоты ыкIи мэкъу-мэщ секторым технологическэ суверенитетыр иIэ мэхъу.

ТехникакIэм игъэфедэн амалыкIэхэр къытыщтых шъофым опытхэр ащышIыгъэнхэмкIэ, экспериментальнэ ушэтынмэ ядэгъугъэрэ яамалхэмрэ зарагъэушъомбгъущтых, джащ фэдэу агротехнологическэ методхэр игъом арахьылIэшъущтых. Технопаркым игъэкIэжьын анахьэу зишIуагъэ зэкIыщтыр гъэсэныгъэ процессыр ары: студентхэм, магистрантхэм ыкIи аспирантхэм технологие пэрытхэмкIэ Iоф ашIэн алъэкIыщт ыкIи профессиональнэ амалхэр зэрагъэгъотыщтых, производствэ шъыпкъэм пэблагъэхэу ахэр агъэсэшъущтых.

Мэкъу-мэщымкIэ научнэ-ушэтэкIо институтэу Мыекъопэ къэралыгъо технологическэ университетым хахьэрэм имашинотракторнэ парк зэрагъэкIэжьыгъэр зы Iахь инэу университетым инаучнэ-ушэтэкIо IофымкIэ хъугъэ, мэкъу-мэщым феджэрэмэ яIэпэIэсэныгъэ ащкIэ къаIэтыщт, Адыгэ Республикэм инновационнэ амалхэу агропромышленнэ комплексым фыриIэхэм ахэхъощт.