Мыекъопэ къэралыгъо технологическэ университетым и «Точка кипение» шъолъыр сессие щызэхащагъ, урысые форумэу «ОхътакIэм игукъэкI лъэшхэр» зыфиIорэм хэлэжьагъэмэ япроектхэм Iоф адэшIэжьыгъэным ар фэгъэхьыгъагъ. Iофтхьабзэм зэхиугъоягъэх гукъэкIмэ яавторхэр, экспертхэр, хабзэм иорганхэм ялIыкIохэр, ахэр гугъапIэ къэзытырэ проектхэу хэгъэгум хэхъоныгъэ езыгъэшIыщтхэм ыкIи лъэпкъ пшъэрылъхэу 2030-рэ илъэсым нэс телъытагъэхэм атегущыIагъэх.

Стратегическэ инициативэхэм я Агентствэу Краснодар краим щыIэм иобщественнэ лIыкIохэри Iофтхьабзэр зезыщагъэхэм ащыщыгъэх, Краснодар и «Точка кипение» ипрограммнэ пащэу — Антон Артамкиныр, джащ фэдэу МКъТУ-м и «Точка кипение» ипрограммнэ пащэу Светлана Новиковар. Ахэр АСИ-м и Лъэпкъ премиеу «ЦIыфхэр ары хэгъэгур зэзыхъокIырэр» зыфиIорэм 2025-рэ илъэсым илауреат хъугъэх.

Сессием иэкспертыгъэхэр: ГКУ «ЦIыфхэр социальнэу къэухъумэгъэнхэр ыкIи IофшIэным и Гупчэ» къэралыгъо IэпыIэгъу ятыгъэнымкIэ иотдел ипащэу ХъуакIо Фатим; экономикэм хэхъоныгъэ егъэшIыгъэнымкIэ ыкIи сатыумкIэ Адыгэ Республикэм и Министерствэ гурыт ыкIи предпринимательствэ цIыкIум IэпыIэгъу етыгъэнымкIэ иотдел ипащэу Гъонэжьыкъо Мариета; МКъТУ-м цифровизациемкIэ ипроректорэу Дмитрий Игнатовыр; информационнэ щынэгъончъэнымкIэ ыкIи прикладной информатикэмкIэ МКъТУ-м икафедрэ ипащэу Цундышк Вячеслав.

Университетым истудентмэ, икIэлэегъаджэмэ, иIофышIэмэ, МКъТУ-м хэхьэрэ Политехническэ колледжым, МКъТУ-м икъутамэу поселкэу Яблоновскэм дэтым ащеджэрэмэ, джащ фэдэу социальнэ Iофым фытегъэпсыхьэгъэ мыкоммерческэ организациемэ япроектхэр къагъэлъэгъуагъэх.

Экспертмэ анахьэу анаIэ зытырадзагъэр НКО-м ипроектэу «Важные вещи» зыфиIорэр ары, организацием ипащэу Ирина Дербеневам къыгъэхьазырыгъ, джащ фэдэу МКъТУ-м иIофышIэхэм ыкIи истудентхэм япроектэу «Искусственнэ интеллектыр агъэфедэзэ пыдзафэхэр зыщызэхаугъоещт чIыпIэр агъэнэфэныр» зыфиIорэр, Александр Яковлевым къыгъэлъэгъуагъ. Автормэ ягукъэкIхэм хэхъоныгъэхэр зэрарагъэшIыщтхэмкIэ, урысые зэнэкъокъухэм зэрахагъэлэжьэщтхэмкIэ джэнджэшхэр экспертмэ къафашIыгъэх.

Шъугу къэдгъэкIыжьын, форумэу «ОхътакIэм игукъэкI лъэшхэр» зыфиIорэм хэлажьэ зышIоигъохэм заявкэхэр джыри мэкъуогъум и 15-м нэс сайтым щатын алъэкIыщт. Анахь проект дэгъухэм амал агъотыщт федеральнэ лъэгапIэм къыщагъэлъэгъонхэу, хэгъэгум хахъо ышIыными яIахь халъхьащт.

ПроектыкIэ е гукъэкI шъуиIа? Армэ, форумым шъукъыхэлажь, шъуигукъэкIхэм ашъхьэ къишъух, неущрэр шъоры зэблэзыхъущтыр!