Гъэсэныгъэ организациер республикэм игъэмэфэ зыгъэпсэфыпIэ кампание чанэу хэлажьэу ыублагъ: кIэлэкIэ нэбгырэ мини 2-м ехъурэр лекцие гъэшIэгъонхэм ядэIущтых, викторинэхэм ыкIи мастер-классхэм ахэлэжьэщтых. Обществэу «ШIэныгъэм» иIофтхьабзэхэр лъэпкъ проектэу «НыбжьыкIэхэр ыкIи кIэлэцIыкIухэр» зыфиIорэм ипшъэрылъхэм адештэх.

Марышъ, мэфэ лагерэу «Дружные ребята» зыфиIоу Инэм дэт еджапIэу № 6-м ихьакIэ хъугъэ Мыекъопэ къэралыгъо технологическэ университетым ипрофессорэу Алексей Морозовыр. Ащ кIэлакIэмэ къафиIотагъ гъэмэфэ хъугъэ-шIагъэхэр, туристическэ лъэсгъогухэр зыфэдэхэр ыкIи Урысыем ичIыопс ибайныгъэ. Джащ фэдэу каникулхэм шIуагъэ къатэу зэрагъэкIошъущтыр кIалэмэ игугъу афишIыгъ.

— Гъэмафэм сабыим шъхьафитныгъэ къыреты. Шъхьафитныгъэр зэгъэшIэгъэн фае, упчIэхэм яджэуапхэри къэгъотыгъэнхэр типшъэрылъ. Мы уахътэм бэ зэбгъэшIэшъущтыр, бэ узлъыIэсыщтыр, географиер картэкIэ зэогъашIэмэ, лъэсгъогум утетэу, щэтырыр бгъаIэ хъумэ, дунаир фэшъхьафэу олъэгъу. Мыщ дэжьым нахьыжъхэр Iофым къыхахьахэмэ хъущт — зэкIэ зышIогъэшIэгъонхэр гъогу зафэм тедгъэхьанхэ фае: зыдэлэжьэщтыр къыгъотынымкIэ удеIэныр, творчествэмкIэ ыгъэфедэщт Iэмэ-псымэхэр етыгъэнхэр, а зэкIэри ушэтыжьыгъэныр, джары тэ тиIофыр — къыхигъэщыгъ Алексей Морозовым.

Обществэу «ШIэныгъэм» илектор ягъусэу кIэлакIэмэ гъэмэфэ щагу джэгукIэхэр агу къагъэкIыжьыгъэх: резиночкэр, городки, лаптэр, вышибалэр. Ащ ыуж зекIо гъогум техьагъэх, Урысыем ичIыопс шIагъохэр зэрагъэлъэгъугъэх, чIыпIабэхэм язытет зэрагъэшIагъ, ахэмэ ащыщыгъэх псыхъураеу Байкал, псыхъоу Волгэ, амурскэ къэплъанэр, «къэшъорэ» чъыгхэу Куршскэ чIыгу шъолъырым итхэр ыкIи гейзерхэм я КIэеу Камчаткэм щыIэр.

Лъэс зекIоным епхыгъэ щынэгъончъэным итеми лъыIэсыгъэх. ЧIыопсым узэрэщызекIон фаер кIэлакIэмэ ауплъэкIугъ, хьаIоу пшхы хъущтхэр ыкIи мыхъущтхэр, фэшъхьафхэр зэрагъэшIагъэх.

— Урысые обществэу «ШIэныгъэм» тыфэраз, джащ фэдэу Алексей Владимир ыкъом гуфэбагъэ зыхэлъ зэIукIэгъур зэрэригъэкIокIыгъэм, кIэлэцIыкIу творчествэм шIулъэгъу зэрэфыриIэм, бэ зэрэшIогъэшIэгъоным апае. Ащ фэдэ хьакIэмэ кIэлакIэмэ гукъыдэчъхэр яIэнхэм фащэх, лъэныкъуакIэхэр къызэIуахых! — къыддэгощагъ гъэсэкIо IофшIэным ипащэ игуадзэу Джарымэ Фатимэ.

Обществэу «ШIэныгъэр» гъэ къэс республикэм игъэмэфэ зыгъэпсэфыпIэ кампание изэхэщакIохэм ащыщэу мэхъу. Проектэу «ШIэныгъэр зигъусэ каникулхэр» зыфиIорэм къыдыхэлъытагъэу гъэмафэ уахътэр макIофэ хэгъэгум ит кIэлэцIыкIу лагерхэм лекторхэр ащыIэщтых, викторинэхэр, мастер-классхэр ащырагъэкIокIыщтых, фэшъхьаф гъэсэныгъэ Iофтхьабзэхэри зэхащэщтых.