Торжественнэ шIыкIэм тетэу рабочэ ыкIи къулыкъушIэ сэнэхьатхэр къэзыушыхьатрэ тхылъхэр Мыекъуапэ ыкIи Белореченскэ районым икIэлэеджакIохэу я 10-рэ классхэм арысхэм Мыекъопэ къэралыгъо технологическэ университетым щаратыжьыгъэх.

Iофтхьабзэм хэлэжьагъэхэр: Адыгэ Республикэм гъэсэныгъэмрэ шIэныгъэмрэкIэ иминистрэ игуадзэу Артем Журавель; къэралыгъо ыкIи муниципальнэ къулыкъушIэхэм яшIэныгъэхэр зыщыхагъахъорэ Гупчэу МКъТУ-м щыIэм ипащэу Пафэ Фатим; сэнэхьат къыхэхыным ыкIи апшъэрэ еджапIэм фэгъэхьазырыгъэнхэм и Гупчэ ипащэу Олег Франко; хьисапым, физикэм ыкIи системнэ анализым якафедрэ ипащэу Татьяна Деминар; маркетингым, сервисым ыкIи туризмэм якафедрэ ипащэу КъумпIыл Анжеликэ.

Свидетельствэхэр кIэлэеджэкIо 57-у я 10-рэ классхэм арысхэм, къалэу Мыекъуапэ щыIэхэ Лицееу №34-м, Лицееу №35-м, гурыт еджапIэу №17-м ыкIи Белореченскэ районым ит станицэу Пшехскэм игурыт еджапIэу №26-м ащеджэхэрэм аратыжьыгъэх. Рабочэ ыкIи къулыкъушIэ сэнэхьатхэр къэзыушыхьатрэ тхылъхэм амал къареты гъэнэфэгъэ сэнэхьатхэмкIэ IэпэIэсэныгъэ зэрагъотыгъэр ыкIи фитныгъэ яIэ мэхъу ахэмкIэ Iоф ашIэнэу. Мы гъэмафэм кIэлэеджакIомэ сэнэхьатыкIэхэр практикэм щаушэтынхэ алъэкIыщт, зэрагъэгъотыгъэ IэпэIэсэныгъэр ауплъэкIушъущт.

2025-2026-рэ илъэс еджэгъум МКъТУ-м егъэджэнхэр профессиональнэ программитфымкIэ щакIугъэх:

• «ЦIыфхэм цифрэ гъэсэныгъэ ягъэгъотыгъэнымкIэ упчIэжьэгъу (цифрэ кураторыр)» — кIэлэегъаджэр Цундышк Вячеслав;

• «Сымаджэхэмэ алъыплъэгъэнымкIэ медицинскэ сестрар» — кIэлэегъаджэр КIыржьын Аид;

• «Чертежникыр» — кIэлэегъаджэр Къуикъо Марин;

• «Горничнэр» — кIэлэегъаджэр Светлана Калашниковар;

• «Экскурсоводым иассистент (гидыр)» — кIэлэегъаджэр Ирина Авдиенкэр.

Университетым икIэлэегъаджэхэмрэ хьакIэхэмрэ кIэлэеджакIохэм афэгушIуагъэх ыкIи я 11-рэ классыр дэгъоу къаухынэу, ащ къыкIэлъыкIоу профессиональнэ гъэсэныгъэр Мыекъопэ къэралыгъо технологическэ университетым щылъагъэкIотэнэу афэлъэIуагъэх.

КIэлэеджакIохэми университетым икIэлэегъаджэхэм десэ гъэшIэгъонхэр къазэрафатыгъэхэм ыкIи практическэ опыт зэрагъотыгъэм апае зэрафэразэхэр къараIуагъ.