Мыекъопэ къэралыгъо технологическэ университетым научнэ-техническэ творчествэу «ШУСТРИК-м» (КIэлэеджакIоу инновационнэ конструкциехэр зышIышъухэрэр) и Урысые зэнэкъокъу ишъолъыр едзыгъо щыкIуагъ.

КIэлэеджакIохэр проектнэ IофшIэным хэщэгъэнхэм зэнэкъокъур фытегъэпсыхьагъ, ахэмэ зэхэгъэуцон-къэугупшысын амалэу яIэхэм ахагъэхъоным, конструированиер, моделированиер, джащ фэдэу макетхэр, модельхэр ыкIи прототипхэр шIыгъэнхэм.

Зэнэкъокъум изэхэщакIор — Фондэу научнэ-техническэ сферэм щылажьэрэ хъызмэтшIапIэ цIыкIухэм хэхъоныгъэ ягъэшIыгъэным дэлажьэрэр ары. ЗэхэщакIом игъусэгъухэр: Мыкоммерческэ организациеу Фондэу хэхъоныгъэ, зэхэгъэуцон ыкIи технологиякIэхэр «Сколковэм» щыгъэфедэгъэнхэм я Гупчэ, Урысые Федерацием исубъектхэм экономикэм ылъэныкъокIэ адэлэжьэгъэнымкIэ «Урысыем ииновационнэ шъолъырхэм я Ассоциацие», Мыкоммерческэ предприятиеу «Проектнэ офисэу ЦМИТ», ШIуфэс псалъэ къэзышIыгъэр инновациехэм адэлэжьэгъэнымкIэ Фондым ишъолъыр лIыкIоу, научнэ IофшIэнымкIэ ыкIи инновационнэ хэхъоныгъэмкIэ проректорэу Татьяна Овсянниковар ары. Ащ къызэриIуагъэмкIэ, МКъТУ-р 2023-рэ илъэсым къыщыублагъэу Адыгэ Республикэм ишъолъыр лIыкIоу зэнэкъокъум хэлажьэ, джащ фэдэу къыкIигъэтхъыгъ кIэлэцIыкIу ыкIи ныбжьыкIэ творчествэр къыхэгъэщыгъэным ыкIи дэIэпыIэгъэным мэхьанэшхо зэриIэр.

Зэнэкъокъум къыдыхэлъытагъэу экспертмэ проекти 6 зэхафыгъ. Хэлажьэрэмэ десэу яIэмэ ялъытыгъэу къагъэлъэгъуагъэх «Формы света» (проекти 2 нэбгырэ пэпчъ телъытагъэу), «Игра-ходилка» (1 команднэ проект), «Космическэ пыдзафэр» ыкIи «Робот-IэпыIэгъур». Зэнэкъокъум хэмытэу шъхьэихыгъэ проект къухьэ шIыным фэгъэхьыгъэу къагъэлъэгъуагъ. КIэлэеджакIомэ яIофшIагъэхэм лъэтегъэуцохэр афашIыгъэх, осэшIмэ яупчIэмэ джэуапхэр къаратыжьыгъэх, япроектхэр нахьышIу зэрашIыщтхэмкIэ джэнджэшхэр агъотыгъэх. ЗэкIэмэ япроектхэр лъэгэпIэ инхэм анэсхэу гъэпсыгъагъэх.

Шъолъыр едзыгъом зэфэхьысыжьэу фэхъущтхэмкIэ финалым ихьагъэхэр къэнэфэщтых, федеральнэ мэхьанэ зиIэ заявкэмэ адиштэхэу экспертнэ уасэхэр афашIыщтых.

Iофтхьабзэм икIэухым хэлажьэрэмэ шIухьафтын афашIыгъ — МКъТУ-м иректорэу Къуижъ Саидэ торт къафыригъахьыгъ. ЗэкIэ хэлэжьагъэхэм ыкIи текIоныгъэ къыдэзхыгъэхэм тафэгушIо, тапэкIэ джыри гъэхъагъэхэр ашIынхэу тафэлъаIо!