Мыекъуапэ шъолъыр научнэ-практическэ конференциеу «Нэхэр агъэхъужьыным пае екIолIакIэу профилактикэм, диагностикэм къыфагъотыхэрэр» зыфиIорэр щыкIуагъ. Хэгъэгум ичIыпIэ зэфэшъхьафхэм ащыщхэу пэрытныгъэ зыIыгъ офтальмологхэр, медицинскэ сообществэм, наукэм ыкIи псауныгъэм икъэухъумэн дэлажьэхэрэр ащ зэрищэлIагъэх.

Конференциер зэхэзыщагъэхэр: псауныгъэм икъэухъумэнкIэ Адыгэ Республикэм и Министерствэ, Мыекъопэ къэралыгъо технологическэ университетыр,  офтальмолог шъхьафитхэм я Ассоциацие, профессорэу С.В. Очаповскэм ыцIэ зыхьырэр НИИ — ККБ №1-р ыкIи Адыгэ республикэ клиническэ сымэджэщыр.  

ШIуфэс псалъэкIэ къэзэрэугъоигъэхэм закъыфагъэзагъ псауныгъэм икъэухъумэнкIэ Адыгэ Республикэм иминистрэу Мэрэтыкъо Рустем, МКъТУ-м иректорэу Къуижъ Саидэ,  Адыгэ республикэ клиническэ сымэджэщым иврач шъхьаIэу Сихъу Ахьмэд. Ахэмэ ягущыIэхэм къащыхагъэщыгъ непэрэ уахътэм диштэрэ офтальмологием, ащ инновационнэ технологиехэр зэрэрашIылIэхэрэм мэхьанэшхо зэриIэр, джащ фэдэу IэпэIэсэныгъэшхо зыхэлъ кадрэхэм ягъэхьазырын анаIэ зэрэтетыр.

Конференцием иIофшIэн хэлэжьагъ МКъТУ-м и  Медицинскэ институт ипащэу, медицинэ шIэныгъэхэмкIэ кандидатэу Хъурай Аслъан. Научнэ программэм къыдыхэлъытагъэу ащ докладэу «Ортокератологием ичIэгъ-чIэлъ мыжъохэр» зыфиIорэр къышIыгъ (иIэпыIэгъугъэр «Доктор Линз»), зыфэгъэхьыгъагъэр нэхэм якоррекцие чэщ ортокератологическэ линзэхэмкIэ зэрашIырэр ары.

Конференцием ипрограммэ хэтыгъэх уахътэм диштэрэ хирургическэ ыкIи лазернэ технологиехэр нэхэм ягъэхъужьынкIэ зэрагъэфедэхэрэр, инновационнэ методикэхэу диагностикэмкIэ щыIэхэр, клиническэ хьылъэу хъугъэхэр, джащ фэдэу офтальмологическэ IэпыIэгъур зэрагъэцакIэрэр. Специалист пэрытхэу Москва, Краснодар, Астрахань, Бухара ыкIи нэмыкI къалэхэм ащылажьэхэрэмэ докладхэр къашIыгъэх.