Мыекъопэ къэралыгъо технологическэ университетым торжественнэ зэIукIэ щыкIуагъ, ар «Къулыкъу ахьызэ егъэджэгъэнхэр» зыфиIорэ программэм изэфэхьысыжьхэу 2025-2026-рэ еджэгъу илъэсым фэхъугъэхэм афэгъэхьыгъагъ.

Iофтхьабзэм хэлэжьагъэх егъэджэн подразделениемэ япащэхэр, кIэлэегъэджэ-гъэсакIохэр ыкIи студентхэр — социальнэ проектмэ я ЗэIухыгъэ я III-рэ апшъэрэ еджэпIэ зэнэкъокъум щытекIуагъэхэр.

Проектнэ офисым ипащэу Болэкъо Мариэттэ программэмкIэ агъэцэкIэгъэ IофшIагъэхэр къыгъэлъэгъуагъэх. Непэ модулэу «Къулыкъу ахьызэ егъэджэгъэнхэр» зыфиIорэр лъэныкъо 45-мэ ахагъэхьагъ, ахэмэ университетым сэнэхьат зэфэшъхьафхэм ыкIи магистерскэ программэхэм щафагъэхьазырых.

Еджэгъу илъэсым къыкIоцI МКъТУ-м гукъэкI ыкIи проект заулэ щагъэцэкIагъ. 2025-рэ илъэсым иIоныгъо мазэ социальнэ пшъэрылъхэм я Бэдзэр ыкIи Проектнэ сессиер рагъэкIокIыгъэх. Проектнэ сессием хэлэжьагъэмэ проектхэу шIуагъэ къэзытыщтхэр студентхэмэ аштагъэх, лъэныкъуабэхэмкIэ агъэфедагъэх. Экспертмэ IэпыIэгъоу ныбжьыкIэ гукъэкIмэ апае ашIыхэрэр, гуфэкIоныгъэм епхыгъэ проектхэм зэрадырагъаштэрэр, яинфраструктурэ хэхъоныгъэ зэрэрагъэшIырэр, гъэсэныгъэ организациехэм, бизнесым ыкIи НКО-хэм зарэдэлажьэхэрэр къыкIагъэтхъыгъ.

Хъугъэ-шIэгъэ шъхьаIэхэм ащыщ хъугъэ проектэу «Къулыкъу ахьызэ егъэджэгъэнхэр МКъТУ-м игъусэу» зыфиIоу атIупщыгъэр, ащ Адыгэ Республикэм икIэлэеджакIохэр гъусэгъу фэхъугъэх. Гъэсэныгъэ программэу «Къулыкъу ахьызэ егъэджэгъэнхэр. Апэрэхэр» зыфиIорэм кIэлэеджэкIуи 120-рэ, кIэлэегъэджэ 50-рэ зэфэшъхьаф гъэсэныгъэ организациехэм ащыщхэу ыкIи МКъТУ-м истудент 60-рэ зэрипхыгъэх, аужырэхэр гъэсакIохэу Iофтхьабзэм хэлэжьагъэх. ЗэкIэмэ команднэ практическэ опыт агъотыгъ, социальнэ гъусэгъумэ адэлэжьэгъэнымкIэ амалхэр яIэхэ хъугъэ, проектхэм язэхэгъэуцуакIэ зэрагъэшIагъ, общественнэ мэхьанэ зиIэ пшъэрылъхэр агъэцэкIэшъугъэх.

Чанэу дэлэжьагъэх проектнэ IофшIэнэу платформэу ДОБРО.РФ зыфиIорэм, ащ ипрограммэ къыдыхэлъытагъэу социальнэ проектий атхыгъ. Университетым истудентхэр джащ фэдэу зэнэкъокъоу «Инносоциум» зыцIэм хэлэжьагъэх, ащ проектнэ заявкэу блы къыщагъэлъэгъуагъ.

МКъТУ-м щырагъаджэхэрэмкIэ мэхьанэшхо зиIэ хъугъэ-шIагъэмэ ащыщэу хъугъэ студенческэ инклюзивнэ проектхэу «Профессиональнэ неущыр» зыфиIорэм ия VIII-рэ Урысые сетевой зэнэкъокъур, ар гъэIорышIэнымкIэ Московскэ къэралыгъо университетым щыкIуагъ. Проектэу «Сымаджэу щылъмэ алъыплъэгъэныр» зыфиIоу лечебнэ факультетым истуденткэхэу Лусинэ Аветисян ыкIи Матой Назировам, япащэу Нуриет Шовкуевам къагъэхьазырыгъэм я III-рэ чIыпIэр номинациеу «Социальнэ проектым» щиубытыгъ.

