Мыекъопэ къэралыгъо технологическэ университетым сэнэхьатхэм якъыхэхынхэм афытегъэпсыхьэгъэ Iофтхьабзэхэу «Сэнэхьатхэм яхэгъэгу» зыфиIохэрэр щырагъэжьагъэх, ублэпIэ еджапIэмэ ащеджэхэу Мыекъуапэ игъэсэныгъэ организациехэм ягъэмэфэ зыгъэпсэфыпIэ лагермэ ащыIэхэмэ афэгъэхьыгъэх.

Мы илъэсым проектым куп  30-у еджэпIи 8-мэ ащыщхэр хэлажьэх, зэкIэмкIи нэбгырэ 540-рэ ахэр мэхъух, сэнэхьат зэфэшъхьафхэу тиуниверситет ащызэрагъэгъотырэмэ якъэбар зэрагъашIэ ашIоигъу. КIэлэеджакIомэ апае сэнэхьатмэ якъыхэхынхэм афэгъэхьыгъэ десэ гъэшIэгъонхэр ыкIи интеллектуальнэ квестхэр зэхащэх.

Iофтхьабзэмэ ахэлажьэрэ ныбжьыкIэхэр мэшIогъэкIуасэхэм, криминалистхэм, псэолъэшIхэм, технологхэм, щыгъынхэм ядизайнерхэм, флористхэм, ландшафтнэ дизайнерхэм ыкIи геодезистхэм ярольхэм арэуцох. Анахьэу анаIэ зытырадзэрэр психологым дыряIэ десэу «Акъылышхом дэжь хьакIэу ущыIэу» зыфиIорэр ары, ащ хэлажьэрэ кIэлакIэхэр  креативнэу гупшысэшъухэу мэхъух,  коммуникативнэ амалхэр агъоты ыкIи командэм Iоф щашIэн алъэкIы.  

Проектэу «Сэнэхьатхэм яхэгъэгу» зыфиIохэрэм ишIуагъэкIэ, кIэлэцIыкIумэ апэрэ лъэубэкъухэр янеущрэ сэнэхьатхэм афадзых, ятворческэ гупшысэ хагъахъо, ушэтын гъэшIэгъонхэр ашIых. Iофтхьабзэхэр МКъТУ-м мэкъуогъум ыкIэм нэс щыкIощтых, тапэкIэ кIэлэеджакIомэ джыри IофыгъуакIэу бэ къяжэрэр, бэ шIэныгъэу зэрагъэгъотыщтыр.  

«Сэнэхьатхэм яхэгъэгу» кIэлэеджакIохэм IэпыIэгъу афэхъу непэрэ уахътэм къыздихьыгъэ сэнэхьатыкIэхэм нэIуасэ афэхъунхэмкIэ, ахэр интерактивнэ шапхъэм илъэу агъэцакIэх. КIэлэкIабэхэр проектым апэрэу хэлажьэх ыкIи неущрэ профессиональнэ гъогур къыхахынымкIэ, университетым нэIуасэ фэхъунхэмкIэ амалышIу афэхъу.  

Программэу «Сэнэхьатхэм яхэгъэгум» къэкIощт зичэзыу каникул лъэхъаным зыхязгъатхэ зышIоигъохэм апае къэбарыр Мыекъопэ къэралыгъо технологическэ университетым иофициальнэ сайтым ит. Тикъэбархэм шъуалъыплъ, сэнэхьатхэм якъыхэхын ыкIи апшъэрэ еджапIэм чIэхьанхэм фэгъэхьазырыгъэнхэм я Гупчэ шъуиупчIэмэ яджэуапхэр щыжъугъотыщтых.