Мыекъопэ къэралыгъо технологическэ университетым форумэу «Шъолъыр. Хабзэр. Хэхъоныгъэр.» зыфиIорэр щыкIуагъ, ар къэралыгъо ыкIи муниципальнэ къулыкъухэм хэхъоныгъэхэр ягъэшIыгъэнхэм, обществэр зыкIыныгъэм къыфэщэгъэным, гъэIорышIэным екIолIакIэу кIэу къыфагъотыхэрэм, цифрэ технологиехэр зэрагъэфедэхэрэм афэгъэхьыгъагъ.

Iофтхьабзэр зэхэзыщагъэхэр: къэралыгъо ыкIи муниципальнэ къулыкъухэм хэхъоныгъэ ягъэшIыгъэнымкIэ Гупчэмрэ Адыгэ Республикэм «Муниципальнэ гъэпсыкIэ зиIэхэм я Совет» и Ассоциациерэ.  

ШIуфэс псалъэкIэ къэзэрэугъоигъэхэм закъыфигъэзагъ АР-м и Министрэхэм я Кабинет итхьаматэ игуадзэу Хъоткъо Хъызыр. Iофтхьабзэм къыдыхэлъытагъэу муниципалитетхэм ялIыкIохэмрэ къэралыгъо къулыкъушIэхэмрэ бгъэхалъхьэхэр афагъэшъошагъэх.

Лъэхъанэ хьылъэм урысые общестэр зыкIыныгъэм фэщэгъэным фэгъэхьыгъэ темэр форумым упчIэ шъхьаIэу къыщаIэтыгъ. А темэмкIэ доклад Геннадий Гасановым къышIыгъ — Краснодар краим игубернатор дэжь  гражданскэ обществэм хэхъоныгъэ егъэшIыгъэнымкIэ ыкIи цIыфым ифитныгъэхэмкIэ и Совет хэтыр, Новороссийскэ щыIэ УМВД-м и Общественнэ совет хэтым, Обществэу «ШIэныгъэм» илекторым. Непэрэ геополитическэ хъугъэ-шIагъэхэм ялъытыгъэу лъэпкъ зыкIыныгъэм итемэ мэхьанэшхо иIэ зэрэхъурэр ащ игущыIэхэм къащыкIигъэтхъыгъ. Тарихъ лъэхъанэ зэфэшъхьафхэр щысэ къыхьыхэзэ, спикерым къыIотагъ уахътэм къыздихьырэ гумэкIыгъомэ апэуцужьыгъэным обществэр зэрэзэфищэрэр, хэгъэгум исуверенитет зэригъэпытэрэр, обществэм игушъхьэ-хабзэхэр къызэриухъумэхэрэр ыкIи обществэм хъэхъоныгъэ зэрэригъэшIырэр. Форумым къыдыхэлъытагъэу Адыгэ Республикэм «Муниципальнэ гъэпсыкIэ зиIэхэм я Совет» и Ассоциацие итхьаматэу Апсалямэ Руслъан зэфэхьысыжь къышIыгъ, джащ фэдэу ревизионнэ комиссиеми Iофэу ышIагъэм епхыгъэ зэфэхьысыжьхэми къатегущыIагъэх.

ЦIыфыр пчэгум къизыщэрэ екIолIакIэм фэгъэхьыгъэ зэхэгущыIэжьэу форумым къыдыхэлъытэгъагъэр бэмэ ашIогъэшIэгъоныгъ, командэр зэрэбгъэIорышIэщт шIыкIэхэм ар анахьэу афэгъэхьыгъагъ. Алена Ангельчевар — пащэ, архитектор ыкIи проектхэу цIыфыр пчэгум къизыщэрэ процессхэмрэ къэралыгъо секторымрэ, джащ фэдэу бизнесымрэ ятрекер — ащ къыIотагъ непэрэ уахътэм диштэрэ екIолIакIэхэу агъэфедэхэрэр ыкIи IофшIакIомэ Iэрыфэгъу псэукIэ афэшIыгъэнымкIэ зэрэзекIохэрэр. IофшIакIохэр къыIугъэнэжьыгъэнхэм ыкIи кадрэмэ ядефицит афэгъэхьыгъэ темэм зыригъэушъомбгъугъ хьакIэщ проектхэм яэкспертэу ыкIи япащэу, хьакIэегъэблэгъэным епхыгъэ командэхэр зэхэзыщэу,  премиальнэ бутиковэ сервисхэр зыгъэпсырэ  Виктория Борлюкым. Урысые къулыкъушIэм хабзэ хъугъэ культурнэ-гушъхьэ лъэныкъохэм язехьакIоу зэрэщытым  Александр Нечушкин къытегущыIагъ — социологие шIэныгъэхэмкIэ докторыр, Къыблэ федеральнэ университетым социологием ыкIи шъолъырхэщэным я Институтэу хахьэрэм ипрофессорыр.

Форумым хэлажьэрэмэ шъхьафэу анаIэ тырадзагъ  медианалитикэм ыкIи социальнэ хъытыухэм ягъэIорышIэн. Шъолъыр гъэIорышIэным и Гупчэ ипащэу Къоджэшъэо Казбек цифрэ лъэныкъомкIэ республикэм щыпсэурэмэ зэрадэлажьэхэрэ шIыкIэр къыIотагъ. Инновационнэ цифрэ технологиехэр ыкIи процессхэм яавтоматизацие къэралыгъо ыкIи муниципальнэ гъэIорышIэным зэрэхагъахьэхэрэм къатегущыIагъ Цундышк Вячеслав — техническэ шIэныгъэхэмкIэ кандидатыр, информационнэ щынэгъончъэнымкIэ ыкIи  прикладной информатикэмкIэ МКъТУ-м икафедрэ ипащэр. Адыгеим щыпсэурэмэ якъэралыгъо сервисхэм ядэгъугъэ къэIэтыгъэным ыкIи ахэр цIыфмэ нахь къаIэкIахьэу гъэпсыгъэным пае шIэгъэн фаехэм ар къатегущыIагъ.  

Форумым икIэухым зэфэхьысыжьхэр ашIыгъэх, къэралыгъо ыкIи  муниципальнэ къулыкъухэм хэхъоныгъэ ягъэшIыгъэным фэгъэхьыгъэ предложениеу къахьыгъэхэм ахэплъэжьыгъэх.