Мыекъопэ къэралыгъо технологическэ университетым Урысые чемпионатнэ движениеу «Профессионалхэмрэ» (СПО) ыкIи «НыбжьыкIэ профессионалхэмрэ» (ВО) зэIукIэгъухэр адыриIагъ.

ШIуфэс псалъэкIэ къэзэрэугъоигъэхэм закъыфигъэзагъ егъэджэн IофшIэнымкIэ проректорэу Людмила Задорожнаям, ащ къыкIигъэтхъыгъ практикэ-ориентированнэ гъэсэныгъэм хэхъоныгъэ егъэшIыгъэным мэхьанэ зэриIэр, джащ фэдэу непэрэ уахътэм диштэрэ технологиехэр гъэсэныгъэ процессым хэгъэхьэгъэнхэр ыкIи профессиональнэ сообществэм зэдэлэжьэныгъэр дэгъэпсыгъэныр Iофыгъо шъхьаIэхэм зэращыщыр къыIуагъэх.

ЛIыкIо купым хэхьагъэх Урысые чемпионатнэ движениеу «Профессионалхэм» ыкIи компетенциеу «Фармацевтикэр/ХэушъхьафыкIыгъэ фармацевтическэ шIыкIэхэр» зыфиIорэм яменеджерэу Светлана Усатовар ыкIи VR/AR-технологиехэр зэхэзгъэуцуагъэу, компетенциеу «Фармацевтикэм» игъусэгъукIэу Александр Кротовыр.

ЗэIукIэгъум щытегущыIагъэх МКъТУ-м «Профессионалхэр» зыфиIорэ чемпионатым ишъолъыр едзыгъорэ Лъэпкъ апшъэрэ еджэпIэ чемпионатэу «Профессионал ныбжьыкIэхэр» зыфиIорэмрэ яфинал зэрэрагъэкIокIыщтым. Джащ фэдэу хэлэжьагъэмэ зэхафыгъ роботизациемрэ VR/AR-технологиехэмрэ гъэсэныгъэ процессым зэрэхагъэхьащтхэ шIыкIэр, компетенциякIэу «Индивидуальные фармацевтические решения» зыфиIорэр зэратIупщыщтыр, джащ фэдэу профессиональнэ гъэсэныгъэ тедзэм ипрограммэ хэхъоныгъэ егъэшIыгъэныр ыкIи хэушъхьафыкIыгъэ мастерскойхэм зягъэушъомбгъугъэныр. Шъхьафэу зэдэлэжьэныгъэм гугъапIэу иIэхэр зыфэдэхэм атегущыIагъэх, гъэсэныгъэ проектыкIэхэм ягъэцэкIэни зэрахэтэу, пащэхэмрэ кIэлэегъаджэхэмрэ IофшIэным пымыужьынхэм фэзыгъэсэщтхэ тренингхэр зэрэрагъэкIокIыщтхэм ягугъу ашIыгъ.

ХьакIэмэ МКъТУ-м хэхьэрэ Политехническэ колледжым и Медицинскэ кластерэу «ПрофиМедыр» зэрагъэлъэгъугъ. ЛIыкIо купым непэрэ уахътэм диштэрэ материальнэ-техническэ базэу колледжым иIэм зыщигъэгъозагъ, хэушъхьафыкIыгъэ лабораториехэр ыкIи егъэджэпIэ кабинетхэу симуляционнэ оборудованиехэр зычIэтхэр зэрагъэлъэгъугъэх. Мыщ студентхэм сымаджэмэ уазэрэпылъыщт практическэ амалхэр, апэрэ IэпыIэгъур зэрябгъэкIыщтыр, цифрэ технологиехэр медицинскэ практикэм зэрэщыбгъэфедэщтхэр щызэрагъашIэх.

ЗэдэлэжьэныгъэмкIэ зэIукIэгъур лъэубэкъушIоу щытыгъ ыкIи гъэсэныгъэ гукъэкIыкIэхэр гъэцэкIэгъэнхэмкIэ амалышIоу хъугъэ.