Осэшхо экспертмэ джащ фэдэу къыфашIыгъ проектэу «Разработка адаптивной модной одежды для людей с ОВЗ» зыфиIорэм, ащ иавторыр технологическэ факультетым истуденткэу Ульяна Шуликар ары, игъэсэкIуагъэр КIэдэкIое Нафсэт. ХэушъхьафыкIыгъэ шIухьафтынкIэ IофшIагъэр къыхагъэщыгъагъ.

Программэм къыдыхэлъытагъэу научнэ ыкIи методическэ IофшIэным анаIэ тырагъэты. Мэзэе мазэм 2026-рэ илъэсым МКъТУ-м идоцентэу, социологие шIэныгъэхэмкIэ кандидатэу Къыздырмыш Сулиет урысые научнэ площадкэм доклад къыщишIыгъ, ар социальнэ проектмэ хэхъоныгъэ ягъэшIыгъэным ыкIи профессиональнэ компетенциехэм зягъэушъомбгъугъэным фэгъэхьыгъагъ. Ащ къыкIэлъыкIоу научнэ статьяу щы къыхаутыгъагъ.

2025-2026-рэ еджэгъу илъэсым программэм иинформационнэ лъэныкъо Iоф дашIагъ. Экономикэмрэ гъэIорышIэнымрэ яфакультет истудентхэм проектэу «Мотивация и вовлечение студентов» зыфиIорэр агъэцэкIагъ, ащ къыдыхэлъытагъэу 2025-рэ илъэсым ибжыхьэ лъэхъан информационнэ-просветительскэ Iофтхьабзэ 36-рэ рагъэкIокIыгъ, ахэмэ нэбгырэ 800 ахэлэжьагъ.

Илъэсым иIофтхьэбзэ шъхьаIэхэм ащыщыгъ «ШIушIэным и Хакатон» зыфиIорэр, ащ МКъТУ-рэ Адыгэ педагогическэ колледжэу Андрыхъое Хъусен ыцIэ зыхьырэм ястудентхэр зэрипхыгъэх. Хэлэжьагъэмэ социальнэ Iофыгъомэ япрототипхэр, сервисхэр ыкIи проектхэр зэхагъэуцуагъэх, ахэр зэкIэ обществэм IэпыIэгъу фэхъунхэм фытегъэпсыхьэгъагъэх.

Мыекъопэ къэралыгъо технологическэ университетым «Къулыкъу ахьызэ егъэджэгъэнхэр» зыфиIорэ программэм къыдыхэлъытагъэу игъэкIотыгъэу игугъу ашIыгъ: программэм ифедеральнэ чатхэм материал 17 къыхаутыгъ, шъолъыр СМИ-м зэдэгущыIэгъу ыкIи статья 30-м ехъу, социальнэ хъытыухэм 170-рэ къарыхьагъэх, джащ фэдэу зэдэгущыIэгъуий RUTUBE зыфиIорэм.

Еджэгъу илъэсыр социальнэ проектмэ я ЗэIухыгъэ я III-рэ апшъэрэ еджэпIэ зэнэкъокъумкIэ аухыгъ, ар жъоныгъуакIэм и 12-13-м кIуагъэ, Урысыем ичIыпIэ зэфэшъхьафмэ къарыкIыгъэхэр хэлэжьагъэх — зэкIэмкIи командэ 56-рэ, проект 27-рэ текIоныгъэрэ чIыпIэхэмрэ къахьыгъэх.

«Къулыкъу ахьызэ егъэджэгъэнхэр» зыфиIорэ программэм университетым хэхъоныгъэхэр щешIых, ащ епхыгъэ IофшIэныр щылъагъэкIуатэ, зэпхыныгъэхэр обществэм ыкIи социальнэ гъусэгъухэм адегъэпытэх, джащ фэдэу студентмэ профессиональнэ ыкIи гражданскэ компетенциехэр къахелъхьэ.