Мыекъопэ къэралыгъо технологическэ университетым и «Точка кипение» ныбжьыкIэ проектхэм я Урысые зэнэкъокъоу «Уигухэлъ факIу!» зыфиIорэм лъэныкъоу «Медиа» зыцIэм ифинал щыкIуагъ.

МКъТУ-м зэнэкъокъум щызэхащэнымкIэ IэпыIэгъу къафэхъугъэхэр: Урысые Федерацием гъэсэныгъэмкIэ и Министерствэ, Адыгэ Республикэм гъэсэныгъэмрэ шIэныгъэмрэкIэ и Министерствэ хэхьэрэ «Точка кипениехэр», илъэсипшIым къехъугъэшъ сэнаущыгъэ зыхэлъ кIэлэеджакIохэу ыкIи студентхэу хэгъэгум щыпсэухэрэр зэфещэх. 2018-рэ илъэсым къыщегъэжьагъэу УФ-м гъэсэныгъэмкIэ и Министерствэ олимпиадэхэмрэ зэнэкъокъухэмрэ ямэфэпчъхэу ыгъэнэфагъэхэм ахэхьэ, ащкIэ зэнэкъокъум Урысыем гъэсэныгъэм исистемэ ыпашъхьэкIэ мэхьанэшхо зэриIэр къегъэшъыпкъэжьы.

2026-рэ илъэсым проектхэр лъэныкъуитфымкIэ къырахьылIагъэх: «Предпринимательствэр», «ИТ ыкIи цифрэ технологиехэр», «Медиа», «Зэтегъэпсыхьэгъэныр» ыкIи «ГуфэкIоныгъэр».

Лъэныкъоу «Медиа» ифинал зэфэхьысыжьэу фэхъугъэхэм ялъытыгъэу текIоныгъэ къыдэзыхыгъэхэр:

Илъэс 14-18-рэ зыныбжьхэр:

а 1-рэ чIыпIэр — «PROНыбжьыкIэхэр» (Лицееу № 8. Женя Поповым ыцIэ ехьы)

я 2-рэ чIыпIэр — «Русские потешки» (СОШ № 11)

я 2-рэ чIыпIэр — «Медиа.ЕджапIэр» («Алчевскэ информационнэ-технологическэ лицей»)

я 3-рэ чIыпIэр — Подкастэу «Зэрэсфэгъэхъугъэр» (СОШ № 4)

я 3-рэ чIыпIэр — «Мотивационнэ постерхэр» (СОШ № 11)

я 3-рэ чIыпIэр — «ШIэжьыр объективым: тарихъ шIэжьыр лIэужмэ цифрэмкIэ къаухъумэныр» (СШ № 6)

Илъэс 19-25-рэ зыныбжьхэр:

а 1-рэ чIыпIэр — «Бордовэ журналыр» (Ростовскэ къэралыгъо экономическэ университетыр)

я 2-рэ чIыпIэр — #МедиаСреда (Новотроицкэ псэолъэшI техникум)

я 2-рэ чIыпIэр — «Профскилл» (Тульскэ хэку медицинскэ колледж)

я 3-рэ чIыпIэр — «Мэхьанэ зиIэ зекIо гъогу: уитарихъ къызэIух» (МГГТК ФГБОУ ВО АКъУ)

я 3-рэ чIыпIэр — «Ти МКъТУ» (МКъТУ)

я 3-рэ чIыпIэр — CustomsHelp (МКъТУ)

Шъугу къэдгъэкIыжьын, текIоныгъэ къыдэзыхыгъэхэр МКъТУ-м къычIахьэхэ хъумэ балл тедзэхэр афыхалъытэщтых, джащ фэдэу ахэмэ ацIэ-алъэкъуацIэхэр Урысые Федерацием и Президент ифондэу «Сэнаущыгъэр ыкIи гъэхъагъэхэр» зыфиIорэм агъэхьыщтых.

ЗэкIэ текIоныгъэ къыдэзыхыгъэхэм, ягъэсакIохэм тафэгушIо, гукъэкIыкIэхэр ыкIи проектыкIэхэр агъэпсынхэу, ягухэлъ фэкIонхэу тафэлъаIо!

Шъугу къэдгъэкIыжьын, жъоныгъуакIэм и 19-м «Зэтегъэпсыхьэгъэныр» зыфиIорэ лъэныкъом ипроектхэр къаухъумэщтых, и 21-м «ГуфэкIоныгъэм» иехэр.