Мыекъопэ къэралыгъо технологическэ университетым илечебнэ факультет истуденткэу Виктория Чернобай Урысые форумэу «Къыблэ гъунапкъ» зыфиIорэм хэлэжьагъ, ар къалэу Ростове-на-Дону дэт Донской къэралыгъо техническэ университетым щыкIуагъ.

Форумым ныбжьыкIэ чанэу хэгъэгум ичIыпIабэмэ ащыщхэр зэрищэлIагъэх. Программэм хэтыгъэх мастер-классхэр, гъэсэныгъэ лекциехэр, пэрыт экспертхэу медиасферэм щылажьэрэмэ язэIукIэгъухэр ыкIи шъолъыр командэ зэнэкъокъухэр.

ХэушъхьафыкIыгъэ десэу «ЗыкIыныгъэр зэмылIэужыныгъор ары» зыфиIорэм къыдыхэлъытагъэу Викторие ежь иунэе медиапроектэу «Лъапсэр» зэхигъэуцуагъ — сообществэр ВКонтакте хэт, ар адыгэ культурэм ибайныгъэ фэгъэхьыгъ.

Проектым зэдыхиубытагъ сообществэр зэрэщытэу: купым игъэкIэрэкIэн, фирменнэ алъэгъурэ стилым игъэпсын, Урысыем инародхэм языкIыныгъэ и Илъэс ыкIи адыгэмэ яхэушъхьафыкIыгъэ культурэ афэгъэхьыгъэ статьяр хэутыным фэгъэхьазырыгъэныр, джащ фэдэу сурэт- ыкIи видеоконтентыр гъэхьазырыгъэныр.

Викторие иIофшIэн осэшхо форумым иэкспертмэ къыфашIыгъ. УрысыемкIэ Росмолодёжым иныбжьыкIэ медиагупчэ ипащэу Яна Щуцкая проектым купкIэу иIэр ыкIи илъэтегъэуцо къыхигъэщыгъэх. Хэку иинформационнэ-аналитическэ гъэзетэу «Молот» зыцIэм иредактор шъхьаIэу, РГЭУ (РИНХ) урысыбзэмрэ урыс жабзэм икультурэмрэ якафедрэ икIэлэегъаджэу, Ростов хэкум и Общественнэ палатэ хэтэу Каролина Стрельцовам креативнэ лъэпкъ тематикэм фишIыгъэм, джащ фэдэу проектыр зэрэгъэкIэрэкIагъэм осэшхо къыритыгъ. ЗэлъашIэрэ дизайнерэу ROCK & ROMI Валерия Живаям видеоIофшIэным идэгъугъэ къыхигъэщыгъ, ар псынкIэу ыкIи непэрэ шапхъэхэм адиштэу къызэритыгъэр ыгу рихьыгъ.

Форумым зэрэхэлэжьагъэм Викторие амал къыритыгъ Адыгеим икультурэ урысые площадкэм къыщигъэлъэгъонэу, ащ дакIоу команднэ IофшIэнымкIэ опыт зэригъэгъотыгъ, Урысыем ишъолъырыбэхэм ащыщ медийщик ныбжьыкIэмэ нэIуасэ афэхъугъ.

Викторие тыфэгушIо дэгъу дэдэу зыкъызэригъэлъэгъуагъэм фэшI ыкIи тапэкIэ джыри гъэхъагъэхэр ышIынхэу, творческэ ыкIи профессиональнэ хэхъоныгъэхэм алъыкIэхьанэу тыфэлъаIо!