Мыекъопэ къэралыгъо технологическэ университетым цифрэ искусствэм ифестивалэу «Народнэ промыслэхэр: тыгъуас, неп, неущ» зыфиIорэр щыкIуагъ, ар гъэсэныгъэ проектэу «Уасэ зиIэ пшIыкIубл» зыцIэм къыдыхэлъытагъэу агъэцакIэ.

Iофтхьабзэм хэлажьэхэрэр цифрэ дунаим иискусствэ хэхьагъэх, ащ непэрэ уахътэм диштэрэ технологиехэр Урысыем икультурнэ кIэн щыIукIагъэх. Форумым зэрипхыгъэх творческэ ыкIи сэнаущыгъэ зыхэлъ кIэлакIэхэу шэпхъакIэхэм алъыхъухэрэр, хабзэхэр ыкIи тарихъ шIэжьыр къэзыухъумэнхэм адэгуIэхэрэр.

Фестивалым ипрограммэ мастер-классхэр, тренингхэр ыкIи практическэ десэхэр хэтыгъэх, ахэр цифрэ творчествэм илъэныкъуабэхэм алъыIэсыщтыгъэх. Iофтхьабзэм хэлажьэрэмэ цифрэ искусствэр зыфэдэр зэхафыгъ, кейс шIагъохэм защагъэгъозагъ, автормэ ятарихъхэм ахэплъагъэх, гукъэкIхэр къагъотыным зыфагъэсагъ, ежь япроектхэр къаугупшысыгъэх ыкIи ахэр экспертмэ апашъхьэкIэ къаухъумагъэх.

Анахьэу ашIогъэшIэгъоныгъэр VR-хъоур зэхагъэуцоныр арыгъэ, джащ фэдэу, анимациехэу 3D-объектмэ ахахьэхэрэр, IофшIэнэу Blender ыкIи Monster Mash хиубытэхэрэр, сервисэу Varwin виртуальнэ галереемэ апае агъэфедэхэрэр дэигъэхэп. КIэлакIэхэр ыуж итыгъэх ежьхэм яунэе цифрэ произведениехэр агъэпсынхэм, Урысыем инароднэ промыслэмэ гукъыдэчъхэр ащ пае арагъэшIыгъэх, командэмэ ахэтхэу Iоф ашIагъ, ягукъэкIхэр гъэсакIомэ афаIотагъ, лъэубэкъу-лэубэкъоу гукъыдэчъхэр проект шъыпкъэхэу агъэхъущтыгъэх.

Лъэшэу форумым анаIэ зыщытырагъэтыгъэр тарихъ шIэжьымрэ нейросетым иамалхэмрэ непэрэ искусствэм зэрэщагъэфедэхэрэр ары. Хэлэжьагъэхэр тегущыIагъэх цифрэ технологиехэм яшIуагъэ къызэрэкIорэр культурнэ кIэныр къаухъумэнымкIэ, ар нахь благъэ ныбжьыкIэ лIэужым зэрафэхъурэм.

Финальнэ лъэтегъэуцо сессиер гукъэкIхэр къызэращэлIэнхэм, креативым ыкIи эмоциехэм яе шъыпкъэу хъугъэ. Командэмэ япроектхэр къагъэлъэгъуагъэх, опытымкIэ зэхъожьыгъэх, экспертмэ уасэ къафашIыгъ.

Фестивалым зэфэхьысыжьэу фэхъугъэмкIэ текIоныгъэ къыдэзыхыгъэр проектэу «Тарихъым ишъхьэдэкI» зыфиIорэр ары, МКъТУ-м истудентмэ япроектхэу «Адыгэ Style» ыкIи «Кавказ ыпсэ» зыфиIорэмэ шIухьафтынхэр къафашIыгъэх.

Iофтхьабзэм хэлэжьагъэмэ къызэраIуагъмкIэ, фестивалыр гукъыдэчъ шъыпкъэ афэхъугъ, нэIуасэ щызэфэхъугъэх, проектыкIэхэм зэдягупшысагъэх. Бэмэ къаIотагъ апэрэу цифрэ искусствэм зэрэлъыIэсыгъэхэр, апэрэу непэрэ уахътэм диштэрэ Iэмэ-псымэхэмкIэ Iоф зэрашIагъэр, хабзэ шапхъэхэм технологиехэр зэряпхьылIэшъущтхэр къагурыIуагъ.

ЗэкIэ хэлэжьагъэхэм, гъэсакIохэм, экспертхэм ыкIи зэхэщакIохэм тхьаегъэпсэу ятэIо мыщ фэдэ творчествэ мэфэ шIагъохэр зэрэрагъэкIокIыгъэхэм, энергие ыкIи команднэ гушъхьэр къазэрэтатыгъэм афэшI. Форумым къыгъэлъэгъуагъ: неущрэ искусствэр къызщыхъурэр хабзэхэмрэ цифрэ амалхэмрэ зыщызэутэкIыхэрэр ары.

НыбжьыкIэ IофхэмкIэ Адыгэ Республикэм и Комитетрэ Мыекъопэ къэралыгъо технологическэ университетымрэ яIэпыIэгъухэу проектыр агъэцэкIагъ.