Мыекъопэ къэралыгъо технологическэ университетым IофшIэгъу зэIукIэгъу щыкIуагъ, МКъТУ-рэ Къалмыкъ къэралыгъо университетэу Б.Б. Городовиковэм ыцIэ зыхьырэмрэ ялIыкIохэр щызэIукIагъэх. Ар непэрэ гъэсэныгъэ, научнэ, гъэIорышIэкIо практикэхэр апшъэрэ гъэсэныгъэм исистемэ хэхъоныгъэ зэрэщагъотыщтхэм яупчIэхэм афэгъэхьыгъагъ.

ЗэIукIэгъум хэлэжьагъэх МКъТУ-м иректорэу Къуижъ Саидэрэ Къалмыкъ къэралыгъо университетым иректорэу Бадма Салаевымрэ, джащ фэдэу апшъэрэ еджэпIитIумэ япроректорхэр, яструктурнэ подразделениемэ япащэхэр, факультетмэ ядеканхэр, научнэ сообществэм илIыкIохэр ыкIи цифрэ трансформацием исферэ испециалистхэр.

Хэлажьэхэрэр зытегущыIагъэхэмэ ащыщыгъ сакъыныгъэ производствэм итехнологиехэр гъэсэныгъэ ыкIи административнэ процессхэр апшъэрэ еджапIэм зэрэщагъэцакIэхэрэм. Сакъыныгъэ гъэIорышIэным ылъэныкъокIэ илъэс пчъагъэ хъугъэшъ непэрэ уахътэм диштэрэ екIолIакIэхэр МКъТУ-м хегъахьэх, практическэ опытышхо ащкIэ IэкIэлъэу хъугъэ, ахэмэ IэкIоцI процессхэм шIуагъэу къатырэр нахь лъагэу аIэты, подразделениемэ яIофшIэн оптимизацие ашIы, фэIо-фашIэу агъэцакIэрэмэ ядэгъугъэ бэкIэ хагъахъо. Университетым илIыкIохэр цифрэ гъэсэныгъэ лъэныкъомкIэ опытэу аIэкIэлъымкIэ зэIукIэгъум хэлажьэхэрэмэ адэгощагъэх, университетым административнэ процессхэмкIэ пэрыохъу зэримыIэр къушыхьатыгъ.

Шъхьафэу зэIукIэгъум хэлажьэхэрэр тегущыIагъэх научнэ-производственнэ IофшIэным ыкIи мэкъу-мэщ лъэныкъом. Джащ фэдэу лIыкIохэр научнэ-ушэтэкIо подразделениехэр университетым иструктурэ зэрэхэщагъэм игугъу ашIыгъ, научнэ-производственнэ площадкэхэр зэрагъэпсыхэрэр къыраIотыкIыгъэх, инновационнэ агротехнологиехэр зэрагъэфедэхэрэр ыкIи агропромышленнэ комплексым ихъызмэтшIапIэмэ зэрадэлажьэхэрэр къыкIагъэтхъыгъ.

ЗэIукIэгъум къыдыхэлъытагъэу анахьэу анаIэ тырадзагъ медицинскэ гъэсэныгъэм хэхъоныгъэ егъэшIыгъэным епхыгъэ упчIэхэм. Апшъэрэ еджапIэмэ ялIыкIомэ медицинэ лъэныкъом феджэрэмэ апае щыIэ клиническэ базэр зэрэзэтырагъэпсыхьэрэр къыхагъэщыгъ, студентмэ практическэ ухьазырыныгъэ яIэным ылъэныкъокIэ зэхэщэн Iофхэр рагъэкIокIых, гъэсэныгъэ программэхэмкIэ аккредитациехэр ашIых, врачхэр гъэсэныгъэ процессым къыхагъэлажьэх.

ЗэIукIэгъум изэфэхьысыжьэу сакъыныгъэ гъэIорышIэным ылъэныкъокIэ тапэкIэ джыри зэдэлэжьэнхэу унашъо зэдаштагъ: мы мэфэ благъэхэм Къалмыкъ къэралыгъо университетым истудентхэр МКъТУ-м къеблэгъэщтых, «Процессхэм яфабрикэ» егъэджэнхэр щакIущтых, джащ фэдэу сакъыныгъэ технологиехэр университетым иIофшIэн зэрэхэщагъэхэр зэрагъэшIэщтых.